Read Siyin Chin Pusuana 39 Bible Online

Pusuana 39 - Siyin Chin bible

Pusuana 39

¹A Thiangtho Mun ah thiampite na a sep ciang a silh tu in vancii, a sandup le samul san taw a tuanngen puansilhte vawt uh hi. Moses tungah a thupiak bangin amate in Aaron atu in thiampi puante vawt uh hi.

²Ephod sia puanneal; vancii, a sandup le a san samulpuan le khamh khauzam taw vawt uh hi.

³Amate in khamh dalte seakin, a paa in zen a, puanneal phate le vancii, a sandup le a san samulpuante taw khui khawm uh hi.

⁴Amate in a sawm natu liangkhai nii vawt a, ephod a kho thei natu in a pangh ah khii hi.

⁵TOPA in Moses tungah a thupiak bangin a vanhzak kibang, pha takin a kitak kawngkhau sia ephod taw sakhat tu in, a tungah khii hi.

⁶Amate in carnelian suangsante taatin khamh dapphate tungah suang hi; tuate tungah Jacob tapa sawm le niite min teng suanglai khen thiamte in khensak hi.

⁷TOPA in Moses tungah a thupiak bang tatakin Israel minam sawm le niite taang tu in, amate in tua suangsante ephod liangkhai puan tungah suang uh hi.

⁸Amate in thiamngelna le ephod vawtna in a kizangh vanhte taw ma in awmdal vawt uh hi.

⁹Tua in a kikim king li nei in thuap nii in kithep a, centimetre 22 sau, centimetre 22 zai hi.

¹⁰Amate in tua awmdal tungah suangmanpha ngual li in suang a, ngual khatna ah ruby, topaz le garnet;

¹¹ngual niina ah emerald, sapphire le diamond;

¹²ngual thumna ah turquoise, agate, le amethyst;

¹³le ngual lina ah beryl, carnelian le jasper te ahi hi. Tua suangte khamh dapphate tungah suang uh hi.

¹⁴Israel minam sawm le niite taang tu in, suang sawm le niite tungah Jacob tapa sawm le niite khat tek ii min khen hi.

¹⁵Awmdal atu in khauhualte bangin a kipheak khamh ciitak khi nguite vawt hi.

¹⁶Amate in khamh dappha nii le khamh kual nii vawtin, khamh kual niite awmdal a tungsang king veve ah belh uh hi.

¹⁷Amate in khamh khau niite sia kual niite tungah khit a,

¹⁸a dappha niite tungah a mong niite khit hi, tuabangin ephod liangkhai puan mai sangah tuate belh uh hi.

¹⁹Amate in khamh kual nii vawtin, ephod zawkciang sungsang awmdal ii nuaisang mongte nii ah belh uh hi.

²⁰Amate in khamh kual nii vawt thua in, ephod liangkhai puante nii ii nuai, a maisang a kipeena kungah pha takin a kitak kawngkhau tung san ah belh uh hi.

²¹TOPA in Moses tungah a thupiak bang tatakin kawngkhau tungah awmdal sia a kawm ngawl natu in amate in awmdal kualte ephod kualte tungah vancii khau taw sawm uh hi.

²²Amate in ephod nuai ah a kisilh puantual sia vancii samul khau ngitnget taw tak uh hi.

²³Lu thun natu in a vang sia a ek ngawl natu in puan kitak sa taw kikhui thua hi.

²⁴TOPA in Moses tungah a thupiak bang tatakin puantual mong nuai sang kiim tengah amate in puanneal pha taw a kivawt le vancii, a sandup le a san samul puan taw kivawt talee ngate, khamh ciitak taw a kivawt tengeng te taw kithatheak in koi hi.

²⁷TOPA ii Moses tungah a thupiak bang tatakin amate in Aaron le a tapate atu in laktong,

²⁸dial, lukhu, puanneal ngoaipuan tom le

²⁹puanneal, vancii, a sandup le a san samul taw a kivawt thiamngel in a kizeam kawngkhau vawtsak hi.

³⁰Amate in khamh ciitak taw TOPA tungah ki aapna lim lakna thiangtho a hi, kizepna vawtin tua tungah, “TOPA atu Kitavaw” ci in khen uh hi.

³¹TOPA ii Moses tungah a thupiak bang tatakin amate in tua kizepna sia dial mai sangah vancii khau khat taw khii uh hi.

³²TOPA ompuina Puanbuk nasep theampo kizo siat zo hi. TOPA ii Moses tungah a thupiak bang tatakin Israel mite in na theampo seam uh hi.

³³Amate in Moses kungah Puanbuk le a vanh theampo, a vanh khaina koaite, a kalte, a zawlliang a tuukpite, a khuamte le a tawdapte;

³⁴a sanin a kinimh tuuvun taw a kivawt a sitna; savun ciitak taw a kivawt a sitna; puankhai;

³⁵suangpheakte a kikoina Thuciamna Thingkuang, a thingpumte le a sitna;

³⁶sabuai le a vanhte theampo, Pathian a piak anluum;

³⁷khamh ciitak meikhuam, a meiinnte, a vanhzak theampo le meidet sathau;

³⁸khamh biaknatau; noi sathau; ngimnamtui; Puanbuk kongbiang puankhai;

³⁹taau saaksai taw kithua biaknatau, a thingpumte, a vanhzak theampo; khut silna kuang le a ngakna;

⁴⁰doituam atu puankhaite, a khuamte le a tawdapte; kongbiang puankhai le a khaute; Puanbuk khetphinte; puanbuk sungah a kizangh tu vanhzak theampo;

⁴¹tuaciang a Thiangtho Mun ah thiampite silh tu puansilh tuanngente — thiampi Aaron le a tapate atu in puan thiangthote hong paipui uh hi.

⁴²TOPA ii Moses tungah a thupiak bang tatakin Israel mite in nasep theampo seam siat uh hi.

⁴³Moses in a nasepna teng sit siat a, TOPA thupiak bangin a sep siatna thu mu hi. Tua ahiciang Moses in amate thupha pia hi.