Read Siyin Chin Pusuana 25 Bible Online

Pusuana 25 - Siyin Chin bible

Pusuana 25

¹TOPA in Moses tungah,

²“Kei tungah sumpi hong piak natu in Israel te son in. A pia nuam khat pawpo ii sumpite saang in.

³Hi sumpite sia: khamh, ngunn le taau;

⁴puanneal, vancii, a sandup le a san samulpuan; kealmul taw kivawt puan;

⁵a san a kinimh tuuvun, savun neal, acacia thing;

⁶meidet sathau, noi sathau le ngimnamtui atu hel namtuite;

⁷Thiampi Lianbel ii ephod tung le awmdal te tungah bul tu suangsante le suangmanpha dangte ahi hi.

⁸Amate sungah ka teen thei natu in, kei atu in mite in puanbuk thiangtho khat vawt tahen.

⁹Tuasia le a sung nazak tu te theampo kong lak tu ngealna bangin vawt tahen.

¹⁰“Acacia thing taw thingkuang a sau centimetre 110, a zai centimetre 66, a saang centimetre 66 khat vawt in.

¹¹A sung a pua khamh ciitak taw tuam in a, a mong kiimkot khamh taw zial in.

¹²A zawn natu khamh kual li vawt in a, a pangh lang le lang ah nii veve, a peang lite tungah bul in.

¹³A zawn natu in acacia thingpum sui in a, khamh taw tuamin,

¹⁴thingkuang pangh veve ah a kibul khamh kualte sungah thun in.

¹⁵Tua thingpumte khamh kualte sungah kinusia tu a, kila nawn ngawl het tu hi.

¹⁶Tuaciang nang kong piak tu thupiak teng a ki at suangpheak niite thingkuang sungah koi in.

¹⁷“A sitna khamh ciitak taw vawt in, a sau centimetre 110, a zai centimetre 66 hi tu hi.

¹⁸A kiseakpeak khamh taw cherub nii ii lim vawt in a,

¹⁹a sitna mong veve ah koi in. A sitna taw kipee, a sakhat tu in vawt in.

²⁰Cherub niite ii lim sia a sitna tungah khat le khat kimaingat tu a, a tha kiphalte in tuasia liap tu hi.

²¹Suangpheakte nii thingkuang sungah koi in a tungah a sitna koi in.

²²Tualai ah kong kisikpui tu a, cherub te ii a thate nii kilaklaw, a sitna tung panin Israel mite atu, ka thukhamte theampo nang kong pia tu hi.

²³“Acacia thing taw a sau centimetre 88, a zai centimetre 44, a saang centimetre 66 sabuai khat vawt in.

²⁴khamh ciitak taw tuamin, a mong kiimkot khamh taw zial in.

²⁵A kiil kiimkot millimetre 75 zaisakin, khamh taw tuam in.

²⁶Khamkual li vawt in a, a peang omna king li ah bul in.

²⁷Tua khamh kualte sabuai zawn natu thingpumte thun natu hi a, sabuai kiil ah bul tu ahi hi.

²⁸A thingpumte acacia thing taw vawt in a, khamh taw tuam in.

²⁹Sapittui biakpiakna ah a kizangh tu pakante, haite, haitungte le kuangte vawt in. Hi teng khamh ciitak taw kivawt tu hi.

³⁰Sabuai sia Thuciamna Thingkuang mai ah kikoi tu a, kei hong kipia anluum thiangtho sia tua sabuai tungah kilui tawntung tu hi.

³¹“Khamh ciitak taw meivakna khuam vawt in. A tawdap le a khuamte a kiseakpeak khamh taw vawt in; a zepna paakte, a momte le paakpalhte zongh meikhuam taw sakhat hi tu hi.

³²A khuam panghte pan baak luk kaasak tu a, a lang le lang ah baak thum veve om tu hi.

³³A baak luk te khat simin almond paak bangin a mom le a palh taw a kithua paak nam thum nei tu hi.

³⁴A meikhuam sia almond paak bangin a mom le a paakpalh taw a kithua kizepna paak pha nam li nei tu hi.

³⁵Kop thum a pha a baakte sim ii nuai ah a mom khat tek om tu hi.

³⁶A momte, a baakte le meikhuam sia a kiseakpeak khamh ciitak bek khat taw a kivawt hi tu hi.

³⁷A mai sang a taan thei natu in tua meivak khuam tungah meivak sali de in.

³⁸Taiteete le kuangdalte khamh ciitak taw vawt in.

³⁹Hi meikhuam le a nadang teng vawt natu in khamh ciitak kilogramme 35 zangh in.

⁴⁰Mual tungah kong lak ngealna sia bang tatak in, tua nate pha takin vawt in.