Read Siyin Chin Pusuana 35 Bible Online

Pusuana 35 - Siyin Chin bible

Pusuana 35

¹Moses in Israel taangpi taangta bup kaikhawm in amate tungah, “Hi thu sia na ngamtat natu uh TOPA thupiak ahi hi:

²ni luk sung noma na, na seam tu uh a, ahizong ni sali ni sia ni thiangtho hi tu a, keima, na TOPA atu a kikoituam, a ciliaphuai tawlngak ni hi tu hi. Tua ni in na a seam peuma kithatlum tu hi.

³Sabbath ni in na inn uh ah mei ngawngawn thut ngawl tu nu hi,” ci hi.

⁴Moses in Israel mite theampo tungah, “Hisia TOPA thupiak ahi hi:

⁵TOPA tungah piakkhiat khat nei vun. A pia nuam peuma in, khamh, ngunn, taau;

⁶puan neal; vancii, a sandup le a san samul puan; kealmul taw a kivawt puan;

⁷a san kinimh tuutal vun; savun neal; acacia thing;

⁸meidet sathau; noi sathau atu le ngimnamtui atu hel namtuite;

⁹ephod le Thiampi Lianbel ii awmdal ah bul tu suangmanpha san le a dang suangmanphate paipui tu nu hi.

¹⁰“Note sung pan thiamna nei naseam mi theampo hong pai in TOPA thupiak theampo vawt hen:

¹¹Puanbuk, a sitna le a puasang sitna, a vanh khaina koaite le a kalte, a zawlte, a khuamte le a tawdapte;

¹²Thuciamna Thingkuang, a puakna thingpumte, a sitna le a dalna puankhai;

¹³sabuai, a puakna thingpumte le a vanh theampo; Pathian a piak anluum;

¹⁴meidet natu meikhuam le a vanhte, meiinnte le meidet sathau,

¹⁵ngimnamtui halna tu biaknatau le a puakna thingpumte; noi sathau; ngimnamtui; Puanbuk kongbiang puankhai;

¹⁶meihal biakpiak natu biaknatau le a saaksai, a zawnna thingpumte le a vanh teng; kisilna kuang le a ngakna;

¹⁷a doituam atu puankhaite, a khuamte le a tawdapte; a doituam tumna kongbiang puankhai;

¹⁸Puanbuk le doituam atu khetphinte le khaute;

¹⁹Tuaciang Thiangtho Mun ah thiampite in na a sep ciang a silh tu a tuanngen, a et hoi puante — thiampi Aaron le a tapate atu puan thiangthote a vawt tu ahi hi.

²⁰Israel mite theampo cia siat a,

²¹tuaciang TOPA ii ompuina Puanbuk a vawt nuam peuma in TOPA tungah piakkhiatna khat keng tek hi. Amate in biakna tu in a kisamh le thiampi puante vawt natu in a kisamh vanhte theampo hong paipui uh hi.

²²Piak nopna thin a nei numei le pasal te in kizepna phinte, bilbaate, khutzungbute, khite le khamh suang manpha namcinte paipui in, TOPA tungah aap uh hi.

²³Puan neal; vancii, a sandup, a san samul puan; kealmul puan; a san a kinimh tuutal ii vun; ahibuale savun neal paipui uh hi.

²⁴Ngunn ahizong, taau ahizong a pia theite in TOPA atu in pia tek a, nasep natu khat pawpo ah a kizangh thei tu acacia thing a nei peuma in hong paipui tek uh hi.

²⁵Thiamneal vawt thei numei theampo in amate vawtsa puan neal, khau le samul khau vancii, a sandup le a sante hong paipui uh hi.

²⁶Amate in kealmul taw khauzam zongh vawt uh hi.

²⁷A lampuite in ephod le awmdal ah a bul tu in suangmanpha san le a dang suangmanpha te,

²⁸tuaciang meidet sathau, noi sathau le a ngimnamtuite atu in hel namtuite le sathau hong paipui uh hi.

²⁹TOPA in Moses tungah nasep tu a thupiak bangin, a pia nuam Israel mite theampo in TOPA tungah a piakkhiatna tek hong paipui uh hi.

³⁰Moses in Israel te tungah, “Judah minam sung pan Hur ii tupa ahi, Uri ii tapa Bezalel TOPA in teal zo hi.

³¹TOPA in Bezalel sia ama ii vaangletna taw kidimsakin, khutthiamna, hi theina, le thiamneal nasep tuatuamte heaktheina,

³²pungsaan ngeal thiamna tuatuamte le tua teng khamh, ngunn, le taaute taw vawt theina;

³³kizepna suangmanpha tat thiamna; thingngel thiamna le thiamneal nasep tuatuamte pia hi.

³⁴TOPA in ama, Bezalel le Dan minam sung pan Ahisamach ii tapa Oholiab tungah midangte khutthiamna a hil tu in pilna pia zo hi.

³⁵TOPA in amate tungah khutthiamte, a ngeal thiamte, le thiamtak thiamte, vancii, a dup au le a san tuumul le a dang puante theampo sep thiamna pia zo hi. Amate in nasep namkim seam thei in, a ngeal thiamte ahi uh hi.