Read Siyin Chin Pusuana 21 Bible Online

Pusuana 21 - Siyin Chin bible

Pusuana 21

¹“Israel te tungah a nuai a thukhamte pia in:

²Hebrew mi sila in na lei uh le, kum luk sung na hong sepsak tu hi. Kum sali kumin bangma pia ngawlin kisuaktasak tu hi.

³Na silapa sia na sila a sua lai in zi nei ngawl ahile hong nusiat ciang a zi tonpui ngawl tu a, ahizong zi neisa ahile a zi tonpui thei tu hi.

⁴A topa in zi neisakin, tanu tapa a nei le a zi le a tano teng a topa ii neisa hi tu a, ama nguak pai tu hi.

⁵Ahizong silapa in ka topa, ka zi, ka tate ka it hi ci in suataksak tu a nop ngawlna thu hong pualaak le,

⁶a topa in ama biakpiakna munah paipui tu hi. Tualai kongkha ahibuale kongkha khuam neal in ama dingsak tu a, a bil vutvangsak tu hi. Tuaciang a nuntak tawntung ama sila hi tu hi.

⁷“Mihing khat in a tanu sia sila tu in a zuak le, pa silate bangin suakta thei ngawl tu hi.

⁸Tua nu a zi tu in a nei nuam khat ii tungah kizuak a, ahizong tua pa in a dei bua le, tua nu sia a pa kungah kizuak kik tu hi; a topa in ngamdangmite tungah zuak thei ngawl tu hi, banghang ziam cile ama in tua nu a phatvawt ngawl sa ahihang hi.

⁹Pasal khat in a tapa a piak tu in sila numei khat a lei le tanu khat bangin vawt tu hi.

¹⁰Mihing khat in zi ni a nei le a zi masa sia nidang a piak ngeiza an, puan le a nga tuakte a kibangin pia suak tu hi.

¹¹Ama in a zi masa tungah hi bangin a vawt tu te a khuangkhim buale liausum bangma la ngawlin a suataksak kul tu hi.

¹²“Mihing khat vua in a that sia peuma kithatlum tu hi.

¹³Ahizong thalup sawm ngawlpi khutkhial tha ahile ama atu ka tealsa munah ngammuangin om tu a, suakta thei tu hi.

¹⁴Ahizong mihing khat thin uuk in midang khat a thatlum lui le ka biaknatau beal tu in a tai zong kithat veve tu hi.

¹⁵A nu ahibuale a pa a vua sia kithatlum tu hi.

¹⁶Mihing khat zuak tu ahizong, sila in khoai tu ahizong a ngu sia kithatlum tu hi.

¹⁷A nu ahibuale a pa a haamsiat sia kithatlum tu hi.

¹⁸Mihing nii kihau in, khat pa in a dang khat pa suangtum taw suu ahibuale a khuttum taw thong a, ahizong a thatlum buanale tua pa daan kipia ngawl tu hi. Tua a thuakpa sia lupmuntung ngak ahihang, tua zawkciang tho thei in doipua a paina ah ciangkhut zak a kul le, dam ngawlin a om hun sung a supna teng a thaman liau tu a, a dam dong ou tu hi.

²⁰Mihing khat in a silapa ahibuale a silanu mol khat taw saatin thakhat thu a thi paih le, a saatpa daan kipia tu hi.

²¹Ahizong a sila sia ni khat, ni nii in a thi bua le, a topa daan kipia ngawl tu hi. A neisa a sup sia a kicing daan ahi hi.

²²Mihingte kihau a naupaai numei khat nasakin, a tuamdang khat pawpo taw a liam hi ngawl napi a nau a lal le, a nasakpa in tua numei nu pasal ii a ngetza, thukhente thu khen bangin liau tu hi.

²³Ahihang tua numei a kiliamsua le tua daan sia nuntakna atu nuntakna ma,

²⁴mittang atu mit, hatang atu ha, khut atu khut, peang atu peang,

²⁵meikaang atu meikaang, liamna atu liamna, chidup atu chidup ma hi tu hi.

²⁶Mihing khat in a silanu ahibuale a silapa saatin a mit a taw le, a mittang atu in tua sila sia suaktasak tu hi.

²⁷A ha tang khat a tongsak le a ha taangin tua sila sia suatakna pia tu hi.

²⁸Khuital khat in mihing khat a siilum le tua khuital suang taw kideanglum tu a, a sa kine ngawl tu hi; ahizong a neipa daan kipia ngawl tu hi.

²⁹Ahizong tua khuital in ngual a sik zongsang sa hi in, a neipa tungah a kidop natu kison zo napi khum ngawlin — mihing khat a siilum le tua khuital sia suang taw kideanglum tu a, a neipa zongh kithatlum tu hi.

³⁰Ahizong tua a neipa sia a nuntakna a kihuukna in liausum a kipiasak le, a nget zaza a piak kul tu hi.

³¹Khuital khat in patangno khat ahibuale numeino khat a silum le tua zui tu ngeina sia taw ma a kibang hi tu hi.

³²Khuital in sila numei khat ahibuale sila pa khat a silum le ngan neipa in sila topa tungah sum ngunntang sawmthum pia tu a, tua khuital suang taw kideanglum tu hi.

³³Mihing khat in dum sitna a hon hang ahibuale dum to in a sit ngawl hu in, khuital ahibuale laa khat tua dum sungah a taak le,

³⁴ama in tua nganno ii man liau nanak tu hi. Ngan neipa tungah a sum pia tu a, tua nganhing thi sia ama in tang thei tu hi.

³⁵Mihing khat ii khuital khat in midang khat ii khuital a silum le amate nii in a nungta khuital sia zuakin, a sum hawm tu hi; khuital thi sia ii sa zongh hawm tu uh hi.

³⁶Ahizong tua khuital sia ngual sik tu a zongsang khat hi ci in, kihe a, a neipa in khum ngawl ahile a dang khat pa tungah ama khuital nungta khat taw lo kik hamtang in sumsisak ngawl tu hi, ahizong khuital thi sia ama in tang tu hi.