Read Siyin Chin Esther 7 Bible Online

Esther 7 - Siyin Chin bible

Esther 7

¹Tua ahiciang Esther taw an nekhawm tu in kumpipa le Haman sia,

²a nii veina pai uh hi. Sapittui a neak kawmin kumpipa in Esther thu dongh kik a, “Tu in Esther kumpinu awng, bang dei ni ziam? Hong son po ta'n, kong pia tu hi. Kumpi ukna ngam phellang keak ahizong hong pia tu khi hi,” ci hi.

³Esther kumpinu in, “Kumpipa na lung a kim a, kiniamkhiakna taw kong ngetna nong pia zo tu le, keima le ka mite hong nungtasak thei lete uuk khi hi.

⁴Ka mite le keima, thalup tu in hong kizuak zo hi. Saltaang tu in hong kizuak hi zaw le, pau ngawlin ka om lel tu a, kong nawngkaisak buatu hi, ahizong kote hong kithatlum — hong kimon tu hi zo hi!” ci in zo hi.

⁵Tuasia ciang Xerxes kumpipa in Esther kumpinu awng, “Tua bangte akua in vawt ngam tu ziam? Hisia pa koisungah om ziam?” ci in dongh hi.

⁶Esther in, “Kote ii ngal le kote hong vawtsia pa sia, hi mihing tatsia Haman hi!” ci in zo hi. Haman sia kumpipa le kumpinu maitang salh a lau citakin lau hi.

⁷Kumpipa a thinso sa in dingto a, inndoi sung pan pusuakin doi puasang kumpi huan sungah pai hi. Kumpipa in hi thu hangin daan a piak hunlam Haman in mu thei ahikom Esther kumpinu tungah a nuntak natu hesuak ngen nuam in nungsang ah taanglai hi.

⁸Haman in hesuak ngen tu in Esther tona ah a to suk bek laitakin huan sung pan kumpipa inndoi sungah hong sungtang kik hi. Hi bang a mu ciang kumpipa au in, “Hisia pa in ka kumpi inn sung hi lai, keima mai tatak ah kumpinu buanin khialpui nuam ziam?” ci hi. Kumpipa ii a kampau a man ma in numei uk cil kingette in Haman lutang puan khu uh hi.

⁹Tua zawkciang Harbonah a kici te sung pan khat in, “Kumpipa nangma nuntakna a hu Mordecai a awklupsak thei natu in, a khuam ngawngawn Haman in a inn ah phut zo hi, tuasia metre kul le nii saang hi,” ci hi. Kumpipa in, “Tuasia tungah Haman awklumsak tavun,” ci in thupia hi.

¹⁰Tuabangin Mordecai atu ama ii phusa khuam sia tungah Haman ki awklumsak hi. Tua zawkciang kumpipa thin uukna thai hi.