Read Siyin Chin Pusuana 11 Bible Online

Pusuana 11 - Siyin Chin bible

Pusuana 11

¹Tuaciang TOPA in Moses tungah, “Egypt kumpipa le a mihingte tungah khatvei bek daan ka pia lai tu hi. Tua zawkciang note hong paisak tu hi. A tatakin ci leang ama in, hi lai pan note theampo hong hawlkeak tu hi.

²Tu in Israel mite theampo in a innpaamte tungah khamh le ngunn suangmanphate a nget natu in son ta'n,” ci hi.

³TOPA in Israel te sia Egypt te in zaktasak hi. Uliante le mihingte theampo in Moses sia mi thupi mama khatin ngaisun takpi uh hi.

⁴Tuaciang Moses in kumpipa tungah, “TOPA in, ‘Zankim hun khawngin Egypt ngamsung teng ah ka pai tu a,

⁵Egypt te tapaciil theampo, kumpi tokhum a lua tu, kumpipa tapa a kipan an ngoaina ah naseam sila numei ii tapa dongin thi tu hi. Nganhing a no suakciil theampo zongh thi tu hi.

⁶Nidangin a om ngeingawl le mai sangah a om kik ngei nawn ngawl tu kaana awnging Egypt ngamsung theampo ah om tu hi.

⁷Ahizong Israel te ahibuale, a ngannote ahile ui ngawngawn in nak ngawl tu hi. Tuasia ciang Keima TOPA ii Egypt te le Israel te kilaklaw ah kilamdanna khat ka vawt na he tu uh hi, hong ci hi,” ci hi.

⁸Moses ii a thukhupna panin, “Na ulian theampo hong pai tu a, ka mai ah kunin ka mite theampo ka paipui natu in hong thuum tu hi. Tua zawkciang ka pai tu hi,” ci hi. Tuaciang Moses thin uuk mama in kumpipa nusia hi.

⁹TOPA in Moses tungah, “Egypt ngam sungah nalamdang lakna tamzaw ka vawt thei lai natu in kumpipa in na thu hong ngai ngawl veve tu hi,” a ci sa hi.

¹⁰Moses le Aaron in kumpipa mai ah nalamdang hi zata lak zo hikale, TOPA in a thin sahsak ahikom, a ngam sia Israel te in nusiasak nuam ngawl hi.