Read Siyin Chin Pusuana 6 Bible Online

Pusuana 6 - Siyin Chin bible

Pusuana 6

¹Tuasia ciang TOPA in Moses tungah, “Tu in kumpipa tungah ka sep tu te na mu tu hi. Ka mite a paisak natu in ka seam nanak tu hi. A tatakin ci leang a leitang pan ka mite a hawlkeak tu in ka sawl nanak tu hi,” ci hi.

²Pathian in Moses tungah, “Keima in TOPA ka hi hi.

³A Vaanglianbel Pathian in Abraham, Isaac le Jacob tungah ka kilangh a, ahizong TOPA ci in ka min thiangtho taw amate ka hesak bua hi.

⁴Ngamdangmite bangin a teenna Canaan ngam sia amate tung piak tu kamciam in amate taw thuciamna zongh ka vawt hi.

⁵Tu in Egypt te ii salin a mat Israel te tauna ka za zo a, ka thuciamna ka phawk hi.

⁶Tua ahiciang Israel te tungah, ‘Keima in TOPA ka hi hi; Egypt te sal panin note kong hun tu a, kong suaktasak tu hi. A thahat ka khut laamin amate tungah a lauhuai daan ka tungsak tu a, note kong hun tu hi.

⁷Note keima mihing kong suaksak tu a, keima in note Pathian ka hi tu hi. Egypt saltanna pan kong suataksak ciang na TOPA na Pathian ka hina nong he tu uh hi.

⁸Abraham, Isaac le Jacob tungah piak tu in ka ciamsa ngam ah kong paipui tu a; tua ngam sia note neisa tu in kong pia tu hi. Keima in TOPA ka hi hi,’ ci in, son ta'n,” ci hi.

⁹Moses in Israel te tungah hi thu teng son a, ahizong amate in nadon ngawl uh hi, banghang ziam cile a sila tanna ah kivawtsia in a thin uh tamhtham zo hi.

¹⁰Tuasia ciang TOPA in Moses tungah,

¹¹“Egypt kumpipa kungah va pai ta'n a, Israel te na ngamsung pan pusuaksak hamtang in ci ta'n” ci hi.

¹²Ahizong Moses in, “Israel te ngawngawn zongh in ka thuson hong ngai ngawl tu ci leang bangbangin kumpipa in hong ngai tu ziam? Kampau thiam ngawl mama pa ka hi hi,” ci kik hi.

¹³TOPA in Moses le Aaron tungah: “Egypt ngam pan Israel te pusuana ah lampui tu in noma thu kong piak sia Israel te le Egypt kumpipa tungah son tavun.”

¹⁴Jacob taciil Reuben in tapa li nei a: Hanoch, Pallu, Hezron, le Carmi hi a; amate min a putsak bee le phungte ii pianna taanghpupite ahi uh hi.

¹⁵Simeon in tapa luk nei a: Jemuel, Jamin, Ohad, Jachin, Zohar le Canaan numei khat taw a tapa Shaul hi; amate min a putsak bee le phungte ii pianna taanghpupite ahi uh hi.

¹⁶Levi in tapa thum nei a: Gershon, Kohath le Merari hi; amate min a putsak bee le phungte ii pianna taanghpupite ahi uh hi. Levi sia kum 137 nungta hi.

¹⁷Gershon in tapa nii nei in: Libni le Shimei hi a, amate in suan le paal tam mama nei hi.

¹⁸Kohath in tapa li nei a: Amram, Izhar, Hebron, le Uzziel ahi uh hi. Kohath kum 133 nungta hi.

¹⁹Merari in tapa nii nei a: Mahli le Mushi ahi hi. Hite sia Levi bee le phungte le a suan a paalte ahi hi.

²⁰Amram in a pa suapuinu Jochebed teenpui in, Aaron le Moses nei hi. Amram sia kum 137 nungta hi.

²¹Izhar in tapa thum nei in: Korah, Nepheg, le Zichri ahi uh hi.

²²Uzziel zongh in tapa thum nei a: Mishael, Elzaphan, le Sithri ahi hi.

²³Aaron in Amminadab ii tanu, Nahshon ii suapuinu Elisheba teenpui a; Nadab, Abihu, Eleazar le Ithamar nei hi.

²⁴Korah in tapa thum nei a: Assir, Elkanah le Abiasaph ahi hi; amate Korah bee le phung hong pianna taanghpupite ahi uh hi.

²⁵Aaron ii tapa Eleazar in Putiel ii tanute khat teenpui in, Phinehas nei hi. Hite sia innkuan lutangte hi a, Levi minamte ii pianna bee le phungte ahi uh hi.

²⁶Aaron le Moses tungah TOPA in, “Israel minamte lampui in Egypt pan pusuapui vun,” ci in a sawl ahi hi.

²⁷Amate sia Israel te suatak natu in, Egypt kumpipa tungah thusonte ahi uh hi.

²⁸Egypt ngamsung Moses tungah TOPA in thu a son lai in,

²⁹ama in, “Keima in TOPA ka hi hi. Kong son theampo Egypt kumpipa tungah son in,” ci hi.

³⁰Ahizong Moses in, “Nong heak bangin kampau ka thiam bua hi; banghangin kumpipa in ka thuson hong ngai thong tu ziam?” ci in zo hi.