Read Siyin Chin Pusuana 3 Bible Online

Pusuana 3 - Siyin Chin bible

Pusuana 3

¹Moses in Midian thiampi, a sunghpa Jethro ii tuu le kealte cingin a om laitak ni khat ni in a ngannote sennealngam kaantanpui in mual thiangtho Sinai theng hi.

²Tualai ah TOPA vantunglalang sia sawlpaang khat ii sung pan a pusuak meikuang khat bangin ama kungah kilangh hi. Moses in sawlpaang a kaangh in mu a, ahizong sawlpaang sia kaanghtum ngawl hi.

³Ama in, “Hi sia paw lamdang ei! Banghang sawlpaang sia kaanghtum ngawl ziam? Kei pai in, a nai neakin va en tong,” ci in ngaisun hi.

⁴Moses ii a nai a neak vaial TOPA in a mu ciang TOPA in sawlpaang sung pan, “Moses! Moses!” ci in sam hi. Ama in, “Hi khi hi, keima hilai ah om khi hi,” ci in zo hi.

⁵Pathian in, “A naizaw in hong neak heak in. Na peangdap suut in, banghang ziam cile mun thiangtho tungah ding ni hi.

⁶Keima in na taanghpupite ii Pathian, Abraham, Isaac le Jacob te ii Pathian ka hi hi,” ci hi. Tua ahiciang Moses in a mai hum hi, banghang ziam cile Pathian en ngam ngawl hi.

⁷Tua zawkciang TOPA in, “Egypt ah ka mite bang zata vawtsiatna thuak cisia ka mu zo hi, sila ukte khut sung pan suakta nuam in a kaana aw zongh ka za zo hi. A ngim thuakna theampo ka he siat hi,

⁸tua ahiciang Egypt te khut sung pan a hun tu le Egypt pan la in lei phana le ngam zaina munah a paipui tu in kong tuaksuk zo hi, tua ngam sia a zai, a hau le leihoi leipha hi a, tu in Canaan mite, Hit mite, Amor mite, Periz mite, Hiv mite le Jebus mite teang uh hi.

⁹Ka mite kaana aw ka za takpi zo a, Egypt te ii a zawthawk vawtzia zongh ka mu zo hi.

¹⁰Tu in ka mite Egypt ngam pan lam na pui thei natu in, a kumpipa kungah nangma kong puak tu hi,” ci hi.

¹¹Ahizong Moses in Pathian tungah, “Kei sia bangma ka hi bua hi. Kumpipa kungah pai in Israel te Egypt pan bangbang paipui thei thong tu khi ziam?” ci hi.

¹²Pathian in, “Nang taw kong omkhawm tu a, Egypt pan Israel te na paipui ciang, hi mual tungah nong bia tu hi. Tuasia in nangma hong paisak tatak ka hina, a kilakna hi tu hi,” ci in zo hi.

¹³Ahizong Moses in, “Kei Israel te kungah pai in, ‘Na taanghpupite ii Pathian in note kungah kei hong paisak hi,’ ka ci ciang, ‘Ama min akua ziam’ ci in amate in kei hong dongh tu hi. Tua ahikom bangbang son thei tu khi ziam?” ci kik hi.

¹⁴Pathian in, “Keima sia Keima ka hi hi. Amate tungah hisia na son hamtang tu hi: ‘KEIMA a kici khat in note kungah kei hong paisak hi.’

¹⁵Keima, TOPA a taanghpupite ii Pathian, Abraham, Isaac le Jacob te ii Pathian in amate kungah nang kong paisak sia Israel te tungah son in. Hi sia in a tawntung ka min hi; maisang hong piang tu khang theampo in hi bangin keima hong sam tu hi.

¹⁶Pai in a, Israel lampuite kaikhawmin, Keima TOPA a taanghpupite ii Pathian, Abraham, Isaac le Jacob te ii Pathian in note mai ah hong kilangh ka hi sia amate tungah son in. Amate kungah ka pai zo a, Egypt te ii amate tungah a vawtna teng ka mu hunlam amate son in.

¹⁷Nasia tak vawtsiat a thuakna Egypt pan amate ka pusua pui tu a, leihoi leiphana mun — Canaan mite, Hit mite, Amor mite, Periz mite, Hiv mi te le Jebus mite teenna ngam ah amate paipui tu in ka khensat zo hi.

¹⁸“Ka mite in nangma thuson hong ngai tu uh hi. Tua zawkciang Israel lampuite taw Egypt kumpipa kungah pai in a, ama tungah, ‘Hebrew te ii Pathian TOPA sia kote tungah ama le ama hong kilaak zo hi. Tu in sennealngam sungah TOPA, kote Pathian tungah sangaw biakpiakna ka piak thei natu uh in, kote ni thum sung khual hong hawsak ta'n,” ci tu ni hi.

¹⁹Zawthawk thu taw a kisawl bua nale Egypt kumpipa in note hong paisak ngawl tu cisia ka he hi.

²⁰Ahizong ka vaangletna zanghin, a lauhuai nate tua munah ka vawtna taw Egypt daan ka pia tu hi. Tua zawkciang ama in note hong paisak tu hi.

²¹“Ka mite a pai ciang, khut nguak masuan in a pai ngawl natu in Egypt te in note kong upatsak tu hi.

²²Israel numei theampo in a innpaam Egypt te le a innkuanpui Egypt numei pawpo kungah pai in nik le puan, khamh le ngunn, suang manphate na ngen tu uh hi. Israel te in tua nate a tapate a tanute in silhsakin, Egypt te hauna teng laaksak siat tu uh hi,” ci hi.