Read Siyin Chin Pusuana 19 Bible Online

Pusuana 19 - Siyin Chin bible

Pusuana 19

¹Israel mite in Rephidim nusia a, tuaciang Egypt a nusiat zawk a tha thumna, ni masabel ni in, Sinai sennealngam theng uh hi. Tualai Sinai Mualpeang ah amate in ngiaphual saatin,

³Pathian taw kimu tu in mual tungah Moses kaato hi. TOPA in mualtung pan Moses samin, Jacob suan le paal Israel te tungah hi bang na son tu hi ci hi:

⁴“Keima, TOPA in Egypt te tungah ka vawtte le muvanlai in a note a tha tungah a puak bangin note hi munah kong puak mu nu hi.

⁵Tu in ka thu hong ni in ka thuciamnate na zui uh le keima aituam mite hi tu nu hi. Leitung buppi keima aa hi a, ahizong note sia keima tealtuam mite na hi tu uh hi,

⁶keima tung bek ah hong ki aap minam khat na hi tu uh a, thiampite bangin ka na nong seam tu uh hi.”

⁷Tua ahiciang Moses tuaksuk a mipi lampui teng khawmin TOPA thupiak theampo sonsiat hi.

⁸Tuasia ciang mi theampo in, “TOPA ii ci theampo seam tu khu hi,” ci in zo a, Moses in TOPA tungah hi a zona thu teng puak hi.

⁹TOPA in Moses tungah, “Nangma taw ih kipaupuinate mipite in a zaak natu le tu pan kipan nang hong up natu in meeilom saa khat taw kong pai tu hi,” ci hi. Mipite zona sa teng Moses in TOPA tungah son a,

¹⁰TOPA in ama tungah, “Mipite kungah va pai ta'n a, biakna pia tu in tuni le zing ciang a kithiansua natu in son in. A puante sawp hamtang in,

¹¹thai ciang atu kingingkhol sa in om hen. Tua ni in Sinai Mual ah kong tuaksuk tu a, tualai ah mi theampo in hong mu thei tu uh hi.

¹²Mipite ii a kaantan ngawl natu in mual kiimkot ah ngamngi tepteena khat vawt tavun a, mual tungah kaato ngawl, tuasia nai zongh a neak ngawl natu in son ta'n. Khat po in tuasia tung a siik le tua pa kithatlum tu hi;

¹³ama kuama in thutha ngawl tu a, suang taw kideanglum ahibuale thal taw kikaplum tu hi. Hi thu in mihingte le nganhingte huam khawm a; tuate kithatlum nanak tu hi. Ahizong lemle hong kitum ciang mipite mual tungah kaato tu uh hi,” ci hi.

¹⁴Tuasia ciang mual tung pan Moses tuaksuk a, biakna vawt tu in mite kithoaisak hi. Tua ahiciang amate a puan uh sawp hi,

¹⁵tuaciang Moses in amate tungah, “Thai ciang atu kinging khol tavun a, hi hun sungin numei le pa omkhopna nei heak vun,” ci hi.

¹⁶A ni thum ni zingsang ciang vanto in khualeng a, mual tungah meeilom saa khat hong kilangh in lemle aw nging mama khat kiza hi. Ngiaphual ah a om mihing theampo liingin lau uh hi.

¹⁷Moses in amate, Pathian taw kimu tu in ngiaphual pan pusua pui a, mualpeang ah amate ding uh hi.

¹⁸Sinai Mual buppi meikhu in siincip hi, banghang ziam cile TOPA tua mualtung ah mei sungah hong tuaksuk hi. A khu sia mei phualpi khu bangin kaato in, mi theampo liinglawng ngawp uh hi.

¹⁹Lemle aw hong nging vaial hi. Moses in paupui a, Pathian in vanto taw in zo kik hi.

²⁰Sinai Mualdawn ah TOPA hong tuaksukin, mualdawn ah Moses sam hi. Moses kaato a,

²¹TOPA in ama tungah, “Keima en tu in mite hong pai ciang ngamngi tepteena a kan ngawl natu in paisuk in va son ta'n; tuasia hong kan le tam mama thi tu hi.

²²Kei kung hong pai tu thiampite zongh a kithiansua phot kul tu hi, a kithiansua buale daan ka pia tu hi,” ci hi.

²³Moses in TOPA tungah, “Mipite hong paito thei ngawl tu hi, banghang ziam cile nangma in mual sia thiangtho hi ci in ngaisut tu le tua ii kiimkot ah ngamngi tepteena khat vawt tu in thu nong pia hi,” ci hi.

²⁴TOPA in, “Tuaksuk ta'n a, Aaron hong paipui kik ta'n. Ahizong thiampite le mipite in kei kungah paito tu in tua ngamngi kaan ngawl het tu hi, tuabang a kaantan le amate daan ka pia tu hi,” ci in zo hi.

²⁵Tuasia ciang mipite kungah Moses tuaksuk a, TOPA ii ci teng amate tungah son hi.