Read Siyin Chin Pusuana 32 Bible Online

Pusuana 32 - Siyin Chin bible

Pusuana 32

¹Moses mual tungah ngei hialma om in hong tuaksuk ngawl sia mipite in a mu ciang Aaron kungah kikhawmin ama tungah, “Egypt pan lam hong pui Moses hisia pa bang tat ziam ih he bua hi; tua ahikom eite lam hong pui tu in pathian khat hong vawtsak ta'n,” ci uh hi.

²Aaron in amate tungah, “Na zite, na tapate le na tanute ii a baa khamh bilbaate suutin kei kungah hong paipui tavun,” ci hi.

³Tuaciang mi theampo in a khamh bilbaate suutin Aaron kungah paipui uh hi.

⁴Aaron in tua bilbaate la in tuisak a, khui milim vawtna sungah sung in khamh khuitalno khat vawt hi. Mipite in, “Israel awng, hisia in Egypt pan hong pusuapui ih pathian ahi hi!” ci uh hi.

⁵Tua zawkciang Aaron in khamh khuital mai ah biaknatau khat vawtin, “Zing ciangin TOPA patoaina in poai kikhaam tu hi,” ci in taangko hi.

⁶A zing ciang zingtuungin amate in nganhing pawlkhat sangaw meihal biakpiak natu le a dangte sia kipawlkhop biakpiakna ah neak tu in hong paipui uh hi. Tua poai ah mite tokhawm in etlawm ngawl za dongin neakna dawnna le numei le pa paktatna suaksak uh hi.

⁷TOPA in Moses tungah, “Manlang in ciasuk ta'n, banghang ziam cile Egypt pan na paipui na mite khialin kei hong nial uh hi.

⁸A zui tu in ka thupiak lampi pan pial zo hi; khamh khuital vawtin bia uh a, sangaw biakpiakna pia zo uh hi. Amate in hisia Egypt pan a pusua pui amate ii pathian hi ci uh hi.

⁹Hi mihingte thinpuizia ka he hi.

¹⁰Tu in, kei hong tho tu hanciam heak in. Amate tungah ka thin uuk a, ka mongsak tu hi. Tua zawkciang nangma le na suan na paalte minam lian khatin kong vawt tu hi,” ci hi.

¹¹Ahizong Moses in TOPA a Pathian tungah hesuak ngenin, “TOPA awng, na thahatna le na vaangletna taw Egypt pan na suatak, na mite tungah banghangin na thin uuksak mama thong ni ziam?

¹²A mite mual tungah that in a mot nop manin, nangma in Egypt pan pusua pui hi banghang Egypt te in ci theisak tu ni ziam? Na thin uuk thaisak in; na ngaisutna kheal in a, na mite tungah tuasiatna tungsak heak in.

¹³Na naseamte ahi, Abraham, Isaac le Jacob phawk in. Amate tungah ciliap huai takin na kamciam ahi, a suan a paalte van ah aksi za in tam tu a, a suan a paalte in na khapsa ngam theampo a tawntungin amate ii neisa hi tu hi, na ci thute phawk in,” ci hi.

¹⁴Tua ahiciang TOPA in a ngaisutna khealin, a mite tungah a tawn bangin tuasiatna tungsak ngawl hi.

¹⁵Mualtung pan Moses tuaksuk a, thupiakte a mai lang le lang ah a ki at suangpheakte nii toai hi.

¹⁶Hi suangpheakte Pathian vawt hi a, a tungah thupiakte ama mama ii khet sa ahi hi.

¹⁷Mipite auna Joshua in za a, Moses tungah, “Ngiaphual sungah ngal kisimna aw ka za hi,” ci hi.

¹⁸Moses in, “Tua aw sia ngalzawna aw le hi ngawl, ngallelna aw zongh hi ngawl a; tua sia lasakna aw hi,” ci hi.

¹⁹Moses ngiaphual nai ah hong pai in khuital milim le mihingte lap a mu ciang a thinso hi. Tualai mualpeang ah, a toai suangpheakte nii lei denna nei in tamhthamsak hi.

²⁰Moses in amate vawt khuital no la in, tuisak a, ngoaivui in tui taw hel hi. Tua zawkciang ama in tua tui Israel mite nesak hi.

²¹Ama in Aaron munah, “Amate in tuabang a cizathuai mawna na vawtsak natu in nang bang hong law ziam?” ci hi.

²²Aaron in, “Kei tungah hong thin uuk heak in; hi mihingte ii siatna a vawt nop hamtang sia he ni hi.

²³Amate in kei tungah, ‘Egypt pan hong pusuapui hi mipa Moses bang tat ziam, ih he bua hi; tua ahiciang kote hong lampui tu in pathian khat hong vawtsak ta'n, hong ci uh hi.’

²⁴Amate ii kizepna manpha khamhte hong paipui natu in ka sawl a, a nei peuma in suutin kei hong pia uh hi. Tua a manpha kizepnate mei sungah ka vawk a, khuitalno milim suak hi,” ci in zo hi.

²⁵Aaron in a mite uk zawk pang ngawl a omsak sia le, a ngalte mai ah a mawmaw bangin a omsakna thu Moses in mu hi.

²⁶Tua ahiciang Moses in ngiaphual kongpi ah dingin au a, “TOPA sangah a pang peuma hi lai ah hong pai tavun!” ci hi. Tuasia ciang Levi mite theampo ama kungah kikhawm uh a,

²⁷Moses in amate tungah, “Israel te TOPA Pathian in na namsau tek taw hi ngiaphual kongpi pan a langkhat dong pai in, na suapuite, na ngualtamhte le na innpaamte thatlum tu in note theampo hong sawl hi,” ci hi.

²⁸Levi mite in a thu ni a, tua ni in mihing tulthum bang thatlum uh hi.

²⁹Moses in Levi te tungah, “TOPA ii nasepna sungah thiampite a seam tu in na tapate, na suapuite na thalupna uh taw in noma tek tuni in kipumpiak zo na hi uh kom, TOPA in note a thupha hong pia zo hi,” ci hi.

³⁰A zing ciang Moses in mipite tungah, “A cizathuai mawna khat vawt zo nu hi. Ahizong tu in mualtung TOPA kungah ka na paito kik tu a; note mawmai natu nga thei tha tu khi hi,” ci hi.

³¹Tuaciang TOPA kungah Moses heakkik in, “Hi mite in a cizathuai mawna vawt zo hi. Amate in khamh taw pathian khat vawt in bia uh hi.

³²Nong hesuakna in a mawna maisak in; ahizong na maisak zo buatu le, na mite min na khumna laibu sung pan ka min hong phiat ta'n,” ci hi.

³³TOPA in, “Ka tungah mawna a neite bek ka laibu sung pan a min ka phiat tu hi.

³⁴Tu in pai in kong sonna munah mihingte paipui in. Ka vantunglalang in lam hong lak tu phawkin a, ahizong a hun a cin ciang hi mihingte a mawna daan ka pia tu hi,” ci in zo hi.

³⁵Tua ahikom, TOPA in mite tungah natna tungsak hi, banghang ziam cile amate in Aaron khamh khuitalno milim a vawtsak hang ahi hi.