Read Siyin Chin Nehemiah 6 Bible Online

Nehemiah 6 - Siyin Chin bible

Nehemiah 6

¹Kongpi lam ah kongpite bulh ngawl lai ka hi uh hang, luphung cian ka man zawkna uh thu le a hawngvang mun a om nawn ngawlna thu Sanballat, Tobiah, Geshem le ka ngal dangte in za uh hi.

²Tuaciang Sanballat le Geshem in Ono Zaangtam khuanote khat ah amate taw kimu nuamin kam hong vaitha hi. Hisia sia keima bang khat po hong law nop manin hong theamna hi.

³Amate kungah kamtaite ka paisak a, “Nasep thupi ka vawt laitak hi in tualai ah paisuk thei ngawl khi hi. Noma taw kimu natu bekin nasep tawlngasakin kong pai buatu hi,” ka cisak hi.

⁴Amate in tuabangin livei kam hong vaitha a, tua hun simin tuabang veu ma in ka zo kik hi.

⁵Tuasia ciang a nga veina ah Sanballat in tazeik tup ngawl laithak khat, a naseamte khat in hong piasak hi.

⁶Tua lai sungah: “Geshem in kei tung hong son a, nangma le Jew mite in ngaltho nuam ahi hu in, luphungte ciang kik hi, ci in kiim le paam mite sungah kison kheukho hi. Tuaciang nangma le nangma kumpi na kisuasak natu in ngeal a,

⁷tuaciang nangma Judah kumpi na hina thu, kamsaang pawlkhat in Jerusalem khua sungah a thansak natu in ngealna nei hi, ama in hong ci si hi. Kumpipa in hi thu, za nanak tu ahikom keima taw kimu in thuson khop tu ka ngaisun hi,” ci in ki at hi.

⁸Ama tungah lai ka thuk kik a: “Na ci teng a maan om ngawl hi. Nangma phua tawm vive hi,” ka ci hi.

⁹Nasep tawlngak thei natu in amate in ko hong lauthawn hi. Thu ka ngen a, “Ahizong tu in Pathian awng, hong thahatsak ta'n!” ka ci hi.

¹⁰Hi hun sung khawngin a inn a nusia thei ngawl, Delaiah ii tapa, Mehetabel ii tupa Shemaiah kungah haw tu in ka pai hi. Ama in kei tungah, “Nangma le keima, Biakinnpi sung Thiangtho Mun ah pai in ih buu khawm tu a, kongkhate ih kalh tu hi, banghang ziam cile nangma that tu in amate hong pai tu hi. Tu in nangma that tu in zan khat pawpo amate hong pai tu uh hi,” hong ci hi.

¹¹Keima in, “Kei sia tai in, a buu thei nam ka hi bua hi. Biakinnpi sung bukna taw ka nuntakna huuk sawm tu in hong ngaisun ni ziam? Tuabangin ka buu buatu hi,” ci in ka zo hi.

¹²Ka ngaisut kik ciang Pathian in Shemaiah tungah thu son ngawl ahihang, hi kidop natu thu kei hong son tu in Tobiah le Sanballat in ama sumnguk pia a hina thu ka phawk hi.

¹³Amate in ka min hong siatsak natu le maizum ka nga natu in mawna sung ka tum dongin hong lausak tu in Shemaiah cial hi.

¹⁴Thu ka ngen a, “Pathian awng, Tobiah le Sanballat ii ngamtatna phawk in a, amate daan pia in. Kei hong lausak nuam tua numei nu Nodiah le a dang kamsaangte theampo phawk in,” ka ci hi.

¹⁵Ni 52 a kisep zawkciang Elul tha ni 25 ni in luphung bup kiman thiang hi.

¹⁶Ngam kiim tengah a om ih ngalte in hi thu a zaak uh ciangin, Pathian huna taw nasep a kizawna thu a kuama po in he ahiciang, amate atu maizumhuai ahi hunlam phawk tek hi.

¹⁷Hi hun sung theampo Judah lampuite Tobiah taw lai kithaak uh hi.

¹⁸Tobiah ii sunghpa sia Jew mi Arah ii tapa Shecaniah a hi hu in Judah ngamsung mi tam mama ama sangah pang uh hi. Tua banah a tapa Jehohanan in Berechiah ii tapa Meshullam ii tanu teenpui hi.

¹⁹Mite in ka mai ah Tobiah ii na pha a sep theampo son in, ka ci theampo zongh ama tungah son siat uh hi. Tuaciang ama in kei lau natu hanciam a, lai hong thaak tawntung hi.