Read Siyin Chin Pusuana 22 Bible Online

Pusuana 22 - Siyin Chin bible

Pusuana 22

¹“Mihing khat in khuipui ahibuale tuu khat ngu in a ngo, a zuak le ama in khuipui khat taangin khuipui nga, tuu khat taangin tuu li pia hamtang tu hi.

²Ama in a nguk sia atu liau hamtang tu hi. Ama in bangma a nei buale a nguk sa teng a liau natu in ama sila in kizuak tu hi. A nguk nganhing sia khui, laa, tuu a nungta in ama khut sungah a kimu le ama in a zaa nii in liau tu hi. “Nguta khat in zan lai in inn phuul a, a kithatlum le a that pa sia mithat in kimawsak ngawl tu hi. Ahizong tuasia sun hun sung a piang ahile mithat in kimawsak tu hi.

⁵“Mihing khat in a ngannote lo ahibuale sapithuan khat ah tha in a tatsak laitak a ngante puapial in midang khat ii lo ah ankungte a neaksak le, ama lote ahibuale a sapithuante pan a bo teng lo kik tu hi.

⁶“Mihing khat in ama lo pan meikuang khat kipan a, ngual dangkhat ii lo kipeesak in a kikhol ante ahibuale ankungte a kaangh le mei a kaanghsakpa in a lal teng liau tu hi.

⁷“Mihing khat in midang khat ii sum ahizong, na manpha dangte ahizong kepsak tu in thukim a, ama inn pan kingu in, a ngupa a kikan zo le a zaa nii in kiliausak tu hi.

⁸Ahizong a ngupa a kimu buale vanh manphate a keampa sia biakna munah kipaipui tu a tua munah a nguksak ngawlna thu kiciam tu hi.

⁹“Khui, laa, tuu, puansilh ahibuale nadang a bo khat pawpo taw kisai thuneina theampo ah tua na a kituu te nii sia biakna munah kipaipui tu hi. Pathian ii maw hi a ci sia pa in a langkhat pa tungah a zaa nii in liau tu hi.

¹⁰“Mihing khat in ngual laa, khui, tuu nganhing dang khat kepsak tu thukim a, tua nganno thi, liam ahibuale a kitaipuisak ahihang tetti a om buale

¹¹biakna munah ngan keampa paipui tu a, ngual ngan a nguksak ngawlna thu a kiciam kul tu hi. A kingu ahibuale a neipa a sumh hi tu hi, tua pa in liau ngawl tu hi;

¹²ahizong a kingu ahile a nei pa tung liau hamtang tu hi.

¹³Ngamsate ii thalup ahile a neakmongte tetti in a lak kul hi; ama in ngamsa ii thalup sia atu liau kul ngawl hi.

¹⁴“Mihing khat in ngual ngan zawng a, a nei pa om ngawl sungin a liamsak ahibuale, a thisak le tua pa in liau tu hi.

¹⁵Ahizong a nei pa om sungin, tuabang thu piang ahile liau kul ngawl hi. Man piak tu in a kizawng ahile a zawn man teng taw kisi tu hi.

¹⁶“Mihing khat in a kidongh ngawl lai ngaknu thiangtho khat zolin a ompui le moman teng a piak kul a, tuaciang teenpui tu hi.

¹⁷Ahizong a numei ii pa in a kiteen tu a oai buale tua ngaknu khat atu moman za sia a sum in a pa tungah pia nanak tu hi.

¹⁸“Bum le ai toai numei peuma kithatlum tu hi.

¹⁹“Nganhing khat taw a khialpa peuma kithatlum tu hi.

²⁰“Keima., TOPA simngawl, pathian dang tungah sangaw biakpiakna a vawt peuma kithatlum tu hi.

²¹“Ngamdangmi khat vawtsia ahibuale zothaw heak vun; Egypt ah ngamdangmite na hina uh phawk vun.

²²Meingong ahibuale tanga peuma na vawtsia heak vun.

²³Na vawtsia uh le Keima TOPA in amate ih hu hong ngetna aw ka zaak ciang ka zo tu a,

²⁴ka thin uukin ngal sungah kong that tu hi. Na zite meingong tu a, na tate sia pa sel tu uh hi.

²⁵“Keima ii mi ahi a zawng khat pawpo tungah sum na pukthaak uh le sum pukthaak pa bangin om heak vun a, summeet na la heak vun.

²⁶Hong lo kik natu kikhapna in khat po ii puanvan silh lai na laaksak le, nitum ma in pia kik tu ni hi,

²⁷banghang ziam cile a khualumna tu in a neisun sia tua puanvan bek ahi hi. Ama bangdang silhin mutthip thei tu ziam? Ama in kei tungah hu ngen a, hong au ciang zo tu khi hi, banghang ziam cile ngual hesuak thei khi hi.

²⁸“Pathian na sonsia heak vun a, na minam lampuite na haamsiat heak vun.

²⁹“Na lo an, na sapittui le na olive thau sung pan kei nong piak tute hong pia tavun. “Na tapaciilte kei hong pia tavun.

³⁰Na khui le na tuu a no suakciilte hong pia tavun, Tua a suakciil a pa sia ni sali sung a pui taw omsak in a, a ni liat ni in kei hong pia tavun.

³¹“Note sia keima mihing na hi uh ciang ngamsate ii matsa nganhing ii sa peuma ne ngawlin uite pia zaw vun.