Read Siyin Chin Ezra 9 Bible Online

Ezra 9 - Siyin Chin bible

Ezra 9

¹Hi teng a kisep zawkciang Israel mite lampui pawlkhat hong pai in, mipite, thiampite le Levi te sia a innpaamte ahi Ammon, Moab le Egypt ngammite sung pan ahizong, Canaan te, Hit te, Periz te, Jebus te le Amor te sung pan ahizong a tuamin a om ngawlna thu ka tungah hong son uh hi. Amate in hi mite ii a vawt a kiihuai nate ma vawt uh hi.

²Jew pate in ngamdang numeite teenpui ahikom Pathian ii mi thiangthote mi thiangtho ngawl suaksak uh hi. A khial belte sia lampuite le uliante veu ahi hi.

³Hi thu ka zaak ciang thinkiam in ka puan ka eaukeak a, ka sam le ka khamul bot in khuangai in ka to cip hi.

⁴Khuangai in tualai ah nitak sangaw biakpiak hun dong ka to a, ka kiim ah mipite — a vekpi ka kungah hong kikhawm uh hi, tuate sia saltanna pan a cia kikte ii mawna khialna thu Israel te ii Pathian ii a son hu in a laute ahi hi.

⁵Nitak sangaw biakpiak hun hong thet ciang khuangai in ka omna mun pan thoto in ka puan ek sil lai teng ma taw khupdin in ka khutte laamin TOPA ka Pathian tungah thu ka ngen hi.

⁶Keima in, “Pathian awng, na mai ah vandak in ka om tu ka maizum lei hi. Ka mawna uh sia ka lu sang in a saang zawin kiciang a; vantungte a dong tu za in saang hi.

⁷Ka taanghpupite hun pan tu hun dongin koma, na mite nasia takin maw zo khu hi. Kote mawna hangin koma, ka kumpite le ka thiampite sia ngamdang kumpite khutnuai theng in, hong kisuamin, hong kisuttol a, thongtaak tu in hong kipaipui hi. Tuni ciang dongin maimawl minsiatna ka thuak dikdek lai uh hi.

⁸Tu in hun tomno sung teng kote Pathian, TOPA awng, ko tungah nong thuthiam a, mi pawlkhat sila pan nong suatak a, hi mun thiangthona ah thin muang takin nong teangsak hi. Saltanna pan nong suaktasak a, nuntakna thak nong pia hi.

⁹Kote sila ka hi uh hang saltaangin nong nusia bua hi. Persia kumpiliante in nong ngumsak a, hi lai Judah le Jerusalem ah ngammuanna ka nei thei natu uh le a lalsa na Biakinnpi sa kik tu in nong nungtasak hi.

¹⁰“Ahizong tu in Pathian awng, tuabang teng a sua zawkciang bang son thei nawn tu khu ziam?

¹¹Kamsaang na naseamte tungtawn a nong thupiakte ka zui bua leleau uh hi. Amate in ka laak tu uh ngam sia thiangtho ngawl hi, banghang ziam cile tualai ah a teang mite in tua ngam mong khat pan mong khat a kiihuai, a thasiathuai ngamtatnate taw kidimsak hi hong ci uh hi.

¹²Amate hong cina pan, tua ngam sungah nuamsa in na suan na paalte in a tawntung na luasak nuam uh le tua mite taw na kiteangthaang ngei buatu uh a, a khanto natu le a matut natu in hu ngeingawl tu nu hi, hong ci hi.

¹³Ka mawnate le ka khialnate hangin hiza daan ka thuak zawk uh ciang zong in nangma, kote Pathian in kote thuak tu a kilawm za sangin a tawm zaw nong thuaksak a, nong nuntaksak lai sia he khu hi.

¹⁴Tua ahiciang nong thupiakte thu sim ngawl kikin hi mihing seksolte taw kiteang kik thei tu khu ziam? Tuabang ka ngamta uh le na thin uuk mama in khat zongh hong hing khoai ngawlin nong mon siat tu hi.

¹⁵Israel ii TOPA Pathian awng, nang thutang ni hi, ahihang kote nong nungtasak hi. Ka mawnate na tungah kong pualaak uh hi; na mai ah kong pai natu thu a om bua hi,” ka ci hi.