Read Siyin Chin Pusuana 12 Bible Online

Pusuana 12 - Siyin Chin bible

Pusuana 12

¹Egypt ngam sungah TOPA in Moses le Aaron tung a cina ah:

²“Tu tha sia note atu in kum kipat tha hi tu hi.

³Israel mi bup tungah hi bang kihilna te son tu ni hi: Tu tha ni sawm ni in pasal sim in tuuno khat ahibuale kealno khat a innkuan atu in teal nanak tu hi.

⁴Nganno pum bup khat a ne tu in a innkuan a tawm leih le, mihing khat ii neak zawkza taw kizui in mihing phaza en in a innpaamte hawm thei tu hi.

⁵Nganno sia kum khat a pha, a talno na teal thei tu a, ahihang a mealhem ngawl tuu ahibuale keal hi tu hi.

⁶Tuaciang tua tha ni sawm le ni li nitak ciang Israel mi bup in tua ngante ngo tu uh hi.

⁷Mipite in a chisan pawlkhat la in, tua sa a kineak natu inn kongkha khuamte nii le a vathaang tungah noai tu nu hi.

⁸Tua zanin a sa na em tu uh a, tol saw ngawl anluum le a kha meeteete taw na ne tu uh hi.

⁹A sate a sial ahizong tuihuan ahizong na ne buatu uh a, a lu, a peangte le a sungkua dong takin a vekpi em in ne tu nu hi.

¹⁰Zingsang dongin neakmong peuma na omsak buatu uh hi; neakmong a om le na hal kul tu hi.

¹¹Hi ante manlang takin na ne tu uh hi, banghang ziam cile khualhaw tu in peangdapte thua in, na khut sungah ciangkhut toai a, na kithoai uh kul tu hi. Tua in keima TOPA tungah zatak piakna Paisan Poai ahi hi.

¹²“Tua zanin Egypt ngamsung tengah ka pai tu a, mihing le nganhing te ii tapaciil teng thatin, Egypt pathian theampo daan ka pia tu hi. Keima in TOPA ka hi hi.

¹³Kongkha khuamte tungah chisan a kinoai teng noma teenna inn teptee natu lim ahi hi. Chisan ka mu ciang note kong kaantan tu a, Egypt te daan ka piak ciang note bangma kong law buatu hi.

¹⁴Keima TOPA in bang vawt khi ziam ci na phaw natu in hi ni sia biaknapoai khatin vawt tu nu hi. Mailam hun theampo ah tua poai vawt suak tavun,” ci hi.

¹⁵TOPA in, “Ni sali sung tol kisaw anluum peuma na ne buatu uh hi — tol kisaw ngawl anluum bekma na ne tu uh hi. Ni masa ni in na inn uh pan tol theampo heam tu nu hi, banghang ziam cile tua ni sali hunsung khat po in tol kisaw anluum a ne le, ama keima mi in a kisim nawn buatu hi.

¹⁶Ni masa ni le ni sali ni in biak kikhopna nei tu nu hi. Tua ni nii sung, na na seam buatu uh a, ahizong an neak tu vawt thei nu hi.

¹⁷Hi poai bosak ngawl tu nu hi, banghang ziam cile tua ni in na minamte Egypt pan kong pusuapui hi. Mailam hun ah zongh tua ni in poai vawt nanak tu nu hi.

¹⁸Tha masabel ni sawm le ni li nitak pan ni kul le ni khat nitak sang dong tol kisaw anluum ne ngawl tu nu hi.

¹⁹Ni sali sung tol peuma na inn sungah koi ngawl tu nu hi, banghang ziam cile tualmi ahizong, ngamdangmi khat pawpo in tol kisaw anluum a ne le keima mi khat in kingaisun nawn ngawl tu hi,” ci hi.

²⁰

²¹Moses in Israel lampui teng samin amate tungah, “Na innkuan tek in Paisan Poai na vawt thei natu in, tuuno khat ahibuale kealno khat tealin ngo vun.

²²Hyssop sip khat la vun a, kuang sungah a om nganhing chisan sungah papin, na inn kongkha khuamte nii le a vathaang tungah noai vun. Zingsang khuavak mateng inn pan khat zongh pusuak ngawl tu nu hi.

²³Egypt te a that tu in Egypt ngamsung teng ah TOPA a pai ciang, kongkha khuamte le a vathaangte tungah a kinoai chisan mu tu a, Thina ii Vantunglalang sia na inn te sungah hong that tu in tumsak ngawl tu hi.

²⁴Hi zui tu ngeinate nangma le na tate in a tawntung zui tu nu hi.

²⁵TOPA ii kamciam hong piakna ngam ah na tum uh ciang hi a zeksa ngeina sia seam hamtang tu nu hi.

²⁶Na tate in, ‘Hi, a zeksa ngeina sia, bang a khiakna ziam’ ci in hong dok ciang,

²⁷‘TOPA tungah zatakna in ih piak Paisan Poai sangaw biakpiakna hi, Egypt ah Israel te ii innte hong paisatna hang ahi hi. Ama in Egypt te that a, ahizong eite hong khoaikhe hi,’ na ci tu uh hi,” ci hi. Israel mite in khupdin in bia uh hi.

²⁸Tua zawkciang TOPA ii Moses le Aaron tungah a thupiak bangin amate pai in seam uh hi.

²⁹Zankim laitak TOPA in Egypt ngamsung tapaciil theampo, kumpi tokhum a lua tu kumpipa tapa pan kipan leinuai khuazing sung thongtaakte ii tapate dongin that siat a; nganno suakciil theampo zongh that hi.

³⁰Tua zanin kumpipa, a uliante le a dang Egypt mite theampo khanglo siat hi. Tapa thi ngawl inn khat beak om ngawl ahikom Egypt ngamsung teng ah kaana awnging nasia mama hi.

³¹Tua zan ma in kumpipa in Moses le Aaron samsak in, “Nangma le na Israel mite pusuak tavun! Ka ngam nusia tavun a; nong nget bangin pai in, TOPA bia tavun.

³²Na tuu, na keal le na khuite la in pai tavun. Kei atu zongh thupha hong ngetsak tavun,” ci hi.

³³Egypt te in a ngam manlang tak a nusiat natu in tua mite sawl a; “Na pai bua uh ahile ka thi siat tu uh hi,” ci uh hi.

³⁴Tua ahiciang Israel te in tol saw ngawl anvuite anluum emna bealpeute sungah heangin, puan taw tunin a liangko ah pua uh hi.

³⁵Moses ii a ci bangin Israel te in Egypt te tungah khamh le ngunn kizepna, le puansilhte ngen uh hi.

³⁶TOPA in Israel te sia Egypt te in zaktasak ahikom Israel te nget bangin pia uh hi. Tuabangin Egypt te hauna teng Israel te in paipui uh hi.

³⁷Israel te a peangin pai a, Rameses pan Sukkoth zuan uh hi. Amate numei le patang kihel ngawl pasal tulzaluk bang pha hi.

³⁸Midang tam mama le tuu, keal le khui tam mama te zongh amate taw paikhawm uh hi.

³⁹Amate in Egypt pan a ken tol saw ngawl anluum em uh hi, banghang ziam cile thakhat thu in amate Egypt pan kihawlkeak ahikom a an neak tu ahizong tol saw anluum ahizong kinging man ngawl uh hi.

⁴⁰Israel te Egypt ah kum 430 sung teang hi.

⁴¹Kum 430 a bo ni in TOPA mite ii minam theampo in Egypt nusia uh hi.

⁴²Tua zan sia amate Egypt pan pusua pui tu in TOPA ii kep ni zan hi a; tua zan sia ma Israel te ii mailam hun theampo ah a kepcing nanak tu zan khat in TOPA tungah aap uh hi.

⁴³TOPA in Moses le Aaron tungah, “Hite Paisan Poai ah zui tu ngeinate ahi hi: Ngamdangmite kuama in Paisan Poai an ne thei ngawl tu hi,

⁴⁴ahizong na leisa sila pawpo a vunteap atsak masa po le uhte ne thei tu hi.

⁴⁵A peam pak khat, a kicial naseam khat in ne thei ngawl tu uh hi.

⁴⁶An theampo a kihuanna inn sung bek ah kine tu a; a pua ah kipusua pui ngawl het tu hi. Tuaciang tua nganno ii ngute khat zongh thiaktan heak vun.

⁴⁷Israel mi bup in hi poai vawt tu a,

⁴⁸ahizong vunteap at ngawl sia in ne thei ngawl tu hi. Note sungah hong teang ngamdangmi khat in TOPA zatakna Paisan Poai a vawt nuam le amate innkuan sung pan pa peuma vunteap atsak masa tu nu hi. Tuasia ciang Israel mi tualsuak khat taw a kibangin poai sungah kihel thei tu hi.

⁴⁹Hi zui tu ngeinate sia ma, Israel mi tualsuakte le note sungah hong teang ngamdangmite a kibangin na zui tu uh ahi hi,” ci hi.

⁵⁰TOPA ii Moses le Aaron tungah a thupiak bangin Israel te theampo in thu ni in, seam uh hi.

⁵¹Tua ni in, TOPA in Israel minamte Egypt pan pusuapui hi.