Read Siyin Chin Pusuana 30 Bible Online

Pusuana 30 - Siyin Chin bible

Pusuana 30

¹“Paaknamtui hal natu in biaknatau khat acacia thing taw vawt in.

²A sau centimetre 45, a zai centimetre 45, le a saang centimetre 90 hi tu a, a pangh kikim in kiing li nei tu hi. A kiing li in a dokte biaknatau taw sakhat hi tu hi.

³A sitna tung, a pangh li teng le a dokte khamh ciitak taw tuam in a, a mong kiimkot teng khamh taw zial in.

⁴A zawn natu thingpumte thun natu in khamh kual nii vawt in, a tungsang pangh a kiingte nii nuai ah bul in.

⁵A zawnna thingpumte acacia thing taw vawtin, khamh taw tuam in.

⁶Thuciamna Thingkuang mai ah a kikhai puankhaite pua sangah tua biaknatau koi in. Tua mun sia no kong mu natu mun ahi hi.

⁷Aaron in zing simin meivakte kinging tu hong pai ciang biaknatau tungah ngimnamtui hal tu hi.

⁸Ama in nitakin mei a det ciang tuabang ma in vawt tu hi. Hi ngimnamtui biakpiakna sia hong pai tu hun theampo tatsat ngawlin a vawt tu ahi hi.

⁹Hi biaknatau tungah a kikhaam ngimnamtui biakpiakna, nganhing biakpiakna ahibuale, antang taw biakpiakna bangma pia heak vun, Sapittui biakpiakna zongh buak heak vun.

¹⁰Mawphelna in a kipia nganhing chi, tua biaknatau dok lite tung a noina taw Aaron in kum khatin khatvei a zeksa biaknatau thiansuana vawt tu hi. Hi biakpiakna sia hong pai tu hun theampo kum simin kivawt tu hi. Keima TOPA tungah hong ki aap hi biaknatau sia thiangtho sitset tu hi,” ci hi.

¹¹TOPA in Moses tungah,

¹²“Israel mite ii mihing simna a nei ciang, a mi phaza a kisim laitak amate tungah tuasiatna a thet ngawl natu in mi theampo in a nuntakna ii man kei tungah hong pia tu uh hi.

¹³Mihing simna ah a kihel peuma in, a kizangh ngei khaikhin taw tee in a kinget za sum pia tu hi. A kuama po in tua sumte kei tungah biakpiakna in hong pia tu hi.

¹⁴Kum kul pan a tungsia a pha peuma mihing simna ah a kihel theampo in kei tungah tua sum hong pia tu hi.

¹⁵A nuntakna ii man hi sum a piak uh ciang a haute in a tamzaw, a zawngte in a tawmzaw ci bangin pia ngawl tu hi.

¹⁶Israel mite tung pan hi sum khon in a, ka ompuina Puanbuk puuaphatna in zangh in. Hi phiangshia sia a nuntakna ii man tu hi a, tuasia taw amate ka cin ka kep tu ka phawk tu hi,” ci hi.

¹⁷TOPA in Moses tungah,

¹⁸“Taaukuang khat le taau taw kivawt a ngakna khat vawt in. Puanbuk le biaknatau kilaklaw ah koi in a, a sungah tui koi in.

¹⁹Aaron le a tapate in tua tui a khut le a peangte silna in a zak tu hi a,

²⁰amate puanbuk sung ahibuale biaknatau nai ah biakpiakna ante pia tu in a pai ma in kisil tu hi. Tuasia ciang amate kithatlum ngawl tu hi.

²¹Amate a thi ngawl natu in a khut le a peangte a sil kul hi. Hi ngeina sia amate le a suan a paalte in a tawntung a zui tu ahi hi,” ci hi.

²²TOPA in Moses tungah,

²³“A phabel hel namtuite — Myrrh paaknamtui tui kilogramme 6, a ngimnamtui thingzungthum kilogramme 3, tu ngimnamtui kilogramme 3,

²⁴le cassia kilogramme 6 la in. (A vekpi in a ngitna sia a kizangh ngei khaikhin taw kitee hi tu hi.) Olive thau litre 4 belap in,

²⁵paaknamtui hel bangin noi sathau thiangtho vawt in.

²⁶Hi sathau sia ka ompuina Puanbuk, Thuciamna Thingkuang,

²⁷sabuai le a na theampo, meikhuam le a na theampo, paaknamtui halna biaknatau,

²⁸meihal biakpiakna biaknatau le a na theampo le kisilna kuang le a ngakna teng noai in.

²⁹Hi nate hi bangin na aap tu uh a, tua hile thiangtho sitset tu hi. Tuate a thutha peuma tua thianthona vaang in ngim ngasak tu hi.

³⁰Tuaciang Aaron le a tapate sathau noai in a, keima na a seam thiampi tu in thupha taw kipsak in.

³¹Israel mite tungah, ‘Hi a thiangtho noi sathau sia ka nasepna sung hong pai tu hun theampo ah kizangh top tu hi.

³²Hi sathau sia nautaangte tungah na buak buatu uh a, hisia taw a kibang khat po vawt natu in hi sathau helzia sia ma na zangh buahet tu uh hi. Tuasia in thiangtho a, a thiangtho in na vawt kul hi.

³³Hi sathau taw a kibang a vawt khat po ahibuale thiampi ahi ngawl khat pawpo tungah a zangh sia keima mi in kisim nawn ngawl tu hi,’ ci in” ci hi.

³⁴TOPA in Moses tungah, “A nuai a hel namtuite — stacte, onycha, galbanum le frankincense paaknamtui ciitak te a khen kikim tekin la in.

³⁵Tua nate paaknamtui hel bangin, ngimnamtui vawtna ah zangh in. A sit ahi natu le a thiantho natu in ci saw in.

³⁶Aheap sia suuvui in a, ka ompuina Puanbuk ah paipui in, Thuciamna Thingkuang mai ah the in. Hi ngimnamtui sia a thiangtho sinsen in ngaisun in.

³⁷Tua paaknamtui taw kibangin noma atu khat po sia a helnazia sia ma zangh in na vawt buatu hi. Kei tungah hong ki aap a thiangtho na khat bangin ngaisun in.

³⁸Tua paaknamtui taw kibangin zak tu khat po a vawt a om le keima mi in kisim nawn ngawl tu hi,” ci hi.