Read Siyin Chin Nehemiah 1 Bible Online

Nehemiah 1 - Siyin Chin bible

Nehemiah 1

¹Hi sia in Hacaliah ii tapa Nehemiah ii a zawsa nasep teng tepteena ahi hi. Artaxerxes ii Persia kumpilian a sep a kum kul kum, Kislev tha in Susa khuapi ah keima Nehemiah ka om hi.

²Ka suapui khat ahi, Hanani sia midang pawlkhat taw Judah pan hong theng a, amate tungah Jerusalem khuapi thu le Babylon saltanna pan a cia kik Jew mipuite thu ka dongh hi.

³Amate in, kei tungah a nungta lai teng a khua a tui a zot uh ciang haksatna lianpi a thuaknate le a kiim a paam a teang ngamdangmite ii a nomuna thu teng hong ko uh hi. Amate in Jerusalem luphungte a cimhtham in om lai a, kongpite a kihaltum pan kipan a kivawt kik ngawl laina thute zongh hong son uh hi.

⁴Hi thu teng ka zaak ciang to suk in ka kap hi. Ni tam mama khuangai in ka mau a an ka ne bua hi. Pathian tungah thu ka ngen a,

⁵“Vantung ah a mang TOPA Pathian awng! Nang na lian a, nangma kiita in ka om uh hi. Nangma hong itte le na thupiak a zuite tungah na thuciamna thumaan takin na len hi.

⁶TOPA awng, hong en ta'n a, Israel mi na naseamte atu a sun a zanin ka thungetna hong ngai ta'n. Koma Israel mite mawna khialna teng hong pualaak khi hi. Ka taanghpupite le keima ka maw zo uh hi.

⁷Seksol ngamtatna taw nang kong langpan zo uh a, nong thupiakte ka zui bua uh hi. Na naseampa Moses tungtawnin nong piak thukhamte ka zui bua uh hi.

⁸Nangma ii Moses tungah: ‘No Israel mite ka tungah nong thumaan bua uh le minam dangte sungah kong thethaang tu hi.

⁹Ahizong ka kungah hong zuan kikin kong thupiakte na zui uh le, leimong dongin kithethaang zo na hi uh hangin keima nong biak natu in ka tealsa munah kong paipui kik tu hi,’ na ci thute tu in phawk kik ta'n.

¹⁰“TOPA awng, hite in nangma mi, na naseamte ahi uh hi. Na vaangletna le na thahatna taw amate na suatak hi.

¹¹Tu in ka thungetna le nangma hong patoai nuam na naseam dangte theampo ii thungetnate hong ngai ta'n. Tuni in taangtutna hong pia ta'n a, kumpilianpa in hong hesuaksak ta'n.” Tua hun lai in keima in kumpilianpa sapittui a pia pa ka hi hi.