Read Siyin Chin Nehemiah 4 Bible Online

Nehemiah 4 - Siyin Chin bible

Nehemiah 4

¹Koma Jew te in luphung cian ka kipat kikna thu Sanballat in a zaak ciang a thin uukin, hong selno hi.

²A lawmte le Samaria ngalkapte mai ah ama in, “Hi a huathuai Jew te in bang teng vawt kisa ziam? Khuapi puua kik nuam ziam? Sangaw biakpiaknate piakna taw ni khat sungin nasep zo thei tu in kingaisun ziam? Uksuang tawng kaanghmong teng taw inn sak natu suang vawt thei tu ki um ziam?” ci hi.

³Ama kung a ding Tobiah in, “Amate in bang luphung nam ciang thei ngei tu ziam? Ngia khat ngawngawn in tuasia phulvawk zo tu hi!” ci thua hi.

⁴Keima in thu ka ngen a, “Pathian awng, ko hong selnonate za in! Hong selnonate amate lu tungah tu tahen. A neisa theampo kisuttol tahen a, ngamdang ah thongtaak tu in kipaipui tahen.

⁵A tatsiatnate maisak heak in a, a mawnate mangil heak in, banghang ziam cile amate in ko inn sate hong zawngsak uh hi,” ka ci hi.

⁶Tuabangin kote in luphung ciang tawto in, mite naseam thanuam ahikom, hai ngawlin a saanna bup ii lang kizo to paih hi.

⁷Jerusalem luphung cian kik a kingaih mama na thu le luphung hawngvangte a kihukna thute Sanballat, Tobiah le Arabia mite, Ammon mite le Ashdod mite in a zaak uh ciang a thin uuk mama uh hi.

⁸Tua ahiciang, amate kipawlin Jerusalem simin buaisak sawm uh hi,

⁹ahizong ih Pathian tungah thungen in, sun le zanin ngalvil tu mihing ka koi uh hi.

¹⁰Tuaciang amate in Judah mite ii a nei la khat sia sa uh hi: “Eite vanhngit pua in nasep ngimin ih tha kiam a; Uksuang tawng tua tu tam mama hi. Tuni in bangbang luphung ciang zo tu hi ziam?”

¹¹Ih ngalte in, eite ii ih mu ma in ahibuale a piang teng ih heak ma in ei kung hong thengin hong thatlum tu a, tuabangin nasep hong tawlngasak tu hi, ci in ngaisun uh hi.

¹²Ahihang ih ngalte sungah a teang Jew te in ei hong sawm ih ngalte ngealna teng ih kidop thei natu in a hun, a hun in hong ko uh hi.

¹³Tua ahikom ka mite namsau, tei le thal te ka pia a, a kiman ngawl lai mun teng pan ngal pang tu in luphung nungsangah a bee le a phung zui in ka omsak hi.

¹⁴Mite thinngimna ka mu ciang amate tung, a lampuite tung le uliante tungah, “Ih ngalte kiita heak vun. TOPA bangza lian a bangza kiitakhuai ci sia phawk vun a, na ngammipuite atu, na tate atu, na zite atu le na bangkuate atu in ngalsim tavun,” ka ci hi.

¹⁵Ih ngalte hong sawmna thute ih heak hunlam sia za in, amate ngealnate Pathian ii a lalsak hunlam tel uh hi. Tuaciang luphung cianna ah ka vekpi in ka kuan kik uh hi.

¹⁶Tua hun a kipanin ka mite a lang in naseam a, a lang sia ngal simna puante silhin, tei, lum le thal te toai in ngalvil uh hi. Tuaciang ih lampuite in luphung a ciang mite nasia takin panpui uh hi.

¹⁷Vanhzak a nawn mite ngawngawn in a khut langkhat taw naseam in a langkhat ah ngalhiam toai uh a,

¹⁸naseam peuma in a kawngah namsau khat tek kua hi. Patauna lemle tum tu pa sia keima taw omkhawm hi.

¹⁹Keima in mipite, a uliante le lampuite tungah, “Ih nasepna zai a, kikhuala in luphung tungah khat le khat ih kikhenthaang hi.

²⁰Lemle aw na za uh le ka kiim ah hong kikhawm tavun. Ih Pathian in ei atu ngal hong simsak tu hi,” ci in ka son hi.

²¹Tuabangin, ni simin zing khuavak pan zan aksite a sua dong ko teng a lang in luphung ka cian uh laitak a lang sia tei toai in ngalvilin om khu hi.

²²Tua hun sungin nasep ukte tungah amate le nasep a hute theampo sia zanin khuapi ih cin thei natu le sun zongh in na ih sep thei natu in Jerusalem ah zantaam tu in ka sawl hi.

²³Keima, ka lawmte, ka naseamte le keima hong cingte in zan ngawngawn in ka puante ka suut bua uh hi. Tuaciang ka ngalhiam tek ka toai siat uh hi.