Read Siyin Chin Pusuana 14 Bible Online

Pusuana 14 - Siyin Chin bible

Pusuana 14

¹Tuaciang TOPA in Moses tungah,

²“Israel te heak kikin Baal Zephon nai, Migdol le San Tuipi kilaklaw Pi Hahiroth ii mai ah ngiaphual a saatna tu in son in.

³Kumpipa in Israel te ngam sungah vak kawkoai a, senneal in khakcip in ngaisun tu hi.

⁴Ama thin ka sahsak tu a, nang hong del tu hi. Kumpipa le a ngalkaphonpi ka zawna pan pataakna ka nga tu hi. Tuasia ciang Egypt te in TOPA ka hina hong he tu uh hi,” ci hi. Israel te a kisawl bangin ngamta uh hi.

⁵Israel te a suatakna thu Egypt kumpipa tungah a kison ciang ama le a uliante a thin khealin, “A bang teng seam thong hi ziam? Israel te ih suaktasak zo a, ih sila te ih bosua zo hi!” ci uh hi.

⁶Kumpipa in siphu ngalleang le a ngalkaphonpi kithoaisak hi.

⁷Ama in a siphu ngalleang phabel 600 kihel in a leang theampo taw a ngalkapmangte in uksakin kuan uh hi.

⁸TOPA ii a thin a sahsak kumpipa in zawna taw in a pusuak Israel te del hi.

⁹Egypt ngalkaphonpi in a siphu theampo taw, siphu ngalleangte le a hawlte in Israel te del a, Pi Hahiroth le Baal Zephon nai San Tuipi hui a ngiaphual saatna ah pha uh hi.

¹⁰Israel te in kumpipa le a ngalkaphonpi in a del a mu ciang lau mama a, TOPA tungah huna ngen in au uh hi.

¹¹Amate in Moses tungah, “Egypt ah thaan om ngawl ziam? Hi lai sennealngam ah a thi tu in nang hong paipui kul ziam? Egypt pan nong pusuapuina, na nasepna sa teng en in!

¹²Ih pusua ma in, hi bang teng piang tu ci hong son zo hi ngawl khu ziam? Egypt te sal ahi tan tu in ko nguak hong nusia lel ta'n kong ci uh hi. Hi lai sennealngam ah thi sangin tua munah sila hi tu phazaw lai hi,” ci uh hi.

¹³Moses in, “Lau heak vun! Kip takin ding vun a, tu ni in TOPA hong hutna mu tu nu hi; hi Egypt te mu kik ngeingawl tu nu hi.

¹⁴TOPA in no atu ngal hong simsak tu a, note sep tu bangma kisam ngawl hi,” ci in zo hi.

¹⁵TOPA in Moses tungah, “Banghangin huna dei in au nu ziam? Israel te maisang a pai natu in sawl in.

¹⁶Na ciangkhut laamin, tuipi tungah vaan in. Tui hong kikhen tu a, Israel te leiko tung tawnin paisuak thei tu uh hi.

¹⁷Egypt te thin ka sahsak mama tu a, Israel te del veve tu uh hi, tuaciang kumpipa, a ngalkaphonpi, a siphu ngalleangte le a hawlte ka zawna taw patoaina ka nga tu hi.

¹⁸Amate ka zaw ciang Egypt te in keima TOPA ka hina hong he tu uh hi,” ci hi.

¹⁹Israel ngalkaphonpi mai ah a om Pathian vantunglalang sia kikhiin in nungsangah pai hi. Meeikaai khuam zongh

²⁰Egypt te le Israel te kilaklaw dong hong kikhiin hi. Meei in Egypt te atu in khuazingsak a, Israel mite atu in khuavaksak ahikom zankhuateakin ngalkaphonpite khat le khat kineak thei ngawl uh hi.

²¹Moses in tuipi tungah a khut a vaan ciang, TOPA in nisuana sang pan vui thahat khat taw tuipi kinilsak hi. Tua vui sia zankhuateak va in, tuipi leiko suaksak hi. Tui kikhen a,

²²Israel te in leiko tung tawnin tuipi kaantan a, a lang le a lang ah tui pangte hong om hi.

²³Egypt te in a siphu theampo, a siphu ngalleangte le a hawlte taw tuipi sung dongin del uh hi.

²⁴TOPA in khuavak mahiat in meitaang le meeikaai khuam tung pan Egypt te ensuk in, patausak ek hi.

²⁵TOPA in a ngalleang muite awksak ahikom haksa takin kikhiin hi. Egypt te in, “TOPA in Israel te sang pangin eite hong do hi. Hi lai pan tai tawng,” ci uh hi.

²⁶TOPA in Moses tungah, “Tuipi tungah na khut vaan in, tua hile Egypt te le a siphu ngalleangte le a hawlte tungah tui hong kinil kik tu hi,” ci hi.

²⁷Tua ahiciang Moses in tuipi tungah a khut vaan a, khuavak ciang tui hong heak kikin a ngeina bangin om hi. Egypt te in a suatak natu hanciam a, ahizong TOPA in tuipi sungah amate lawn hi.

²⁸Tui heak kikin tuipi sung dongah Israel te a del Egypt ngalkap theampo, a siphu ngalleangte le a hawlte khuum hi; khat zongh kikhe ngawlin khuum siat hi.

²⁹Ahizong tuipi kaantan in leiko tungah Israel te pai uh a, a lang le a lang ah tuipangte om hi.

³⁰Tua ni in TOPA in Egypt te khut sung pan Israel mite hun a, tuipivaal ah a thite Israel te in mu uh hi.

³¹Vaangletna lianpi taw TOPA in Egypt te a zawna thu Israel te in a mu uh ciang amate in TOPA lamdang sa a; TOPA le a naseampa Moses muanna nei uh hi.