Read Siyin Chin Pusuana 8 Bible Online

Pusuana 8 - Siyin Chin bible

Pusuana 8

¹Tuaciang TOPA in Moses tungah, “Kumpipa kungah va pai ta'n a, TOPA in, ‘Keima hong biak thei natu in ka mite paisak in.

²Ka thu nong nial le na ngam sungah ulol dimsakin daan kong pia tu hi.

³Nile ngun sungah ulol dimleet tu a, ngun sung pan pusuak in na kumpi inn sung, na lupna inndoi sung, na lupna tung, na uliante le na mite inn sung, tuaciang na meikhuk le na kuangte sung ngawngawn dongah hong zuan tu hi.

⁴Ulolte in nangma tung, na mihingte tung le na uliante theampo tungah hong leangto tu ci hi,’ ci in na son tu hi,” ci hi.

⁵TOPA in Moses tungah, “Ngun tung, a kitotawm tuiluam tung, tuicingte tungah a ciangkhut vaan in, ulolte pusuaksak in a Egypt ngamsung dimsak in ci in Aaron tungah son ta'n” ci hi.

⁶Tua ahiciang Aaron in a ciangkhut tui omna theampo tungah vaan a, ulolte pusuak in ngamsung dim hi.

⁷Ahizong mitbum thiamte zongh in mitbum thiamna zanghin ngam sungah ulolte pusuaksak hi.

⁸Kumpipa in Moses le Aaron samin, “Hi ulol teng a laakkeak natu in, TOPA tungah thungen vun, TOPA tungah sangaw biakna a piak thei natu in, na mite ka paisak tu hi,” ci hi.

⁹Moses in kumpipa tungah, “Nang atu in thu kong ngetsak tu ka lungdam hi. Nangma, na uliante le na mite atu thu kong ngetsak tu hun ciangtan in. Tuasia ciang, hi ulolte sia Nile ngun sung simngawl mundang ah om nawn ngawl tu hi,” ci in zo kik hi.

¹⁰Kumpipa in, “Zing ciangin thu hong ngetsak ta'n,” ci in zo hi. Moses in, “Nong sawl bangin ka seam tu a, tuaciang kote Pathian TOPA taw a kibang pathian dang a om ngawl hunlam he tu ni hi.

¹¹Ulolte sia nangma, na uliante le na mite taw kipeal in Nile ngun sung bek ah om tu hi,” ci hi.

¹²Tua zawkciang Moses le Aaron te kumpipa nusia in ama ii kumpipa tung dongah a puak ulolte a laak kik natu in, Moses in TOPA tungah thungen hi.

¹³Moses ii nget bangin TOPA in naseam a, inn sung suumsung le lote sungah a om ulolte thi hi.

¹⁴Egypt te in ulol thite a lom a lom in seng a, ngamsung theampo uihsak hi.

¹⁵Kumpipa in ulol thite a mu ciang a thinsak kikin TOPA ci sa bangma kumpipa in Moses le Aaron thu ngai ngawl hi.

¹⁶TOPA in Moses tungah, “Aaron in a ciangkhut taw lei a saat natu sawl in a, tua hile Egypt ngamsung leivui theampo thokaang suak siat tu hi,” ci hi.

¹⁷Tua ahiciang Aaron in a ciangkhut taw lei saatin, Egypt ngamsung leivui theampo thokaang suak a mihingte le nganhingte tungah dim hi.

¹⁸Mitbum thiamte in a mitbum thiamna zanghin thokaang piansak tu hanciam a, ahizong vawt thei ngawl uh hi. Thokaang mun theampo ah hong om hi,

¹⁹tuaciang mitbum thiamte in kumpipa tungah, “Hi sia in Pathian nasepna hi zo hi!” ci uh hi. Ahizong kumpipa thinsakin, TOPA ci bangma kumpipa in Moses le Aaron thu ngai ngawl hi.

²⁰TOPA in Moses tungah, “Ngun ah kumpipa a pai ciang kimu tu in zing ciang zingsang tuungin pai in a, TOPA in, ‘Amate in kei hong biak thei natu in ka mite paisak hen.

²¹Na kidop natu panin ka thu nong nial le daan kong pia tu a, nangma tung, na uliante tung, le na mite tungah tho honpite kong puak tu hi. Egypt te ii inn te tho taw kidim tu a, lei sia tho honpi taw kituamcip tu hi.

²²Ahizong ka mite teenna Goshen ngam sia tho om ngawl tu in ka khe tu hi. Keima TOPA in hi ngam le lei ah naseam hi ci in nong heak natu in hi bangin ka vawt tu hi.

²³Ka mite le na mite kilaklaw ah kilamdanna khat ka vawt tu hi. Hi nalamdang lakna sia zing ciang in hong piang tu hi,’ ci in son ta'n,” ci hi.

²⁴TOPA in, kumpipa inn sung le a uliante inn sungah tho honpite puak hi. Tho in Egypt ngamsung buppi lalsak hi.

²⁵Tuasia ciang kumpipa in Moses le Aaron samin, “Pai in hi ngam sungah na Pathian sangaw biakpiakna pia vun,” ci hi.

²⁶Moses in, “Tuabang hi tu pha ngawl hi, banghang ziam cile TOPA ka Pathian tungah nganhingte taw biakpiakna in Egypt te thin uuksak tu hi. Egypt te mu theina ah hi ngannote taw biakpiakna vawtin amate thin uuk thong le kote suang taw hong deanglum tu uh hi.

²⁷Ama hong thupiak bangin TOPA ka Pathian tungah sangaw biakpiakna pia tu in, ni thum khualhaw in sennealngam sungah ka pai uh kul tu hi,” ci in zo hi.

²⁸Kumpipa in, “A khuala mama na ah pai bua po le uh te, sennealngam sungah TOPA na Pathian bia tu in kong paisak tu hi. Kei atu in thu hong ngetsak tavun,” ci hi.

²⁹Moses in, “Ka pusua po ciang, zing ciang tho honpite in nangma, na uliante le na mihingte kung pan a tai siat natu in TOPA tungah thu ka ngen tu hi. Ahizong mite ii TOPA tungah sangaw biakpiakna a vawt tu khaamin, hong theam kik peuma ngawl tu ni hi,” ci in zo hi.

³⁰Moses in kumpipa kung pan pusuakin TOPA tungah thungen hi,

³¹Moses nget bangin TOPA in pia hi. Tho honpite kumpipa, a uliante le a mihingte kung panin khat zongh kikhe ngawlin tai siat hi.

³²Ahizong hi hun zongh ah kumpipa thin sah veve in, ama in tua mite paisak ngawl leleau hi.