Read Siyin Chin Pusuana 40 Bible Online

Pusuana 40 - Siyin Chin bible

Pusuana 40

¹TOPA in Moses tungah,

²“Tha masa, a ni khat ni in TOPA ii ompuina Puanbuk sia lemh in.

³Thupiak Sawmte koina Thuciamna Thingkuang tua buk sungah koi in, a mai ah puankhai khai in.

⁴A sungah sabuai tumpui in a tungah vanhte koi in. Meikhuam zongh la in a, meivakte bul in.

⁵Thuciamna Thingkuang mai ah ngimnamtui hal natu in khamh biaknatau koi in a, Puanbuk kongbiang ah puankhai khai in.

⁶Puanbuk mai ah meihal biakpiak natu in biaknatau koi in.

⁷Puanbuk le biaknatau kilaklaw ah khut silna kuang koi in a, tui dim in.

⁸A doituam kiimkot puan taw uumin a kongbiang ah puankhai khai in.

⁹“Tuaciang Puanbuk le a vanhzak theampo a thiangtho sathau noina taw aap in, tua hile thiangtho tu hi.

¹⁰Tua zawkciang biaknatau le a vanhte theampo a thiangtho sathau noina taw aap in, tua hile thiangtho sinsen tu hi.

¹¹Ta bangma in khut silna kuang le a ngakna zongh aap in.

¹²“Aaron le a tapate puanbuk kongbiang ah paipui in a, a zeksa kibualna neisak in.

¹³Aaron in keima na a seam thiampi a sep thei natu in thiampi puante silhsak in, sathau buakin, hi bangin ama aap in.

¹⁴A tapate paipui in, laktong silhsak in.

¹⁵Tuaciang thiampite bangin keima na hong sepsak thei natu in, a pa sathau na buak bangma, a tate zongh sathau buak in. Hi bang sathau buakna in amate maisang hun theampo ah thiampi suaksak tu hi,” ci hi.

¹⁶TOPA thupiak bangin Moses in na theampo seam hi.

¹⁷Egypt pan a pusua zawk a kum niina, a tha masa, a ni khat ni in, TOPA ii ompuina Puanbuk kilemh hi.

¹⁸Moses in a tawdapte pha sukin, a kalpheakte thua a, zawlliang le tuukpite thungin, a khuamte phut hi.

¹⁹Ama in TOPA thupiak bangin puanbuk tungah a sitna phalhin, a puasang tuipuan sia a tung pan khu hi.

²⁰Tuaciang ama in suangpheakte nii la in Thuciamna Thingkuang sungah koi hi. Ama in a zawnna thingpumte a bilvang sungah thun in, Thuciamna Thingkuang sitna khak hi.

²¹Tua zawkciang ama in Puanbuk sungah Thuciamna Thingkuang koi a, puankhai khak hi. TOPA thupiak bangin, Moses in Thuciamna Thingkuang hi bangin seal hi.

²²Ama in Puanbuk sung saksang, puankhai pua sangah sabuai koi a,

²³TOPA thupiak bangin TOPA a kipia anluumte, tua sabuai tungah lui hi,

²⁴ama in Puanbuk sung thangsang king, sabuai taw kingalsai in meivak khuam koi hi.

²⁵TOPA thupiak bangin tualai TOPA ii ompuina ah ama in mei de hi.

²⁶Ama in Puanbuk sung puankhai mai ah khamh biaknatau koi a,

²⁷TOPA thupiak bangin ngimnamtui hal hi.

²⁸Ama in Puanbuk kongbiang ah puankhai khak a,

²⁹tua mun puankhai mai ah meihal biakpiak natu in biaknatau koi hi. TOPA thupiak bangin tua biaknatau tungah ama in sangawna taw meihal biakpiakna le antang taw biakpiakna te seam hi.

³⁰Ama in Puanbuk le biaknatau kilaklaw ah kisilna kuang koi in tui dim hi.

³¹Moses, Aaron, le a tapate in tualai ah

³²TOPA thupiak bangin, Puanbuk sung le biaknatau ah a pai simin a khut le a peangte sil uh hi.

³³Moses in Puanbuk le biaknatau kiimkot teng uumin a doituam kongbiang ah puankhai khai hi. Tuabangin ama in nasep theampo man zo hi.

³⁴Tuasia ciang meei in Puanbuk tuam a TOPA ii ompuina khuavak taang velvol sia in tua puanbuk dim hi.

³⁵Hi bang ahi hu in Puanbuk sungah Moses tum thei ngawl hi.

³⁶Puanbuk pan meei a kilapto ciang bekin Israel te in a ngiaphual mun dangah khiin uh hi.

³⁷Tualai ah meei a kaai laiteng a ngiaphual khiin ngawl uh hi.

³⁸Duisung ah a vathap sung tawntungin amate in TOPA ii ompuina ahi, Puanbuk tungah sunin meei le zanin meikuang mu thei uh hi.