Read Siyin Chin Pusuana 4 Bible Online

Pusuana 4 - Siyin Chin bible

Pusuana 4

¹Tuasia ciang Moses in TOPA tungah, “Ahizong Israel te in kei hong um ngawlin ka thuson hong ngai ngawl tu ci tawng. Amate in nang tungah TOPA hong kilangh ngawl hi, hong ci thong le bangbang hi tu khi ziam?” ci in zo hi.

²Tua ahiciang TOPA in, “Nang bang toai ni ziam,” ci in dongh hi. Ama in, “Ciangkhut khat toai khi hi,” ci in zo hi.

³TOPA in, “Na ciangkhut lei ah lawn in,” ci hi. Moses in a ciangkhut a lot ciang ngul khat suakin, tua sia kung pan Moses tai hi.

⁴Tuasia ciang TOPA in Moses tungah, “Kunsuk in a, a mei pan zamh in,” ci hi. Tuaciang Moses in kunsuk in man a, ciangkhut suak kik hi.

⁵TOPA in, “Amate taanghpupite ii Pathian, Abraham, Isaac le Jacob te ii Pathian nang tungah hong kilangh ahi hunlam sia Israel te ii tel natu in hi bangin vawt in,” ci hi.

⁶TOPA in Moses tungah, “Na khut na puan sungah koi in,” ci kik hi. Moses in a thu ni hi; a khut a laak kik ciang a khut tungah vuuk bangin a kaangpawl ciptepte in tuam hi.

⁷Tuasia ciang TOPA in, “Na khut na puan sungah koi kik in,” ci hi. Moses in koi kikin, a laak kik ciang a pumpi dangte taw kibangin dam kik hi.

⁸TOPA in, “Amate in nalamdang lakna a khatna sia taw hong um thei buale zong tu a sia taw in nang hong um tu uh hi.

⁹Hi nalamdang lakna niite taw zongh hong um zo bualai a, na thu hong ngai ngawlin hong nial le, Nile ngun pan tui tawm la in lei ah sung in. Tua tui sia chisan suak tu hi,” ci hi.

¹⁰Ahizong Moses in, “Hi thei bo, TOPA awng kei hong sawl heak in. Thu son ka thiam ngei bua a, nangma nong paupui ciil a kipan tu dong thuson ka thiam tuan bua hi, kampau ka thiam bua hi, ka aw tawn in ka pau awk hi,” ci hi.

¹¹TOPA in Moses tungah, “Mihingte ii kam le muk akua in pia ziam? Akua in nangong le kampau thei ngawlin vawt ziam? Akua in khua musak a, akua in mittawsak ziam? Tua in TOPA Keima ka hi hi.

¹²Tu in, va pai ta'n! Na kampau kong hu tu a, na thuson tu kong hil tu hi,” ci hi.

¹³Ahizong Moses in, “Hi thei bo, TOPA awng, nong hesuakna in midang khat pawpo sawl zaw ta'n,” ci in zo hi.

¹⁴Tuasia ciang Moses tungah TOPA thin uuk a, “Levi mi, na suapuipa Aaron bangbangziam? Ama pha tak a pau thei sia ka he hi. A tatakin ci leang nang taw kimu tu in, tu in ama hong pai a, nang hong mu tu lawp mama tu hi.

¹⁵Ama tungah thu son thei tu ni hi, a son tu teng hil in. Na nii in na thuson kong hu tu a, na vawt tu uh teng kong hil khawm tu hi.

¹⁶Ama sia nang taang in a paupa hi tu a, mite tungah thuson tu hi. Tuasia ciang nangma Pathian bang na hi tu a, a ci tu teng na son tu hi.

¹⁷Hi ciangkhut keng ta'n; banghang ziam cile tuasia taw nalamdang laknate na vawt tu hi,” ci hi.

¹⁸Tuasia ciang Moses sia a sunghpa Jethro kungah pai kik in ama tungah, “Egypt ngam ah ka mealheakte a nungta lai ziam maw a vil tu in nong hesuakna in hong ciasak ta'n,” ci hi. Jethro thukim a ciidam in va cia ta'n ci hi.

¹⁹Midian ah Moses a om lai in TOPA in, “Egypt ah heak kik ta'n, nang hong that nuamte thi siat zo hi,” ci hi.

²⁰Tuaciang Moses in a zi le a tapate a laate tungah tosakin Egypt zuan uh hi, Pathian ii a sawl ciangkhut sia keng hi.

²¹TOPA in Moses tungah, “Tu in Egypt ah cia kik tu na hi ciang nalamdang lakna theampo a vawt thei tu in vaangletna kong piaksa hi a, kumpipa mai ah vawt tatak tu ni hi. Ahizong kumpipa thin ka sahsak tu a, ama in mihingte paisak ngawl tu hi.

²²Tuasia ciang nangma in kumpipa tungah, keima TOPA in ‘Israel sia ka tapaciil hi.

²³Keima hong biak thei natu in ka tapa paisak in, hong ci khi hi, ahihang nong nial hi. Tu in, na tapaciil thatlum tu khi hi,’ ci in na son tu hi” ci kik hi.

²⁴Egypt paina lampi, ngiaphual ah TOPA in Moses taw kimu in thalup sawm hi.

²⁵Tuasia ciang a zi Zipporah in suanghiam khat la in a tapa ii vunteap attansak a, tuasia taw Moses ii peang kithuthasak hi. Vunteap at ngeina zeksa hangin a zi in Moses tungah, “Nang sia kei tungah chisan taw kipawl ka pasal hi ni hi!” ci hi. Tua ahikom, TOPA in Moses ii nuntakna khoaikhe hi.

²⁷Tua hunsung in TOPA in Aaron tungah, “Moses taw kimu tu in, sennealngam sungah pai in,” ci hi. A sawl bangin mual thiangtho ah pai a; Moses taw a kimu ciangin namh hi.

²⁸Tuaciang Moses in Egypt ah heakkik in a ci lai a, TOPA kam vaithak theampo le TOPA ii sep tu in a sawl nalamdang lakna tu thute zongh Aaron tungah son siat hi.

²⁹Tua ahiciang Moses le Aaron Egypt ah paikhawmin Israel lampuite theampo kaikhawm uh hi.

³⁰TOPA ii Moses tungah a thuson teng Aaron in amate tungah son kik siat hi, tua zawkciang Moses in mite mai ah nalamdang lakna theampo vawt hi.

³¹Amate in um uh hi. Amate kungah TOPA pai in kivawtsiatna a thuaknate Topa ii a mu sakna thu teng a zaak uh ciang amate kunin TOPA bia uh hi.