Read Siyin Chin Nehemiah 3 Bible Online

Nehemiah 3 - Siyin Chin bible

Nehemiah 3

¹Khuapi ii luphung sia hi bangin kiciang kik hi. Thiampi Lianbel Eliashib le a thiampipuite in Tuu Kongpi vawt kik a, aapin, tuaciang kongpite a omna mun tek ah koi uh hi. Amate in luphung sia Zakhat Tausaang le Hananel Tausaang dongin aap uh hi.

²Jericho mite in tua luphung cian a khen zom sia ciang uh hi. Imri ii tapa Zaccur in a khen zom sia, ciang hi.

³Hassenaah ii bee le phung in Ngasa Kongpi vawt hi. Amate in a zawlte thung a kongpite bulh in, kongpi kha natu in a kalhnate le a zawlte thua uh hi.

⁴Uriah ii tapa, Hakkoz ii tupa ahi Meremoth in a khen zom sia, ciang hi. Berechiah ii tapa, Meshezabel ii tupa ahi Meshullam in a khen zom sia, ciang hi. Baana ii tapa Zadok in a khen zom sia, ciang hi.

⁵Tekoa mite in a khen zom sia ciang ahihang, khua sung lampuite in nasep ukte ii amate sep tu a, a see nasepte nial uh hi.

⁶Paseah ii tapa Joiada le Besodeiah ii tapa Meshullam te in Jeshanah Kongpi vawt kik uh hi. Amate in a zawlte thung a kongpite bulh in, kongpi kha natu in a kalh nate le a zawlte thua uh hi.

⁷Gibeon pan Melatiah, Meronoth pan Jadon, tuaciang Gibeon le Mizpah mite in Euphrates Nitumna ngamukmangpa inn dong a khen zom sia, ciang hi.

⁸Khamh seakpa Harhaiah tapa Uzziel in a khen zom sia, ciang hi. Paaknamtui vawt pa Hananiah in Luphung Zai ciang dong a khen zom sia, ciang hi.

⁹Jerusalem khenlang a ukpa Hur ii tapa Rephaiah in a khen zom sia, ciang hi.

¹⁰Harumaph ii tapa Jedaiah in ama inn kung a khen zom sia, ciang hi. Hashabneiah ii tapa Hattush in a khen zom sia, ciang hi.

¹¹Harim ii tapa Malchijah le Pahath Moab ii tapa Hasshub in a khen sia zom sia ciang in Meikhukte Tausaang sa uh hi.

¹²Jerusalem khenlang a ukpa Hallohesh ii tapa Shallum in a khen zom sia, ciang hi. (A tanute in nasep hu uh hi.)

¹³Hanun le Zanoah khuapi a, a teangte in Kuam Kongpi vawt kik uh hi. Amate in kongpite a omna munah koi in, kongpite kha natu in a kalhnate le a zawlte bulh a tua luphung sia metre 440 sung Ninthuk Kongpi dong puua kik uh hi.

¹⁴Beth Haccherem ngamkhenno ukpa Rechab ii tapa Machijah in Ninthuk Kongpi vawt kik hi. Ama in kongpite a omna munah koi a, kongpi kha natu in a kalhnate le a zawlte bulh hi.

¹⁵Mizpah ngamkhenno ukpa Colhozeh ii tapa Shallum in Tuinaak Kongpi vawt kik hi. Ama in kongpi tuamin kongpite a omna munah koi in, a kalhnate le a zawlte bulh hi. Ama in kumpi huan ii zom, Shelah Tuili ah a om luphung sia David Khuapi pan tuaksukna keallei dong ciang hi.

¹⁶Bethzur Ngamkhenno ii lang a ukpa Azbuk ii tapa Nehemiah in a khen zom luphung sia David ii thaan, tuili le ngalkap innte dongin ciang hi.

¹⁷A nuai a, Levi te in luphung a khen zom tam mama te ciang kik uh hi: Bani ii tapa Rehum in a khen zom sia ciang hi; Hashabiah, Keilah Ngamkhenno lang ukpa in a ngamkhenno sia taangin a khen zom sia, ciang hi;

¹⁸Henadad ii tapa Bavvai, Keilah Ngamkhenno ii lang, a taanglai teng a ukpa in a khen zom sia, ciang hi;

¹⁹Jeshua ii tapa Ezer, Mizpah ngamukpa in ngalhiamte koina mai, luphung a koaina mun dong a khen zom sia, ciang hi;

²⁰Zabbai ii tapa Baruch in Thiampi Lianbel Eliashib inn kongbiang dong a khen zom sia, ciang hi;

²¹Uriah ii tapa, Hakkoz ii tupa ahi Meremoth in Eliashib inn mong dong a khen zom sia, ciang hi.

²²A nuai a, thiampite in luphung khen tam mama te ciang kik uh hi: Jerusalem kiim a teang thiampite in a khen zom sia, ciang uh hi;

²³Benjamin le Hasshub in amate inn mai ah a khen zom sia, ciang uh hi. Maaseiah ii tapa, Ananiah ii tupa ahi Azariah in a inn mai a khen zom sia, ciang hi;

²⁴Henadad ii tapa Binnui in Azariah inn pan luphung king dong a khen zom sia, ciang hi.

²⁵Uzai ii tapa Palal in a cingte zum paam kumpi inn tungnung tausaang le luphung ii king pan kipan a khen zom sia, ciang hi; Parosh ii tapa Pedaiah in nisuana sang Tui Kongpi nai le Biakinnpi cinna tausaang kung dong a khen zom sia, ciang hi. (Hi mun sia Ophel kici khuapi taw a kinaina mun hi a, biakinn naseamte teenna hi.)

²⁷Tekoa khua mite in Biakinnpi cinna tausaang lian ii langkhat mun khat pan Ophel nai luphung dong a khen zom sia a nii veina in ciang hi.

²⁸Thiampi pawlkhat in Siphu Kongpi pan saksang zuan in amate inn mai tek ah a khen zom sia, ciang hi.

²⁹Immer ii tapa Zadok in ama inn mai ah a khen zom sia, ciang hi. Shecaniah ii tapa Shemaiah, Nisuana Kongpi keampa in khen zom sia, ciang hi.

³⁰Shelemiah ii tapa Hananiah le Zalaph ii tapa lukna Hanun in a khen zom sia a nii veina in ciang hi. Berechiah ii tapa Meshullam in a inn mai ah a khen zom sia, ciang hi.

³¹Khamh seakpa Malchijah in nisuana saksang luphung king tung belh ah om inndoi naina, Miphkad Kongpi kung, biakinn naseamte le sumzuakte zak inn dong a khen zom sia, ciang hi.

³²Khamh seakte le sumzuakte in a king a om inndoi sia pan Tuu Kongpi dong a khen khakbel luphung sia, ciang uh hi.