Read Siyin Chin Ezra 7 Bible Online

Ezra 7 - Siyin Chin bible

Ezra 7

¹Kum tam mama a ngei zawk, Artaxerxes sia Persia kumpilianpa a sua ciang Ezra kici mihing khat om hi. Ama in a taanghpupite Thiampi Lianbel Aaron dong a kat kik ciang a nuai a bang hi: Ezra sia Seriah ii tapa, Seriah sia Azariah ii tapa, Azariah sia Hilkiah ii tapa,

²Hilkiah sia Shallum ii tapa, Shallum sia Zadok ii tapa, Zadok sia Ahitub ii tapa,

³Ahitub sia Amariah ii tapa, Amariah sia Azariah ii tapa, Azariah sia Meraioth ii tapa,

⁴Meraioth sia Zerahiah ii tapa, Zerahiah sia Uzzi ii tapa, Uzzi sia Bukki ii tapa,

⁵Bukki sia Abishua ii tapa, Abishua sia Phinehas ii tapa, Phinehas sia Eleazar ii tapa, Eleazar sia Aaron ii tapa ahi hi.

⁶Ezra sia lai thiam mipil khat hi a, TOPA, Israel te ii Pathian ii Moses tungah a piak Thukham teng he sitset hi. Ezra in TOPA a Pathian thupha nga ahikom, a nget theampo kumpilianpa in pia hi. Artaxerxes ii kumpi maan hun a kum sali kumin Ezra sia thiampite, Levi te, biakinn music thiamte, biakinn cingte le naseamte a kihel Israel te honkhat taw Babylon pan Jerusalem zuan hi.

⁸Amate in a tha masabel tha, a ni khat ni in Babylon nusia in, Pathian ii huna taw in a tha nga tha, ni khat ni in Jerusalem theng uh hi.

¹⁰Ezra in a nuntakna sia TOPA Thukham sinna, a sinsate zuina, le Israel mite tungah thukham le ngeina theampo hilna in zangh hi.

¹¹Artaxerxes in a nuai a lai sia TOPA ii Israel tungah a piak thukhamte le thupiakte a he sitset, thiampi le lai thiam mipil, Ezra tungah pia hi:

¹²“Kumpilianpa Artaxerxes tung pan Vantung Pathian Thukham a he mipil thiampi Ezra tungah:

¹³“Ka kumpi ukna ngamsung theampo ah a om Israel mite theampo, thiampite le Levi te Jerusalem ah a cia nuam peuma nangma taw a pai thei natu in thu ka pia hi.

¹⁴Keima le ka thudok salite in nangma muangin hong ki aap, na Pathian Thukham teng Judah le Jerusalem ah bangza ciang pha takin kizui ci thu kan tu in kong sawl hi.

¹⁵Israel te ii Pathian, Jerusalem Biakinnpi a nei pa tungah keima le ka thudokte ii ka piak nop uh khamh le ngunn biakpiakna teng na keng tu hi.

¹⁶Israel mite le a thiampite ii Jerusalem Pathian Biakinnpi atu in a piak piakkhiatnate le noma ii Babylon ngamsung pan na kaikhop uh ngunn le khamh theampo zongh paipui tu ni hi.

¹⁷“Hi dangka teng khuital, tuutal, tuuno, antang le sapittui leina in pha takpi na zangh tu a, tua vanhte Jerusalem Biakinnpi biaknatau tungah na pia tu hi.

¹⁸A taanglai ngunn le khamhte na Pathian ii deina taw kizui in nangma le na ngamsung mite deina po ah zangh thei tu ni hi.

¹⁹Biakinn sung nasepna ah zak tu in nangma hong kipia vanhzakte theampo Jerusalem khua Pathian tungah pia tu ni hi.

²⁰Tuaciang Biakinnpi atu in na kisap dangte sia kumpi sum le vanh manpha sung panin nga thei tu ni hi.

²¹“Keima in thiampi le Vantung Pathian ii Thukham a he, mipil Ezra ii hong nget theampo thakhat thu piak tu in Euphrates Nitumna Ngam sungah a om sum lamsang a len uliante theampo thu ka pia hi,

²²piak tu a kiciangtan za sia, ngunn kilogramme 3,400, zungtaang kilogramme 10,000, sapittui litre 2,000, olive thau litre 2,000, le ci al a kisamh zaza hi tu hi.

²³Vantung Pathian in a Biakinnpi atu in a tulmawk theampo pha takin pia nanak tu nu hi; tuasia in keima tung le kei zawkciang ngamukte tungah a thin a uuk ngei nawn ngawl natu ahi hi.

²⁴Nangma in thiampite, Levi te, music thiamte, a cingte, naseamte ahibuale Biakinnpi taw a kizom midang khat pawpo tung pan shia na khon thei buatu hi.

²⁵“Nangma Ezra in na Pathian hong piaksa ciimna zanghin, na Pathian Thukham bangin a nungta Euphrates Nitumna sang mite theampo a uk tu ngamukte le Thukhente panmun na pia tu hi. A he ngawl laite theampo tungah tua Thukham na hil hamtang tu hi.

²⁶Mihing khat pawpo in na Pathian thukhamte, ahibuale kumpi ngamsung upadi te a zui buale ama sia thidaan ahizong, hawlkhiatna taw ahibuale a na theampo laaksakna ahibuale, thongtaaksakna taw thakhat thu in daan kipia tu hi,” ci hi.

²⁷Ezra in, “Ih taanghpupite ii Pathian, TOPA pok vun! Ama in kumpilianpa sia TOPA ii Jerusalem Biakinnpi, hi bangin patoai nopna thin neisak hi.

²⁸Pathian ii thuthiamna taw kumpilianpa, a thudokte le a thahat ulian theampote ii maipha ka nga zo hi; TOPA ka Pathian in thinletna hong pia zo a, keima taw cia khawm tu in Israel bee le phung lampui tam mama ka zol thei hi,” ci hi.