Read Siyin Chin Pusuana 28 Bible Online

Pusuana 28 - Siyin Chin bible

Pusuana 28

¹“Na suapuipa Aaron le a tapate Nadab, Abihu, Eleazar le Ithamar te sam in. Keima tungah thiampi na a sep thei natu in amate Israel mite sung pan tuamkoi in.

²Na suapuipa Aaron sia a vaang nei natu le a et hoi natu in thiampi puante vawtsak in.

³Keima na a seam tu in a ki aap thiampi khat a sua thei natu in thiamna ka piaksa khut thiam naseamte theampo samin Aaron ii puansilhte khui tu in sam in.

⁴Amate in awmdal khat, ephod puan khat, puantual khat, thiamngel taw kizeam laktong khat, dialkhip khat le kawngsawmna khau khat a vawt natu in sawl in. Amate in ka na a seam thei thiampite a sua natu in khutthiamte in na suapui pa Aaron le a tapate atu in hi thiampi puante khuisak tu hi.

⁵Khutthiamte in vancii, a sandup, a san samul, khamh khau le puanneal phate zangh tu hi.

⁶“Amate in ephod sia vancii, a sandup, le a san samul, khamh khau le puanneal phate taw vawtin, thiamngel taw zeam tu hi.

⁷A kikhit thei natu in, a liangko lang le lang ah a sawmna khau nii om tu hi.

⁸A dangte taw a vawtdan a kibang, pha tak a kitak kawng sawmna khau sia ephod taw sakhat tu in a tungah thuap tu hi.

⁹Suangmanpha san nii la in, a tungah Jacob tapa sawm le niite min at in,

¹⁰amate pianna suana taw kizui in a min luk te suang khat tungah at in, a dang luk te ii min teng suang dang khat tungah at in.

¹¹Suang manpha a zeamthiamte khat in hi suangte nii tungah Jacob tapa sawm le niite min atsak in a, tua suangte khamh dapphate tungah suang in.

¹²Tuate Israel minam sawm le niite taangin ephod liangkhai puan tungah koi in. Tuabangin Aaron in a minte a liangko tungah pua tu a, tuasia ciang keima TOPA in ka mite ka phawk tawntung tu hi.

¹³Khamh dappha nii na vawt zawk uh ciangin,

¹⁴khamh ciitak taw a kivawt zam nii te khau bang a kipheak sa in ngui nii vawt in, khamh dappha sia taw na khii khawm tu uh hi.

¹⁵“Pathian ii deina heak thei natu in, a kizangh awmdal khat Thiampi Lianbelpa atu in vawt in. Tuasia ephod vawtnate taw ma kibangin a kivawt, thiamngel taw a kizeam hi tu hi.

¹⁶A tung a phei a kikim king li nei thep nii in kithep tu a, centimetre 22 sau, centimetre 22 zai hi tu hi.

¹⁷Tua tungah suangmanpha ngual li in na suan tu a; ngual khatna ah ruby khat, topaz khat le garnet khat hi tu hi;

¹⁸Ngual niina ah emerald khat, sapphire khat le diamond khat;

¹⁹ngual thumna ah turquoise khat, agate khat le amethyst khat;

²⁰le ngual lina ah beryl khat, carnelian khat le jasper khat hi tu hi. Hite khamh dapphate sungah kisuang tu hi.

²¹Israel minamte taangin Jacob tapa khat tek ii min a ki at suang sawm le nii na koi tu hi.

²²Awmdal atu in khauhual taw kibangin a kipheak khawm khamh ciitak khi ngui vawt in.

²³Khamkual nii vawt in, awmdal tung sang kingte veve ah suan in.

²⁴Tua khamh khauhual te nii sia, a kual te nii tungah khit in.

²⁵A khauhual ii mong te nii sia dappha te nii tungah khit in a, tuaciang ephod ii liangkhai maisang ah thua in.

²⁶Tuaciang khamh kual nii vawt in, awmdal a nuai king veve ephod mong sung sangah suan in.

²⁷Khamkual nii vawt in, ephod maisang liangkhai nuai ah khitin pha tak a kitak kawngkhau tungah sawm in.

²⁸Kawngkhau tungah pha tak a om thei natu le awmdal a kol ngawl natu in, awmdal khaute ephod khaute tungah khau vancii khat taw sawm khawm in.

²⁹“Keima TOPA in ka mite ka phawk tawntung natu in, Thiangtho Mun ah Aaron a tum ciang Israel minamte min a ki at awmdal silh tu hi.

³⁰Tuabangin a thiangtho kong ompuina sungah Aaron hong pai ciang a ken thei tu in ama awmdal sungah Urim le Thummim koi in. Israel mite atu in ka deina a heak thei natu in tuabang hun ciangin tua awmdal ama in silh tawntung tu hi.

³¹“Ephod puan nuai ah silh tu puantual sia vancii samulpuan siuseu taw kivawt tu hi.

³²Lu thun natu a vang om tu a, tua a vang kiimkot sia a ek ngawl natu in a kitak sa puan taw tuam thua tu hi.

³³A nuai kiimkot ah vancii, a sandup le a san samul puan taw a kivawt talee nga te khamh tengeng te taw a kithatheak in koi in.

³⁵Aaron in thiampi na a sep ciang tua puantual silh tu hi. Ka ompuina Mun Thiangtho ah ama hong pai ciang ahibuale a pusua ciang tengeng nging kiza tu a, ama kithatlum ngawl tu hi.

³⁶“Khamh ciitak taw kizepna khat vawt in a, a tungah ‘TOPA atu Kitavaw’ ci in at in.

³⁷Tua kizepna sia lu khipdial mai ah vancii meal khau khat taw khit in.

³⁸Mite in biakpiakna a vawt ciang khialna pawlkhat a vawt hial zong, Israel te ii kei tung hong aap biakpiakna theampo ka san natu in Aaron in tua kizepna sia a tal ah suang tu hi.

³⁹“Puanneal pha taw Aaron laktong le lu khipdial le thiamngel taw a kizeam kawngsawmna khat zongh vawt in.

⁴⁰“Aaron tapate ii vaang nei natu le et hoi natu in, laktong, kawngsawmna le lukhu vawt in.

⁴¹Hi puante na suapuipa Aaron le a tapate silhsak in. Tuaciang amate in ka na a seam thei thiampite ahi natu in thupha piak kipsakna le aapna in olive thau taw zut in.

⁴²A ci a sa a kimu ngawl natu in a kawng pan a pheizang ciang a pha ngoaipuante khuisak in.

⁴³Aaron le a tapate in a sealno teng a kimu hu in, thalupna a thuak ngawl natu in ka omna Puanbuk ah hong pai ciang ahibuale Mun Thiangtho ah thiampi naseam tu in biaknatau hong neak ciang tua ngoaipuan teang tawntung tu hi. Tua in Aaron le a suan a paalte atu in a zui tu ngeina kip ahi hi.