Read Siyin Chin Pusuana 29 Bible Online

Pusuana 29 - Siyin Chin bible

Pusuana 29

¹“Aaron le a tapate ka na a seam thiampi tu in na aap ciang hi bangin na vawt tu hi. A mealhem ngawl khuital moi khat le tuutal nii keng in.

²Tol saw ngawl zungtaang vui phabel zangh in olive thau taw anluum pawlkhat, olive thau ngawl taw anluum pawlkhat le sathau taw a kizut moh pawlkhat vawt in.

³Tuate khum sungah koi in, khuital le tuutalte nii biakpiakna in na ngaw uh ciang hong pia tavun.

⁴“Aaron le a tapate kong ompuina Puanbuk tumna kongbiang ah hong paipui in, amate a zeksa kibualna neisak in.

⁵Tuaciang Aaron sia thiampi puante — laktong, ephod, ephod nuai ah a kisilh puantual silhsak in, awmdal le kawngkhau thuasak in.

⁶A lu tungah dial khimsakin, tua tungah, ‘TOPA atu Kitavaw’ a kici a thiangtho ki aapna lim kizepna sia suang in.

⁷Tuaciang noi sathau la in, a lu tungah buakin, noai in.

⁸“A tapate paipui in puante silhsak in;

⁹a kawng ah kawngsawmna khau sawm in, a lu tungah lukhu khusak in. Hi bangin Aaron le a tapate thiampi naseam tu in thupha pia in kipsak tu hi. Amate le a suan a paalte in a tawntungin thiampi panmun taw ka na seam tu uh hi.

¹⁰“Ka omna Puanbuk mai ah khuital hong paipui ta'n a, khuital lu tungah a khut a ngak natu in Aaron le a tapate son in.

¹¹Tualai a thiangtho ka ompuina Puanbuk tumna kongbiang ah khuital ngo in.

¹²Khuital chi tawm la in, biaknatau dokte tungah na khutme taw noai in. Tuaciang a om lai teng biaknatau bul ah sung in.

¹³Tua zawkciang a sungthau theampo, a thin sa phabel na mun le, a nauta te nii le nauta a tuam a thaute la in, keima biakna in biaknatau tungah hal in.

¹⁴Ahizong khuital satak, a vun le a sungkua theampo ngiaphual pua sangah hal in. Tua in thiampite mawna teng phelsak natu biakpiakna ahi hi.

¹⁵“Tuutal khat hong paipui ta'n a, Aaron le a tapate in tuutal lu tungah a khut a ngak natu in sawl in.

¹⁶Tua tuutal ngoin, a chi la in biaknatau pangh li teng ah the in.

¹⁷A sa semin; a sungkua le a nung peangte sil in a, a lu le a sa dangte tungah koi in.

¹⁸Tuutal sa theampo biaknatau tungah an biakpiakna in hal in. Tua biakpiakna ii a ngimnam in keima hong lungkimsak hi.

¹⁹“Ki aapna in a kizangh tuutal — tuutal dangkhat sia — la in a, Aaron le a tapate in tua sia ii lu tungah a khut a ngak natu in sawl in.

²⁰Tua tuutal ngoin, a chi tawm la in Aaron le a tapate bil ziatsang dawn, a ziatsang khutpi tung, le a ziatsang peangpi tungah noai in. A om lai chi teng biaknatau pangh li tengah the in.

²¹Biaknatau tungah a om chi tawm le noi sathau tawm la in Aaron le a puante tung, a tapate le a puante tungah the in. Aaron, a tapate le amate ii puante kei tungah hong ki aap tu hi.

²²“Tuutal thau, a meici thau, a sungthau, a thinsa phabelna, a thau, a nautate nii le nauta a tuam a thau, a ziatsang phei hoaikeak in.

²³Kei tungah nong piaksa anluum khum sung pan a nam simin: olive thau taw kivawt anluum khat, olive thau kihel ngawl anluum khat le moh phaang khat tek la vun.

²⁴“Hi an theampo Aaron le a tapate khut sungah koi in a, kei tungah a letsong tuam khat in hong aap natu in son in.

²⁵Tua zawkciang amate tung pan anluumte la in a, biaknatau tung, meihal biakpiakna tungah an taw keima nong biakpiakna in hal in. Hi biakpiakna ngimnam in keima hong lungkimsak hi.

²⁶“Tuutal awmsa la in, kei tungah letsong tuam khat in nong aap tu hi. Hi tuu awmsa baak sia nangma atu ahi hi.

²⁷“Thiampi khat thupha pia in a kikipsak ciang, a kizangh tuu awmsa le a pheisate sia keima tungah letsong tuam khat in nong aap tu a, thiampite atu in kikoituam tu hi.

²⁸Hi thu a kikheal ngawl ka thukhenna hi a, ka mite in kipawlkhop biakpiakna a nei ciang, nganno awmsa le a pheisate thiampite neisa hi tu hi. Tua sa sia amate ii keima TOPA tungah hong piak letsong ahi hi.

²⁹“Aaron ii thiampi puante ama thi zawkciang a tapate tungah ki aap tu a, amate thupha piak kipsakna a kinei ciang a silh tu ahi hi.

³⁰Thiampi seam tu in Aaron tapa in keima ompuina Puanbuk sung Thiangtho Mun ah hong pai ciang ni sali sung tua puante silh tu hi.

³¹“Aaron le a tapate thiampi kipsakna in a kizangh tuutal sate la in mun thiangtho ah huan in.

³²Keima omna Puanbuk tumna kongbiang ah tua sate le khum sungah a taang anluumte nekhawm tu uh hi.

³³Amate in thiampi kikipsak na ah, mawmaisakna taw kisai in a zeksa vawtna ante ne tu uh hi. Tua ante an thiangtho ahikom thiampite bek in ne tu hi.

³⁴Sa ahizong, anluum ahizong zingsang dongin neakmong a om lai le kihal tu hi; tuate sia an thiangtho ahikom kine ngawl tu hi.

³⁵“Aaron le a tapate atu in thupha piak kipsakna ngeinate kong thupiak bang linlian in ni sali sung vawt in.

³⁶Mawna a kimaisak thei natu in ni simin khuital khat biakpiakna in pia nanak tu ni hi. Tua in biaknatau thiansua tu hi. Tua zawkciang a thiantho natu in olive thau noai in.

³⁷Tuabangin ni sali sung ni simin vawt in. Tuasia ciang biaknatau sia thiangtho sitset tu a, tuasia a thutha mihing khat ahibuale na khat peuma biaknatau ii thianthona vaang in ngim ngasak tu hi.

³⁸“Hong pai tu hun theampo ah ni simin biaknatau ah kum khat a pha tuuno nii biakpiakna in pia in.

³⁹Zingsang in khat, nitakin khat biakpiakna in pia in.

⁴⁰A masa tuu sia taw in olive thau thiang litre khat taw kihel anvui kilogramme khat pia khawm in. Biakpiakna in sapittui litre khat buak in.

⁴¹A niina tuu sia nitak biakpiakna in nei in, zingsang a bangma in anvui, olive thau le sapittui biakpiakna in pia in. Hi sia keima TOPA an biakpiakna hi a, tua ii ngimnam in keima hong lungkimsak hi.

⁴²Hong pai tu hun theampo ah hi meihal biakpiakna sia ka ompuina Puanbuk tumna kongbiang, keima mai ah hong kipia tu hi. Tua munah ka mite kong mu tu a, kong paupui tu hi.

⁴³Tualai ah Israel mite ka mu tu a, kong ompuina khuavak taang velvol sia in tua mun thiangthosak tu hi.

⁴⁴Puanbuk le biaknatau ka thiangthosak tu a, Aaron le a tapate in thiampi na seam tu in ka tuam koi tu hi.

⁴⁵Israel mite sungah ka teang tu a, amate ii Pathian ka hi tu hi.

⁴⁶Israel mite sungah ka teen thei natu in keima in Egypt pan amate a pusuapui TOPA a Pathian ka hina amate in he tu uh hi. Keima in amate ii Pathian TOPA ka hi hi.