Read Siyin Chin Pusuana 16 Bible Online

Pusuana 16 - Siyin Chin bible

Pusuana 16

¹Israel mi buppi Elim pan ding kik a, Egypt pan a pusua zawk a tha niina, ni sawm le ni nga ni in Elim le Sinai kilaklaw Sin sennealngam theng uh hi.

²Tua sennealngam ah amate theampo in Moses le Aaron phunsan a,

³amate tungah, “TOPA in Egypt ah hong that le uuk zaw ung. Tualai ah thildang a vaal lai, to in sa le an ka du za ka ne thei tu uh hi. Ahizong noma in hi lai sennealngam ah a pukthi tu in hong paipui nu hi,” ci uh hi.

⁴TOPA in Moses tungah, “Tu in note theampo atu van pan an, ngua bangin kong zusak tu hi. Mihingte ni sim pusuak nanak in tua ni a khamkhop tu tawm tu hi. Tuabangin, kong sonnate a zui ziam, ka sit thei tu hi.

⁵Ni luk ni in, na top ngeiza ii a zaa nii kaikhawm tu in kinging vun,” ci hi.

⁶Tua ahiciang Moses le Aaron in Israel te theampo tungah, “Egypt pan hong pusuapuipa sia TOPA a hina, tu nitakin he tu nu hi.

⁷Zingsang ciangin TOPA ii ompuina khuavak taang velvol mu tu nu hi. Ama langpanin noma phutsatna thu hong za zo hi — hi hi, ama langpan nu hi, banghang ziam cile kote in ama hong sawlna teng a seam suak ka hi bek uh hi,” ci hi.

⁸Tua zawkciang Moses in, “Noma phutsatna teng ama in hong za zo ahikom, nitakin na neak tu uh sa le zingsangin anluum na deiza po hong pia tu sia TOPA ahi hi. Ko nong phutsat uh ciang TOPA a phunsan hi nginge nu hi,” ci hi.

⁹Moses in Aaron tungah, “TOPA in amate phutsatna za zo ahikom taangpi bup hong pai in TOPA mai ah a din natu in son ta'n,” ci hi.

¹⁰Aaron in taangpi bup tungah thu a son ciang amate sennealngam sang nga in, thakhat thu in meei sung pan TOPA ii khuavak taang velvol hong taang hi.

¹¹TOPA in Moses tungah,

¹²“Israel te hong phutsatna ka za zo hi. Khuangial ciang a neak tu sa a nga natu, zingsang ciang anluum a deiza a nga natu son in. Tuasia ciang Keima sia TOPA, amate ii Pathian ka hina thu he tu uh hi,” ci hi.

¹³Nitak ciangin ngiaphual a dim tu vamim honpui khat hong leangin, zingsang in ngiaphual kiimkot ah daaitui kia hi.

¹⁴Daaitui a ko ciang senneal tungah a khalno bang veu om hi. Tua in nip a, vuuk taw kibang hi.

¹⁵Israel te in tuasia a mu ciang he ngawl ahikom khat le khat kidongh in “Hisia bangziam?” ci uh hi. Moses in amate tungah, “Hisia in TOPA ii note neak tu in hong piak an ahi hi.

¹⁶TOPA in noma kisap za tek, innkuan sungah mihing sim litre 2 tek na top tu in thu hong pia zo hi,” ci hi.

¹⁷Israel te in tuabang vawt a, pawlkhat in a tamzaw tawmin, pawlkhat in a tawmzaw tawm uh hi.

¹⁸Amate in a tee uh ciang tam a tawmte tam leih ngawlin, tawm zaw a tawmte tawm leih tuan ngawl hi. Amate ii kisap za lian tek tawm uh hi.

¹⁹Moses in amate tungah, “Kuama in zing ciang atu bangma koikhol ngawl tu nu hi,” ci hi.

²⁰Ahizong pawlkhat in Moses thu ngai ngawlin pawlkhat koikhol uh hi. A zing ciang tuasia thanh dimin muat nam a, amate tungah Moses thin uuk hi.

²¹Zing simin a kisap za tek tawm a, ni hong sat ciang lei ah a nusiatte tuitham hi.

²²Ni luk ni in an a zaa nii in a tamzaw tawmin, mihing khat ciang litre 4 tek tawm uh hi. Taangpi lampuite theampo hong pai in tua thu Moses tungah son uh hi,

²³Moses in amate tungah, “TOPA in zing ciang sia ama tungah a ki aap tawlngakna ni thiangtho ni khat hi, ci in thu hong pia hi. Tuni in na em nop teng le na huan nop teng em in huan tavun. A taanglai teng peuma zing ciang atu in koituam vun,” ci hi.

²⁴Moses ii thupiak bangin a om lai teng zing ciang dongin keam a; lal ngawl, a sungah thanh tu ngawl hi.

²⁵Moses in, “Hite tuni in ne vun, banghang ziam cile tuni sia Sabbath hi a, TOPA tungah a ki aap tawlngakna ni khat hi in, ngiaphual pua sangah an bangma mu ngawl tu nu hi.

²⁶Ni luk sung an na tawm nanak tu uh a, ahizong ni sali ni, tawlngak ni in bangma om ngawl tu hi,” ci hi.

²⁷Ni sali ni in mihing pawlkhatte in an a tawm tu in pusuak a, ahizong bangma mu ngawl uh hi.

²⁸Tuaciang TOPA in Moses tungah, “Banghun dong ka thupiakte note in hong nial lai tu nu ziam?

²⁹Tawlngak ni hong pia pa sia keima TOPA ka hina phawk tavun a, tua ahi hu in ni nii sung na khom tu uh an, ni luk ni in kong pia tawntung tu hi. Ni sali ni in a kuama po a omna munah om tu a, inn pan pusuak ngawl tu hi,” ci hi.

³⁰Tua ahiciang mite in ni sali ni in naseam ngawl uh hi.

³¹Israel mite in tua an sia manna ci uh hi. Tua manna sia ancii kaang no khat taw kibangin, khuaitui taw kivawt moh bangin lim hi.

³²Moses in, “Ama ii Egypt pan eite hong paipui ciangin sennealngam ah eite neak tu hong piak an sia ih suan ih paalte in a mu thei natu in manna pawlkhat amate atu na keam tuam tu uh hi, ci in TOPA in thu hong pia hi,” ci hi.

³³Moses in Aaron tungah, “Beal khat la in, tua ii sungah manna litre 2 dim koi in a, ih suan ih paalte atu in TOPA ompuina ah koi ta'n,” ci hi.

³⁴TOPA in Moses tungah a thupiak bangin tuasia a kikepcing natu in Aaron in Thuciamna Thingkuang mai ah koi hi.

³⁵Israel te in a teenna mun Canaan ngam a thet mateng kum sawmli sung manna an ne uh hi.

³⁶(Tua hun lai, na ko teena in a zak sia litre 20 taw kikim hi.)