Read Siyin Chin Pusuana 2 Bible Online

Pusuana 2 - Siyin Chin bible

Pusuana 2

¹Tua hunsung in Levi minamte pasal khat in ama minampui numei khat teenpui a,

²tua nu in tapa khat neipui hi. A tasen bangza in pha cisia a nu in a mu ciang tha thum sung a tapa phual hi.

³Ahizong a nu in a tapa a phual zawk nawn ngawl ciangin, pumpa taw kivawt khum khat la in, tui a tum thei ngawl natu in, kattaza taw zut hi. A nu in tuasung ah nauno sialin, ngunhui lopa thukna ah koi hi.

⁴Nauno ii suapuinu in a khuala thithimna ah dingin, bang a tat ziam ci in en hi.

⁵Kumpipa tanu kibual tu in ngun sungah tuak hi, tua laitakin a naseamte ahile ngundung ah vak uh hi. Thakhat thu in ama in lopa thukna ah a om tua khum mu a, a sila numei khat tua khum la tu in sawl hi.

⁶Kumpipa tanu in tua khum hong a, nausen pano khat mu hi. Tua nauno kakap ahiciang ama in khuangaihuai sa hi. Ama in, “Hi sia Hebrew nausen khat hi ta a,” ci hi.

⁷Tuasia ciang nauno suapuinu in, “Hi nauno a omh tu in, Hebrew nupi khat kong sam tu ziam?” ci in tua nu dongh hi.

⁸Kumpipa tanu in, “Hesuakna taw hong sapsak ta'n,” ci in zo hi. Tuaciang numeino sia pai in nausen ii a nu hong paipui hi.

⁹Kumpipa tanu in tua nu tungah, “Hi nausen la in a, kei atu in hong opsak ta'n, na thaman kong pia tu hi,” ci hi. Tua ahiciang tua nu in nausen la a, opsak hi.

¹⁰Patang hong khan ciang, a nu in kumpipa tanu kungah paipui a, kumpipa tanu in ama tapa sua hi. Kumpipa tanu in, “Tui sung pan ka laak ahiciang a min Moses ka phuak hi,” ci hi.

¹¹Moses hong let ciang, a mipui Hebrew te kungah haw in, zawthawk thu taw a kisawl nasep haksa a sepsaknate mu hi. Egypt te khat in Moses ii mipui Hebrew mi khat a thalup ngawngawn mu hi.

¹²Moses in a kiim a paam enin, ama a en kuama a mu ngawl ciang Egypt mi pa thatlum in a luang sen sungah phual hi.

¹³A zing ciang ama pai kik a, Hebrew te nii kihau mu hi. Ama in a khial pa tungah, “Banghangin na Hebrew mipui sia pa saat ni ziam?” ci hi.

¹⁴Tua pa in, “Kote hong uk tu le thukhen tu in, akua in nang hong koi ziam? Egypt mipa na thalup bangin kei hong that tu ni ziam?” ci in zo hi. Tuasia ciang Moses lau a, “Ka ngamtatna teng ngual in hong mu zo hi ta a maw,” ci hi.

¹⁵Tua thupiang teng kumpipa in a zaak ciang Moses thalup tu in zongsak a, ahizong Moses sia Midian ngam ah teang tu in tai hi. Ni khat, Moses tuikhuk khat paam ah a to laitak, Midian thiampi Jethro ii tanu salite tuitoai tu in hong pai uh a, a pa ii tuu le kealte atu in tuikuang teng tui dimh hi.

¹⁷Ahizong tuucing pawlkhatte in Jethro tanute notkeak uh hi. Tuaciang Moses in amate suatakin, a ngannote tui piaksak hi.

¹⁸Amate a pa kungah a cia uh ciang, a pa in, “Banghang tuni hong cia pal nu ziam?” ci in dongh hi.

¹⁹Amate in, “Egypt te khat in tuucingte khut sung pan hong suatakin, ko atu in tui ngawngawn hong toaisak a, ih ngannote tui hong piaksak hi,” ci in zo uh hi.

²⁰A pa in a ta numeite tungah, “Tua pa koi sungah om ziam?” ci in dongh hi. “Banghangin tua pa tualai ah nusia nu ziam? Pai tavun a, eima taw an nekhawm tu in sam tavun,” ci hi.

²¹Tuabangin tualai ah a teang tu in Moses thukim ahikom, Jethro in a tanu Zipporah taw kiteangsak hi,

²²Zipporah in tapa khat neipui hi. Moses in, “Hi ngam ah ngamdangmi khat suak ka hi ciang, a min Gershom ka phuak tu hi,” ci hi.

²³Kum tampi zawkciang Egypt kumpipa thi a, ahizong Israel te a saltanna hangin thuumin, tau a, hu ngenin kap lai uh hi. A kaana awte Pathian kung thengin,

²⁴ama in amate taunate a zaak ciang Abraham, Isaac le Jacob taw a thuciamna phawk hi.

²⁵Ama in Israel te saltanna mu in, amate atu in thinbot hi.