Read Siyin Chin Nehemiah 13 Bible Online

Nehemiah 13 - Siyin Chin bible

Nehemiah 13

¹Mipite tungah nging takin Moses ii Thukham a kisim ciang Ammon te le Moab te sia Pathian mite sungah kihel thei ngawl tu hi a cina laingual mu uh hi.

²Tuasia banghang ziam cile Israel mite Egypt pan a pusua lai in, lampi ah Ammon le Moab mite in an le tui a piak ngawl hang hi. Amate in Israel a haamsiat tu in Balaam sum pia ahihang ih Pathian in tua haamsiatna sia thupha khat suaksak zaw pum hi.

³Israel mite in hi thukham a kisim a zaak ciang amate mi sungah ngamdangmi theampo kihelsak ngawl uh hi.

⁴Biakinn vanh kholna inndoite a uk thiampi Eliashib sia Tobiah taw khuangei hialma a thu kisi in om uh hi.

⁵Ama in Tobiah sia antang le ngimnamtui biakpiaknate, Biakinnpi sungah a kizangh vanhte, thiampite atu biakpiaknate le, tuaciang Levi te, biakinn music thiamte le biakinn cingte a kipia antang, sapittui le olive thau, sawm a khat te bek khol natu a, a kingaisun inndoi lian sia zong zanghsak hi.

⁶Hi bang teng ahi hunlai in Jerusalem ah ka om bua hi, banghang ziam cile Artaxerxes ii Babylon kumpi a sep zawk kum 32 kum in, ama kungah thupuak tu in ka pai kik hi. Hun tawmvei zawkciang ama oaina taw

⁷Jerusalem ah ka heak kik hi. Tualai ah Eliashib in Biakinnpi inndoi khat Tobiah a zaksak ka mu ciang ka patau hi.

⁸Ka thinso a, Tobiah neisa vanh theampo ka lotkeaksak hi.

⁹Tua inndoite a zeksa om bangin a kithianthosak natu le biakinn vanhte, biakpiakna ante le ngimnamtuite a kikoi kik natu in thu ka pia hi.

¹⁰Mipite in a khamkhop tu an pia zo ngawl ahikom biakinn music thiamte le a dang Levi te in Jerusalem nusia in a lo tek a zot kik zongh ka za hi.

¹¹Biakinnpi a kingaingonsak hu in tua uliante ka teih zazaan hi. Tuaciang Levi te le music thiamte Biakinnpi ah ka kaikhawm kik a, a nasep ka seamsak kik hi.

¹²Tua zawkciang Israel mite theampo in biakinn vanh kholna inndoite ah sawm a khat a piak antang, sapittui le olive thaute a puak kipan kik uh hi.

¹³Vanh kholna inndoite uk tu in, a nuai a teng: thiampi Shelemiah; thukham a he mipil Zadok; le Levi mi Pedaiah ka koi hi. Mattaniah ii tupa, Zaccur ii tapa ahi Hanan in amate hu tu hi. Hi mite in a naseppuite tungah thumaanna taw an hawm tu in a muanhuai mite ahi sia ka he hi.

¹⁴Ka Pathian awng, na Biakinnpi atu le a biakpiak natu in hi ka nasepnate theampo hong phawsak ta'n.

¹⁵Tua hunlai Judah ngam ah mite in Sabbath ni in sapittui a suuk uh ka mu hi. Midangte in an, sapittui, sapitngate, thei ngate le, nadang teng a laate tungah suanhin Jerusalem ah a tumpui ka mu a; Sabbath ni in bangma a zuak ngawl natu in a kidop natu thu ka pia hi.

¹⁶Tyre khuapi mite pawlkhat Jerusalem ah teang a, tuate in Sabbath ni in ka mite tungah a zuak tu ngasate le vanh tuatuamte khuapi sungah hong paipui uh hi.

¹⁷Jew lampuite ka teih a, amate tungah, “A sia na vawt uhte en ve vun! Sabbath ni ninsak nu hi.

¹⁸Hi bang linlian in na taanghpupite ngamta ahikom Pathian in daan pia a, hi khuapi lalcipsak hi. Tua hi napi Sabbath ni nitsakna taw Israel tungah Pathian thin uuk seseam natu in vawt veve nu hi,” ka ci hi.

¹⁹Tua ahikom Sabbath a kipat sim, nitak kipat po ciang khuapi kongpite a kikha natu le Sabbath hun a bo mateng a kihon kik ngawl natu in thu ka pia hi. Sabbath ni in khuapi sungah bangma a kitumpui ngawl het natu in ka mihingte pawlkhat in kongpite ka cingsak hi.

²⁰Vanh namcin a zuakte khatvei niivei khawng khuapi luphung pua sangah nipi zawk Ni nga ni zanin ngiak uh hi.

²¹Tua mite tungah, “Zingsang ciang dong na ngak uh hang a kimanna om bo. Hi bang na om kik uh le, zawthawk thu kong zak kul tu hi,” ci in a kidop natu in thu ka pia hi. Tua hun a kipan Sabbath ni in amate hong pai kik ngawl uh hi.

²²Levi te amate le amate kithiansua natu le Sabbath a thianthosak nanak natu in, kongpite pha tak a cin natu thu ka pia hi. Pathian awng, hi thu zongh ah hong phawk ta'n a, itna lian nei na hikom kei hong suaktasak ta'n.

²³Tua hun in Judah pasal tam mama in Ashdod, Ammon le Moab numeite a teenpui uh zongh ka mu hi.

²⁴A tate a lang in Ashdod kam ahibuale kamdang khat pau in om a, amate in koma kam pau thei ngawl uh hi.

²⁵Tua pasalte teih in ka haamsiat ngawp a, saatin, a sam ka nuk zazaan hi. Tua zawkciang amate ahizong a tate ahizong ngamdangmite taw a ten kik ngei nawn ngawl natu in Pathian min taw ka kiciamsak hi.

²⁶Keima in, “Solomon kumpipa a mawsak a khialsak sia ngamdang numeite hi. Ama in minam dangte ii kumpite sangin a lianzaw pa hi. Pathian in ama it a, Israel theampo ii kumpi suaksak napi, hi mawna khialna sungah puk hi.

²⁷Kote in na ngamtatna hong zui in ngamdang numeite teenpuina taw ih Pathian thu nial tu khu ziam?” ka ci hi.

²⁸Joiada sia Thiampi Lianbel Eliashib ii tapa hi a, ahizong Joiada ii tapate khat in Beth Horon khua pan Sanballat ii tanu teenpui ahikom Jerusalem pan Joiada ka hawlkhia hi.

²⁹Pathian awng, hi mite in thiampi nasepna mun le thiampite le Levi te taw na vawt thuciamna te a nitsakna thu phawk in.

³⁰Ngamdang taw a kipee-awna theampo pan mipite ka thiansua a, amate nasep tu tek a heak natu in thiampite le Levi te zui tu ngeinate ka vawtsak hi.

³¹A hun ciang biakpiaknate halna ah a kizangh thingte a kipaipui natu le mipite ii a anpalte le thingnga minciilte taw biakpiaknate a paipui natu in ka vaihawmsak hi. Pathian awng, hite theampo phawk in a, tuaciang keima hong kiphaw natu hong hisak ta'n.