Read Siyin Chin Job 10 Bible Online

Job 10 - Siyin Chin bible

Job 10

¹Ka nuntak cimtak khi hi, lungkim ngawl a, ka phun ka mauna hong ngai ta'n.

²Hong puavawk heak in Pathian awng. Kei nong mawsakna a bang hi thong ziam? Hong son ta'n!

³Tua zata bang na ngitlo sia maan tu ziam? Nangma vawtsate ma zawnsak vawt tu ni ziam? Tuaciang mi ngilote sawmna tungtaang ah maipha pia tu ni ziam?

⁴Kote muna bangin tuate na mu ziam?

⁵Ko ma bangin na khantom ziam?

⁶Tua ahile banghang ka mawna theampo hong sul zui in, ka sep khial theampo banghang hong vaizui ni ziam?

⁷Maw ngawl ka hi hunlam le, na khut sung pan kei hong hun thei kuama om ngawl ci sia na he hi.

⁸Na khutte in kei hong piangsak a hong zeam hi, tuaciang tu in tua khutte ma in kei hong lalsak hi.

⁹Tungman panin nong vawt sia phawk kik in a, leivui suak tu in hong ngoaivui kik tu ni ziam?

¹⁰Nangma in kei pian natu in ka pa thahatna na pia a; ka nu sulh sungah nong khangsak hi.

¹¹Ka pumpi sia ngute le sazangte taw na vawt hi, tuaciang tua ngute sia sangol le vun te taw na tuam hi.

¹²Nuntakna le a kikhomsuan itna nong pia zo a, tuaciang nong khoi nong kepna taw kei nong nungtasak zo hi.

¹³Ahihang tua hun sung theampo ah nong natsak natu na ngeal ku sia tu in ka he hi.

¹⁴Ka mawna nong maisak nop ngawl hu in mawna a vawt ziam ci in nong encik hi.

¹⁵Ka maw poma ciang ngim nong thuaksak a, ahihang a maanin ka ngamtat ciang maipha ka nga bua hi. A cimaw a maizum in ka om hi.

¹⁶Zawna khat pawpo nei lei leng zong, tawpi khat taw kibangin nong vai hi; hong liamsua tu in nalamdang laknate ngawngawn na vawt hi.

¹⁷Kei hong langpanin a ding tu tetti na nei tawntung hi; Kei tungah na thin uukna khang vaial hi; kei nong sim natu ngealna thak na nei tawntung hi.

¹⁸Pathian awng, banghang hong piangsak ni ziam? Kuama ii hong mu ma in ka thi tu hi zo kana ve.

¹⁹Sulh sung pan thaankhuk ah paitan paih hi leng a om ngeingawl sia bang hi tu kana ve.

²⁰Ka khan bo dektak zo hi ngawl ziam? Kei nguak hong omsak kapo in! Ka hun nei lai sun teng a nuamin hong zanghsak ta'n.

²¹Hai ngawlin ka pai tu a, kong heak kik nawn buatu hi — ka zot natu ngam sia thinkiamhuai in, khuamial in khuazing cip a,

²²khuazinna, limhte taw a kiliana le lungman buaina ngam hi a, khuavak sia khuazing a hina mun ahi hi.