Read Siyin Chin Esther 9 Bible Online

Esther 9 - Siyin Chin bible

Esther 9

¹Adar tha ni sawm le ni thum ni theng a, tua ni sia kumpi thu thansakna, a kisim tu ni, Jew te tung a ngalte ii ngalzo tu in a kilamet ni ahi hi. Ahizong Jew te in amate zo pumsai uh hi.

²Kumpi ukna ngamsung khuapi sim, Jew te omna khawk teng ah Jew te a ngal vawt nuam khat pawpo a sim kik tu in amate sia a kipawl sa in om hi. Koima po ah a om mite in Jew te kiita in, khat zongh in langpan ngam ngawl hi.

³A tatakin ci leang ngamke kumpi ulian theampo — ngamukmangte, zum vaihawmte le kumpi palaite — in Jew te panpui zaw uh hi, banghang ziam cile amate theampo in Mordecai kiita uh hi.

⁴Mordecai sia tu in kumpi inn sungah a vaang nei pa hi ci in, kumpi ukna ngam theampo ah a minthang a, tuaciang a vaangletna khang vaial hi.

⁵Tua ahikom Jew te in a ngalte tungah a uuk bang po in vawt thei uh hi. Amate in a ngalte namsau taw simin thatlum uh hi.

⁶Susa khuapi sung mama ah Jew te in pasal 500 thatlum uh hi.

⁷Tuate sungah Jew te ii a ngalpa, Hammedatha tapa Haman ii tapate sawm — Parshandatha, Dalphon, Aspatha, Poratha, Adalia, Aridatha, Parmashta, Arisai, Aridai le Vaizatha te kihel uh hi. Ahizong a neisa bangma kilaaksak ngawl hi.

¹¹Tua ni ma in Susa khuapi sungah mihing a kithat za kumpipa tungah thu kizasak hi.

¹²Tuaciang kumpipa in Esther kumpinu tungah, “Susa bebek ah Jew te in pasal za nga thatlum zo a, Haman tapate sawm kihel hi. Ngamke te sungah bang teng suaksak zo tu ziam! Tu in bang dei ni ziam? Na nga tu hi. Bang dang dei lai ni ziam hong son ta'n, na nga tu hi,” ci hi.

¹³Esther in, “Kumpipa awng, na lung a kim le Jew te ii tu ni Susa ah a kingamtatsak thei bangma in zing ciangin ngamta kik tahen. Tuaciang Haman tapate sawm ii luanghawmte sia ngui awkna khuam tungah khaisak in,” ci in zo hi.

¹⁴Kumpipa in Esther kumpinu ci bangin sep tu thupia a, Susa khuapi sungah thangsak hi. Haman tapate sawm ii luanghawm sia ngual muna ah kikhai hi.

¹⁵Adar tha, ni sawm le ni li ni in Susa a om Jew te kikaikhawm kikin, khuapi sungah pasal 300 that thua uh hi. Ahizong a neisa bangma laaksak tuan ngawl uh hi.

¹⁶Ngamke tuatuam sungah a om Jew te zongh kipawl in amate le amate kihuu uh hi. Amate a ngaimaw, a ngalte75,000 a thalup na taw amate le amate kihuu uh hi. Ahizong a neisa bangma laaksak ngawl uh hi.

¹⁷Tua ni sia Adar tha, ni sawm le ni thum ni hi. A zing ciang, ni sawm le ni li ni sia, kithalupna om nawn ngawl a, lungnop anneakpoai vawt ni in zangh uh hi.

¹⁸Ahizong Susa a om Jew te in sawm le thum ni le sawm le li ni in a ngalte that a, tuaciang sawm le nga ni in tawlnga ahikom ni sawm le ni nga ni sia tawlngak ni suaksak hi.

¹⁹Hi thu hangin khuanote sungah a teang Jew te in Adar tha, ni sawm le li ni sia lungdam tawlngak ni, anneakpoai vawt hun le khat le khat an letsong a kipiak hun in zangh uh hi.

²⁰Mordecai in hi thupiangte lai taw at in, Persia te ii kumpi ukna ngamsung theampo, a nai le a khuala a om Jew te tungah laithak kawkoai hi,

²¹kum simin Adar tha, sawm le li ni le sawm le nga nite sia tawlngak ni in a zak natu in son hi.

²²Tua nite sia Jew te ii a ngalte a bosak ni hi a; tua tha sia heena le thinkiamna hun pan thinnopna le lungdamna hunin a kilaih tha ahi hi. Hi ni niite ngualnopna le anneakpoai in zangh tu a, khat le khat tung le a zawngte tungah an letsong kipiakna ni in a zak natu in amate kison hi.

²³Tuabangin Mordecai ii a zaaksak thute Jew te in zui in, tua poai sia kum simin a kivawt ngeina poai suak hi.

²⁴Agag suan Jew mite ii a ngal pa — Hammedatha ii tapa Haman in Jew te mot natu a ni ciangtan tu in, (“purim” a kici) lai meetang lawnin khensat hi; Haman in Jew te mot siat tu ngeal hi.

²⁵Ahizong kumpipa kungah Esther pai a, kumpipa in thupiakna lai suaksak in, Jew te thuak tu a ngealna sia Haman tungah tu kik zaw hi. Ama le a tapate sia ngui awkna khuam tungah ki awklumsak hi.

²⁶Tua hangin tawlngak nite sia Purim kici hi. Mordecai ii laithakna hang le amate tungah thupiang teng hangin,

²⁷Jew te in amate mama atu, a suan a paalte atu, Jew a suak thei tu khat pawpo atu in hi ni niite kum simin Mordecai thupiak bangin a hun maan in a kitan natu ngeina khat in vawt uh hi.

²⁸Jew te innkuan simin, khang khat zawk khang khat, ngamke le khuapi theampo ah hi Purim ni te phawk a, a tan tawntung tu in khensat hi.

²⁹Tua zawkciang Abihail tanu, Esther kumpinu zongh in Mordecai taw laithak khat zongh at khawm a, Mordecai ii a at sa Purim thu teng nung pan ama thuneina bup omsak hi.

³⁰Tua Esther laithak sia Jew te theampo tungah thak a, Persia te ii kumpi ukna ngamsung ngamke 127 ah kihawm hi. Tuasia in Jew te ii kilem natu le ngammuan natu deisak a,

³¹amate ii an tanna le khuangai hunte atu in ngeina a neisa bangin, Purim poai nite sia amate le a suan a paalte in a hun maan in a tan natu lamlak hi. Hi thu sia Mordecai le Esther kumpinu ii a piakkhop thupiakna ahi hi.

³²Purim poai taw kisai zui tu ngeinate a kipsak Esther ii thupiakna sia laizial khat sungah ki at hi.