Read Siyin Chin Nehemiah 12 Bible Online

Nehemiah 12 - Siyin Chin bible

Nehemiah 12

¹Shealtiel ii tapa Zerubbabel le Thiampi Lianbel Joshua taw saltanna pan a cia kik, thiampite le Levi te min tepteena a nuai a bang ahi hi:

²Seraiah, Jeremiah, Ezra, Amariah, Malluch, Hattush, Shecaniah, Rehum, Meremoth, Iddo, Ginnethoi, Abijah, Mijamin, Maadiah, Bilgah, Shemaiah, Joiarib, Jedaiah, Sallu, Amok, Hilkiah le Jedaiah ahi uh hi. Hite sia Joshua hunlai in a thiampipuite theampo sungah lampuite ahi hi.

⁸A nuai a teng sia lungdamko biakna lasakna ah lampuite veu hi: Jeshua, Binnui, Kadmiel, Sherebiah, Judah le Mattaniah.

⁹A kizo choir lasate a nuai a bang hi: Bakbukiah, Unno le a Levi puite.

¹⁰Joshua sia Joiakim ii pa hi a; Joiakim sia Eliashib ii pa hi; Eliashib sia Joiada ii pa hi;

¹¹Joiada sia Jonathan ii pa hi a; Jonathan sia Jaddua ii pa ahi hi.

¹²Joiakim ii Thiampi Lianbel a sep lai in thiampi bee lutangte sia a nuai a thiampite veu hi: [Thiampi] — [Bee le phung] Meraiah — Seraiah Hananiah — Jeremiah Meshullam — Ezra Jehohanan — Amariah Jonathan — Malluchi Joseph — Shebaniah Adna — Harim Helkai — Meraioth Zechariah — Iddo Meshullam — Ginnethon Zichri — Abijah …[1] — Miniamin Piltai — Moadiah Shammua — Bilgah Jehonathan — Shemaiah Mattenai — Joiarib Uzzi — Jedaiah Kallai — Sallai Eber — Amok Hashabiah — Hilkiah Nethanel — Jedaiah

²²Thiampi Lianbel te: Eliashib, Joiada, Jonathan le Jaddua te nuntak hun sungin Levi innkuan lutangte le thiampi innkuan lutangte tepteena khat kikoi hi. Hi tepteena sia Darius ii Persia kumpilianpa a sep lai in kizo siat hi.

²³Levi innkuan lutangte tepteena lai ahile Eliashib ii tupa Jonathan hun dong bekma zumlai tepteena sungah kikhum hi.

²⁴Hashabiah, Sherebiah, Jeshua, Binnui le Kadmiel te sawlna taw Levi te a pawl a pawl veu sua hi. Pathian mi David kumpipa thupiakna taw kizui in, pawl nii veu in kilaih in Pathian pok a, lungdamko uh hi.

²⁵Biakinnpi kongpite hui ah vanh kholna inndoi a cingte a uk biakinn cingte sia a nuai a teng hi: Mattaniah, Bakbukiah, Obadiah, Meshullam, Talmon le Akkub.

²⁶Hi mite sia Joshua ii tapa, Jehozadak ii tupa ahi Joiakim hun, le ngamukmang Nehemiah le Thukham a he, thiampi mipil Ezra te hun lai in a omte veu hi.

²⁷Jerusalem khuapi luphung a ki aap ciang, daakbute le tengtonghte tumin lungdamkona late taw a ki aapna poai ah a kihel thei natu in Levi te sia a teenna tek pan kikaikhawm hi.

²⁸Levi innkuan la sate sia Jerusalem khua kiim a teenna tek pan le Netophah kiim khuate pan,

²⁹tuaciang Bethgilgal, Geba le Azmaveth panin kikhawmtua uh hi.

³⁰Thiampite le Levi te in amate, mipite, kongpite le khuapi luphung atu in a zeksa thiansuana seam hi.

³¹Luphung tungah Judah lampuite ka khawmtua a, Pathian tungah lungdamko in, khuapi a kiimkot tu pawl lian niite ka uksak hi. A masa pawl sia luphung tung ziatsang Ninthuk Kongpi sang manaw in pai uh hi.

³²La sate nung pan Hoshaiah pai a, Judah lampuite a lang in zui uh hi.

³³A zom kik a nuai a thiampi teng in lemle tumin pai uh hi: Azariah, Ezra, Meshullam, Judah, Benjamin, Shemaiah le Jeremiah. Tua zawkciang Jonathan ii tapa Shemaiah ii tupa ahi, Zechariah in zui hi. (A taanghpupite sungah Asaph bee le phungte ahi Mattaniah, Micaiah le Zaccur te zongh kihel hi.)

³⁶Zechariah sia a bee le phung sung pan a dangte — Shemaiah, Azarel, Milalai, Gilalai, Maai, Nethanel, Judah le Hanani — a vekpi in Pathian mi David kumpipa ii a tum thei music vanh namte keng uh hi. Hi pawl sia a pai ciang laithiam mipil Ezra in lampui hi.

³⁷Tuinaak Kongpi pan David Khuapi sangah kaato in, David kumpi inn kaantan a, khuapi nisuana sang Tui Kongpi luphung ah heak kik uh hi.

³⁸Lungdam a ko pawldang khat sia luphung tung a veisang tawnin pai a, keima le mipite a lang in ka zui uh hi. Meikhukte Tausaang kaantan in Luphung Zai sia ah pai in,

³⁹tua mun pan Ephraim Kongpi, Jeshanah Kongpi, Ngasa Kongpi, Hananel Tausaang le Zakhat Tausaang te kaantan in Tuu Kongpi ah ka pai uh a, Biakinnpi kongpi hui ah ka tawp uh hi.

⁴⁰Tuabangin Pathian tung lungdam a ko tua pawl niite biakinn suumsung theng uh hi. Keima taw a omkhawm lampuite ban ah

⁴¹ka pawl sungah lemle tum a nuai a thiampite: Eliakim, Maaseiah, Miniamin, Micaiah, Elioenai, Zechariah le Hananiah te kihel a;

⁴²tuaciang amate nung pan Maaseiah, Shemaiah, Eleazar, Uzzi, Jehohanan, Malchijah, Elam le Ezer te in zui uh hi. Jezrahiah ii lampui lasate in a aw neiza taw lasa uh hi.

⁴³Tua ni in sangaw biakpiakna tam mama kipia a, mipite lungdamna taw kidim uh hi, banghang ziam cile Pathian in amate lungdamsak mama hi. Numeite le patangte tua poai ah kihel in, amate ii awngingte a khualana pan kiza kawkoai thei hi.

⁴⁴Tua hunlai in sawm a khat sumpite, kum sim anpalte le a minciil thingngate a kihel Biakinnpi atu a kipiate kikepna vanh kholna inndoite a uk tu in pasalte kikoi hi. Hi mite in Thukham sungah a om bangin khuapi tuatuam naina ah a om lote pan thiampite le Levi te atu a kipiate, kaikhop tu vaipuak nei uh hi. Judah mi theampo thiampite le Levi te tungah lungkim uh hi,

⁴⁵banghang ziam cile amate in Pathian thupiakna bangin kithiansuana poaite le a zeksa dangte vawtsak hi. David kumpipa le a tapa Solomon ii zui tu ngeina a piakte bangin biakinn music thiamte le biakinn cingte zongh in pha takin a sep tute seam uh hi.

⁴⁶Nidang lai, David kumpipa le music thiam Asaph hun pan kipan lasate in Pathian pokna late le lungdamkona lasaknate lampui uh hi.

⁴⁷Zerubbabel le Nehemiah hun ciang zonghin biakinn music thiamte le biakinn cingte kivaak natu in Israel mi theampo in ni simin letsong pia uh hi. Mipite in Levi te tungah a thiangtho biakpiaknate pia a, Levi te in a kisamh za thiampite pia uh hi.