Read Siyin Chin Pusuana 26 Bible Online

Pusuana 26 - Siyin Chin bible

Pusuana 26

¹“Kong ompuina Puanbuk, a thiangtho puanbuk sungsang sia vancii, a sandup, le a san tuumul taw a kitak puanneal bek sawm taw vawt in. Tua puante cherub limte taw zeam in.

²Tua puante a letna kikim tu a, metre 12 sau in metre 2 zai veu hi tu hi.

³Tua puan ngate khatin khuikhawmin, a dang nga teng zongh tuabang ma khuikhawm in.

⁴Na puan pee khop khat simin a puasang puanbek ii mong tung teng ah vancii puan kualte vawt in.

⁵A puan masa sia tungah kual sawmnga koi in a, a niina puan sia tung zongh ah a kibangin kual sawmnga ma koi in kisituasak in.

⁶Tua puante nii sia puan khai khat in na pe thei natu khamh taw kivawt a khilna koaite sawmnga vawt in.

⁷“Puanbuk ii a tung sit natu in kealmul taw kivawt puanbek sawm le khat vawt in.

⁸Tua teng a letna kibangsak in, metre 13 sausak in, metre 2 zaisak in.

⁹Tua puanbek nga teng khatin khui khawm in a, a dang luk teng khatin khuikhawm in. A lukna puanbek sia Puanbuk mai ii tung san ah thep nii in thep in.

¹⁰Na khuikhop puankhai khat ii puanbek khakbel sia ii mong tungah a kual sawmnga vawt in a, a dang khat sia mong zongh ah a kual sawmnga vawt in.

¹¹Puante kipee khop natu in taaukoai sawmnga vawt in a, a sitna khat suak tu in a kikhui khawmsa puante nii ii a kualvangte sungah thun in a pe in.

¹²Puanbuk nungsangah tua puanbek vaal ii a lang sia kaaisuksak in.

¹³Tua puankhai sia a sau lamin a mong vaal centimetre sawmnga veve sia Puanbuk pangh tek ah kaaisuksak in.

¹⁴“Puanbuk sit natu a sanin a kinimh tuutal vun taw kivawt a sitna khat le savun neal taw kivawt a sitna dangkhat te ngeal vawt lai in.

¹⁵“Acacia thing taw Puanbuk a kalpheak dingtangte vawt in.

¹⁶Tuate khat sim a sauna metre 4, a saana centimetre 66 hi tu a,

¹⁷a kipee thei natu in a meang nii vawt in. A kalpheak theampo tuabangin vawt siat in.

¹⁸Thang sang atu a kalpheak kul,

¹⁹a nuai phaa tu ngunn taw kivawt tawdap sawmli vawt in a, a meangte a len tu in ngunn tawdap nii tek koi in.

²⁰Puanbuk saksang atu a kalpheak kul,

²¹a kalpheak khat ciang tawdap nii veu, ngunn tawdap sawmli vawt in.

²²Nitumna sang Puanbuk nungsangah a kalpheak luk,

²³le a kingte atu in a kalpheak nii vawt in.

²⁴Hi a king a kalpheakte sia a bul pan pe in a dawn dong kizom siat tu hi. Tua king nii a piangsak a kalpheakte nii sia, tubangin kivawt tu hi.

²⁵Tuabangin a kalpheakte liat om tu a, khat simin tawdap nii veu, ngunn tawdap sawm le luk om tu hi.

²⁶“Acacia thingzawl sawm le nga vawt in, Puanbuk a kalpheakte atu in a pangh khat ah zawl nga veu,

²⁷a langkhat ah a kalpheak nga le a nungsang nitumna sang khakbel ah a kalpheak nga vawt in.

²⁸A lai zawlsau, a kalpheakte nii ii lang kikhenna ah a kithung sia Puanbuk langkhat pan langkhat dong, a tuantung hi tu hi.

²⁹A kalpheakte khamh taw tuamin, a zawlte tum natu khamh kualte bulin a, a zawlte zongh khamh taw tuam in.

³⁰Mual tungah kong lak ngealna sa om bangin Puanbuk sa in.

³¹“Vancii, a sandup le a san samul taw a kitak puanneal puankhai khat vawt in. Tuate cherub te ii limte taw zeam in.

³²Ngun tawdap li tungah a kiphut, vanh khaina a koaite a kithua khamh taw a kituam acacia thing khuam li tungah tua puan khai in.

³³Puanbuk innciing nuai ah puankhainate pan puankhai khaksuk in a, tua puan nungah suangpheak niite koina Thuciamna Thingkuang koi in. Tua puan in Thiangtho Mun le Thiangthobel Mun kidaakna ahi hi.

³⁴Thuciamna Thingkuang sitna thua in.

³⁵Thiangthobel Mun ii pua sang, Puanbuk ii saksang pangh ah sabuai koi in a, thangsang pangh ah meidetna khuam koi in.

³⁶“Puanbuk sung tumna puankhai tu in vancii, a sandup le a san samul taw a kitak thiamngelte taw a kizeam puanneal puankhai khat vawt in.

³⁷Hi puankhai atu in khamh taw a kituam le puankhaina khamh koai a kibul acacia thing khuam nga phut in; tua khuamte atu in taau tawdap nga vawt in.