Read Siyin Chin Pusuana 27 Bible Online

Pusuana 27 - Siyin Chin bible

Pusuana 27

¹“Acacia thing taw biaknatau khat vawt in. Tua in king li nei tu a, a sauna metre 2.2, a zaina metre 2.2, a saanna metre 1.3 hi tu hi.

²A king li dawn teng doksak in. Tua a dok teng biaknatau taw sakhat suak tu in, taau taw kituam siat tu hi.

³Sathau baang vut koi natu in bealpeute le kawkeaute, kuangte, thikkoaite le meikam luana daalpheakte vawt in. Hi nazakte theampo taau taw kivawt tu hi.

⁴Taau taw saaksai khat vawt in, a king li ah toai natu taaukual li koi in.

⁵Tua taau saaksai sia biaknatau ii a lang dong a bat natu in biaknatau bitha nuai ah koi in.

⁶A zawn natu Acacia thingpumte vawt in, taau taw tuam in.

⁷Biaknatau a kizawn ciang a panghte nii ah a om a kualte sungah thingpumte thun in.

⁸Mual tungah ngealna kong laksa bangin biaknatau sia thingpheak taw vawt in a, a sung vangsak in.

⁹“Kong ompuina Puanbuk tu sia puanneal puankhaite taw doituam khat uum in. Thangsang pangh puankhaite sia metre 44 sau tu hi.

¹⁰Tua puan sia taau tawdap khat tek a nei taau khuam kul tungah na khak tu uh a, tua khuamte tungah ngunn taw a kivawt puankhainate le a zawlte om tu hi.

¹¹Doituam ii saksang pangh zongh ah tuabang ma in vawt in.

¹²Nitumna sangah metre 22 a sau puankhaite, khuam sawm le a dap sawmte taw om tu hi.

¹³Nisuana sang, kongbiang omna ah a doituam zongh metre 22 zai tu hi.

¹⁴Kongbiang ii a pangh veve ah puankhaite metre 6.6 veu, khuam thum le a tawdap thumte taw om tu hi.

¹⁶A tumna kongbiang san ah vancii, a sandup, le a san samul taw a kitak thiamngelte taw a kizeam metre 9 a sau puanneal puankhai khat om tu hi. Tua in tawdap li taw a kiphut khuam li tungah kikhak tu hi.

¹⁷A kiimkot uumna khuam teng ngunnzawlte taw kizom a, vanh khainate ngunn taw a kivawt hi in a tawdapte taau taw a kivawt hi tu hi.

¹⁸A doituam sia metre 44 sau, metre 22 a zai le metre 2.2 a saang hi tu hi. Puankhaite puanneal taw kivawt tu a, a taw teng taau taw kivawt tu hi.

¹⁹Puanbuk atu a kizangh vanh theampo le puanbuk atu le a doituam tu in, a kizangh khetphin theampo taau taw kivawt tu hi.

²⁰“Nitak simin meiinn a kidet thei natu in olive thau phabelte nang kung hong puak natu in Israel mite thupia in.

²¹Kong ompuina Puanbuk sung, Thuciamna Thingkuang mai, puankhai pua sangah Aaron le a tapate in meiinn koi tu uh hi. Tua mun keima omna ah nitak pan zingsang dong mei de tu uh hi. Hi thupiak sia Israel te le a suan a paalte in a tawntung a zui tu uh ahi hi.