Read Siyin Chin Pusuana 17 Bible Online

Pusuana 17 - Siyin Chin bible

Pusuana 17

¹Israel mi bup in Sin sennealngam nusia in TOPA thupiak bangin mun khat pan mun khat ah kikhiin uh hi. Rephidim ah ngiaphual saat a, ahizong tua munah neak tu tui om ngawl hi.

²Amate in Moses tungah, “Neak tu tui hong pia ta'n,” ci in phun uh hi. Moses in, “Banghangin hong phunsan nu ziam? Banghangin TOPA ze et nu ziam?” ci hi.

³Ahizong a mihingte dangko mama ahikom Moses tungah phuul veve uh hi. Amate in, “Banghang Egypt pan hong paipui ni ziam? Kote ka tate le ka ngannote dangko in hong thisak nuam ni ziam?” ci uh hi.

⁴Moses in nasia takin TOPA tungah thungen in, “Hi mihingte bang law tu khi ziam? Suang taw hong deang dektak zo uh hi,” ci hi.

⁵TOPA in Moses tungah, “Israel lampuite pawlkhat samin a, mipite mai ah paikhol vun. Nile ngun na saatna ciangkhut keng in.

⁶Na mai Sinai Mual suangpi tungah ka ding tu hi. Suangpi saat in, tua hile mihingte neak tu tui hong pusuak tu hi,” ci hi. Israel lampuite mai ah tuabangin Moses in vawt hi.

⁷Tua mun sia Massah le Meribah ci hi, banghang ziam cile Israel te in phun in TOPA ze et a, “TOPA eite taw om ziam, hong ompui ngawl ziam?” ci in, a dokna mun ahi hi.

⁸Amalek mite hong pai in Rephidim ah Israel te sim uh hi.

⁹Moses in Joshua tungah, “Zing ciang Amalek mite a do tu in mi pawlkhat teal in. Kei sia mual dawnah ka ding tu a, Pathian ii keng a hong sawl ciangkhut ka toai tu hi,” ci hi.

¹⁰Moses thupiak bangin Joshua in Amalek mite do tu in a kuan hunsung in Moses, Aaron le Hur te mual dawnah kaato uh hi.

¹¹Moses ii a khut a lap hunsung theampo Israel te in ngalzo a, ahizong a khut a khiaksuk ciang Amalek mite in zo tu in kipan uh hi.

¹²Moses ii khut a toi ciang Aaron le Hur in a to natu in suangtum khat laaksak in amate a lang le a lang ah dingin nitum dong a khutte lapsak uh hi.

¹³Hi bangin Joshua in Amalek mite zo siat hi.

¹⁴Tuaciang TOPA in Moses tungah, “Hi ngalzawna thu teng a kiphaw natu in tepteena lai at in. Amalek mite ka mot natu thu Joshua tungah son in” ci hi.

¹⁵Moses in biaknatau khat sa a, a min phuakin, “TOPA sia ka Zawna Dial hi “Jehovah Nissi” ci hi.

¹⁶Ama in, “TOPA zawna dial saangkhai vun! TOPA in Amalek mite a tawntungin do suak tu hi!” ci hi.