Read Siyin Chin Pusuana 7 Bible Online

Pusuana 7 - Siyin Chin bible

Pusuana 7

¹TOPA in, “Kumpipa mai ah nang, Pathian bangin kong vawt tu a, na suapuipa Aaron in na kamsaang bangin ama paupui tu hi.

²Kong thupiak theampo Aaron tungah na son tu a, ama in kumpipa tungah Israel te a ngamsung pan a pusuasak natu in son tu hi.

³Ahizong kumpipa a thin ka sahsak tu a, Egypt ah a lauhuai na tam mama vawt kaleng awlmawk ngawlin na thuson hong ngai ngawl tu hi. Tuasia ciang Egypt te tungah nasia takin daan ka pia tu a, ka mite ii minamte tua ngam pan ka pusuapui tu hi.

⁵Keima in ka khut laam in Egypt te tungah ka thahatna ka lak ciang le Israel te a ngam pan ka pusuapui ciang, Egypt te in TOPA ka hina hong he tu uh hi,” ci hi.

⁶TOPA thupiak bangin Moses le Aaron in seam uh hi.

⁷Kumpipa tungah a thuson hunin, Moses kum sawmliat pha in, Aaron kum sawmliat le kum thum pha hi.

⁸TOPA in Moses le Aaron tungah,

⁹“Kumpipa in, hong ki up thei natu in, nalamdang khat hong lak tavun, hong cile, nangma Moses in Aaron tungah a ciangkhut la a sawl in kumpipa mai ah lawnsak lete, tuasia ngul khat suak tu hi,” ci hi.

¹⁰Tua ahiciang Moses le Aaron kumpipa kungah pai in TOPA thupiak bangin seam uh hi. Aaron in kumpipa le a uliante mai ah a ciangkhut lawn a, ngul khat suak hi.

¹¹Tuasia ciang kumpipa in a mipilte le mitbum thiamte samin a mitbum thiamna taw a kibangma in vawt uh hi.

¹²Amate in a ciangkhutte lawnin ngul suak siat hi. Ahizong Aaron ciangkhut in amate aa teng valh hi.

¹³Bangbang hikale kumpipa thinsak veve a, TOPA cisa bangma in kumpipa in Moses le Aaron thu ngai ngawl hi.

¹⁴Tuasia ciang TOPA in Moses tungah, “Kumpipa thin sah mama a, Israel te paisak tu nial hi.

¹⁵Tua ahiciang zingsang in kumpipa Nile ngun ah a pai ciang, pai in a kimu ta'n. Ngul a suak thei na ciangkhut kengin ngunvaal pan ama ngak in.

¹⁶Tua zawkciang kumpipa tungah, ‘TOPA Hebrew te Pathian in amate ii sennealngam sungah ama a biak thei natu in, a mihingte na paisak natu a son tu in kei hong sawl hi. Ahizong tu dong ciang a thu na ni bua hi.

¹⁷Tu in kumpipa awng, TOPA akua hi cisia ama nasep tu sia taw na mu tu hi TOPA in hong ci hi. En in, hi ciangkhut taw nguntui ka saat tu a, nguntui chisan suak tu hi.

¹⁸Ngasate thi tu a, nguntui uih mama in Egypt te in tua tui ne thei ngawl tu uh hi,’ ci in, son ta'n,” ci hi.

¹⁹TOPA in Moses tungah, “Aaron tungah na ciangkhut la in a, Egypt ngamsung ngunte, a kitotawm tuiluamte le tuicingte theampo tungah na ciangkhut vaan in. Tuite chisan hong suak tu a, ngamsung mun theampo le thingbealte, suangbealte sung ngawngawn ah chisan om tu hi, ci in son in,” ci hi.

²⁰Tua zawkciang TOPA thupiak bangin Moses le Aaron te in seam uh hi. Kumpipa le a uliante mai ah Aaron in a ciangkhut laamin nguntui saat a, tui theampo chisan suak hi.

²¹Ngun sungah a om ngasate thi in, ui mama ahikom Egypt te in tua tui ne thei ngawl uh hi. Egypt ngamsung mun theampo chisan om hi.

²²Tuasia ciang kumpipa ii mitbum thiamte in a mitbum thiamna uh taw tuabang tatak ma in vawt a, kumpipa sia a thinsak ngei bangma in sak veve hi. TOPA cisa bangin kumpipa in Moses le Aaron thu ngai ngawl hi.

²³Hi zata in thupiangte ngawngawn zongh kumpipa in awlmawk vet ngawlin a kumpi inn ah heakkik zaw hi.

²⁴Egypt te theampo in tua nguntui ne thei ngawl ahikom ngundung ah a tui neak tu tuikhuk to uh hi.

²⁵TOPA ii Nile nguntui a saat zawk ni sali pha zo hi.