Read Siyin Chin Esther 5 Bible Online

Esther 5 - Siyin Chin bible

Esther 5

¹A antan ni thum ni ciang Esther in a kumpinu puantual silh a, kumpi inn suum sungnung ah pai in, kumpi tokhum omna inndoi sang maingat in ding hi. Kumpipa sia a sungsang tokhum tungah to in kongbiang maingat hi.

²Kumpipa in Esther kumpinu doipua sangah ding a mu ciang maipha pia in ama sangah a khamh ciangkhut laamto hi. Tuasia ciang Esther hong paito in, tua ciangkhut dawn len hi.

³Kumpipa in dongh a, “Esther kumpinu awng, bang ziam? Na dei sia hong son tan — ka ukna ngam a lang keak ahizong nga tu ni hi,” ci hi.

⁴Esther in, “Kumpipa awng na lung a kim nale, noma atu in ka vawt anneakpoai ah ka leangna in nangma le Haman tu nitak hong haw le uhte uuk khi hi,” ci in zo hi.

⁵Tuasia ciang Esther ii leangna tu in kumpipa in Haman manlang tak a pai natu in samsak hi. Tuabangin kumpipa le Haman sia Esther ii anneakpoai ah pai uh hi.

⁶Sapittui a neak kawmin kumpipa in Esther tungah, “Na dei sia hong son ta'n, kong pia tu hi. Ka ngam phellang keak ahizong nong ngen le kong pia tu hi,” ci hi.

⁸“Kumpipa awng, na dik a kong nget sia nong pia zo tu ahile, zing nitak ciangin noma kong ngintaakna anneakpoai dang khat ah nangma le Haman ka leangna tu in kong dei hi. Tua hun ciang ka dei sia kong son tu hi,” ci in zo kik hi.

⁹Tua anneakpoai pan Haman lungdam thinnuam in cia hi. Ahizong ama in kumpi inn kongbiang ah Mordecai mu a, ama mai a kaan ciang Mordecai in din ngawl, bangma zatakna lak ngawl ahikom Haman sia ama tungah thin uuk mama hi.

¹⁰Ahizong ama in vei kenkon in a inn ah cia hi. Tuaciang a inn ah a lawmte sam a, a zi Zeresh zongh kihelsak hi.

¹¹Ama in a hauna teng, a tapa nei teng, kumpipa ii a za a laptona thu, le kumpi ulian dangte sangin a thupi zawkna thu teng amate tungah kisuangtaak hi.

¹²Haman in, “Hi teng bek hi ngawl lai hi. Esther kumpinu in kuama dang anvaak ngeingawl a, ahizong kumpipa le keima an hong vaak a, zing ciang zong hong sam kik hi.

¹³Ahizong kumpi inn kongbiang ah a to Jew mi Mordecai ka mu lai teng hi thute theampo kei atu in khiakna nei ngawl hi,” ci lai hi.

¹⁴Tua ahiciang a zi le a lawmte theampo in, “Banghangin mihing a ki awklupsak natu in metre kul le nii a saang khuam khat vawt ngawl tu ni ziam? Zingsang ciang tuasia tungah Mordecai awklup natu in kumpipa tungah na ngen tu a, tua zawkciang lungdam takin an neakna poai ah na pai thei tu hi,” ci in ngaisutna pia uh hi. Haman in hi ngaisutna phasa ahikom a awklupsak natu in khuam phut hi.