Read Siyin Chin Pusuana 38 Bible Online

Pusuana 38 - Siyin Chin bible

Pusuana 38

¹Ama in meihal biakpiak natu in acacia thing taw biaknatau khat vawt hi. Tua in a dung a vai a kikim hi a, a sauna metre 2.2 le a zaina metre 2.2 le a saanna metre 1.3 ahi hi.

²Biaknatau taw sakhat a suak tu in ama in a king li te dawn doksak hi. Ama in tua a dokte taau taw tuam hi.

³Biaknatau ah vanh zak tu in bealte, keaute, kuangte, a koaite le vut luana kuangte zongh vawt hi. Hi vanh teng theampo taau taw vawt hi.

⁴Ama in taau saaksai khat vawtin biaknatau saanna a lang bansuk in biaknatau ii ngong nuai ah koi hi.

⁵Ama in zawn natu kual li vawtin a kingte li ah koi hi.

⁶Ama in acacia thing taw zawnna thingpumte vawtin, taau taw tuam a,

⁷biaknatau lang le lang ah a om kualte sungah thun hi. Biaknatau sia thingpheak taw vawtin a sung hawmsak hi.

⁸Ama in TOPA ii ompuina Puanbuk tumna kongbiang ah naseam numeite neisa limlanghte taw taau kuang le taau tawdap vawt hi.

⁹Ama in puanneal puankhaite taw TOPA ompuina puanbuk atu doituam vawt hi. A thangsang pangh doina puankhaite sia metre 44 sau a,

¹⁰tua puankhaite sia ngunn taw kivawt puankhaina koaite le a ciangte taw taau tawdap kul a nei taau khuam kul tungah kikhak hi.

¹¹A saksang pangh doina zongh tuabang ma ahi hi.

¹²Nitumna sang a pangh doina puankhaite sia metre 22 sau in, ngunn taw a kivawt puankhaina koaite le a ciangte taw ngunn tawdap sawm a nei khuam sawm tungah kikhak hi.

¹³A kongbiang omna nisuana sang teng doina sia metre 22 ma zai hi.

¹⁴Kongbiang langkhat veve puankhaite metre 6.6 veu zai a, tawdap thum a nei khuam thum tungah kikhak hi.

¹⁶Doituam kiimkot puankhai theampo puanneal phate taw kivawt hi.

¹⁷Khuam tawdapte taau taw kivawtin, vanh khaina koaite, ciangzawlte le khuam tung sitnate ngunn taw kivawt hi. Doituam kiimkot khuam theampo ngunn ciangzawlte taw kizom siat hi.

¹⁸Doituam tumna kongbiang puankhai sia vancii, a sandup le a san samul taw a kitak, thiamngel in a kizeam puanneal puan pha taw kivawt hi. Tua puankhai sia doituam ii puankhaite bangma in metre 9 sau a, metre 2 saang hi.

¹⁹Tua puankhai sia taau tawdap li a nei khuam lite tungah kikhak hi. Puan khaina koaite, a dawn tuamnate le a ciangzawlte ngunn taw kivawt hi.

²⁰Puanbuk le doituam kiimkot letna khetphin theampo taau taw kivawt hi.

²¹Thupiak sawmte a ki atna suangpheak niite koina ahi, TOPA ii ompuina Puanbuk sungah na zakte a nuai a bang ahi hi. Tua tepteena lai vawt tu Moses in sawl a, thiampi Aaron ii tapa Ithamar khutnuai a naseam Levi mite in vawt hi.

²²Judah minam sung pan Hur ii tupa, Uri ii tapa Bezalel in TOPA ii thupiak bangin seam siat hi.

²³Ama a hupa Dan minam sung pan Ahisamach ii tapa Oholiab sia suang tung laikhen thiam, a ngeal thiam, le vancii, a sandup, a san samul puan le puanneal pha a tak thiam khat ahi hi.

²⁴A thiangtho puanbuk atu TOPA tungah a ki aap khamh teng a kizangh ngei khaikhin taw a kitee ciang kilogramme tul khat ngit hi.

²⁵Misimna bangin a kipia ngunn teng a kizangh ngei khaikhin taw a kitee ciang kilogramme 3,430 ngit hi.

²⁶Hite sia mihing kisim lai in mi sim ii 22 a piak teng kingawm in biakinn khaikhin taw a kitee ahi hi. Kum kul pan a tungsia teng a kisim ciang a vekpi mi 603,550 pha hi.

²⁷Tua ngunnte sung pan kilogramme 3,400 teng a thiangtho Puanbuk le puankhai atu tawdap zakhat te vawt natu in kizangh a, tawdap khat ciang kilogramme 34 veu kizangh hi.

²⁸Bezalel in, a taanglai ngunn kilogramme 30 taw a ciangzawlte, a khuamte tungah vanh khaina koaite le a dawn tuamnate vawt hi.

²⁹TOPA tungah a ki aap taau theampo kilogramme 2,425 ngit hi.

³⁰Ama in tua taaute taw TOPA ompuina Puanbuk tumna kongbiang tawdapte, taau saaksai a nei biaknatau, biaknatau atu vanh theampo vawt hi.

³¹Doituam kiim le a tumna kongbiang tawdapte le Puanbuk le doituam kiimkot letna in a kizangh khetphin theampo ama in taau taw vawt hi.