Read Siyin Chin Esther 4 Bible Online

Esther 4 - Siyin Chin bible

Esther 4

¹Mordecai in hi thu vawtna teng a heak ciang a thinna sa in a puan balkeak hi. Tua zawkciang khau-ip puan silhin a lu tungah vut poai a, nasia tak kapin tau in,

²khuapi kaantan a, kumpi inn kongbiang a thet dong pai hi. A sungah ama tum ngawl hi, banghang ziam cile khau-ip puan silhte a sungah kuama kitumsak ngawl hi.

³Kumpipa thuthansakna a kiheaksakna ngamke theampo ah Jew te nasia tak khuangai in om hi. Amate an tang a, kapin tau in, a tamzaw khau-ip puan silhin vut sungah lum uh hi.

⁴Esther naseam numeite le numei uk cil kingette in Mordecai ngamtatna teng ama tungah a son uh ciang nasia takin Esther thinngim hi. Esther in Mordecai sia khau-ip puan a silh taangin a silh tu puan pawlkhat piasak ahihang ama in saang nuam ngawl hi.

⁵Tuasia ciang Esther in kumpipa ii ama naseam tu a koi numei uk cil kingetpa Hathach samin, Mordecai kungah paisak a, thupiang teng a pian theina thu kan in sawl hi.

⁶Hathach sia Mordecai omna ahi kumpi inn tumna khuapi leitual ah pai hi.

⁷Mordecai in thupiang theampo son siat a, Jew te theampo a kimon le, kumpi sum le vanh manpha tungah dangka a piak tu za Haman in kamciam a piakna dongin son siat hi.

⁸Jew te a suksiat natu thu Susa khuapi pan a laihawm dal khat sia ama in Hathach pia hi. Mordecai in Esther tungah tua lai a piak natu, thupiang teng a son siat natu le kumpipa kungah Esther pai in ama mipuite atu hesuak a nget natu in vaitha hi.

⁹Mordecai vaithak bangin Hathach in seam a,

¹⁰tuaciang Esther in Mordecai tungah hi thu teng ama ma in puaksak kik hi;

¹¹“Mihing khat pawpo, pa ahizong numei ahizong sapna nga ngawlin kumpipa taw kimu nuam in suum sungnung ah a tum le ama a thi kul hi. Tua in upadi hi a; kumpipa thudokte a kipan ngamsung mi theampo ii heak ahi hi. Hi upadi pial thei natu lampi khat bek om hi: kumpipa in mihing khat tungah a khamh ciangkhut a lapto le, tuasia ciang ama nuntakna kikhoaikhe hi. Keima zongh kumpipa ii hong sap ngawl zawk tha khat pha zo hi,” ci in sonsak hi.

¹²Esther ii kam vaithak teng Mordecai in a nga ciang,

¹³ama in hi bangin a kidop natu thupuak hi: “Kumpi inn sungah na om hu in Jew dangte sangin ngammuang zaw tu in kingaisun heak in.

¹⁴Hi bang hun sungah thimthu in na om le, vantung pan Jew te atu huna hong pai in, Jew te kihun tu a, ahizong nangma na thi tu a, na pa ii bangkua mong tu hi. Ahitazong, akua in he tu ziam? — nangma kumpinu hong kisuasak zongh hi bang hun atu in a suak na hina meal kihe ngawl hi,” ci hi.

¹⁵Esther in Mordecai tungah hi bang zo kik hi:

¹⁶“Pai in a, Susa khuapi sungah a om Jew mi theampo khawm in; antang in kei atu thu hong ngetsak tavun. Sun thum le zan thum sung an ahizong tui ahizong bangma ne heak vun. Ka khangmoi numeite le keima zongh tuabang ma in ka na vawt tu uh hi. Tua zawkciang, upadi bang ahibuatazong kumpipa kungah ka pai tu hi. Tuabang ka pai hu in ka thi a kul le zong a thi ka hi tu hi” ci hi.

¹⁷Tuasia ciang Mordecai in tua mun nusia in, Esther ii vawt tu a sawl theampo vawt hi.