Read Siyin Chin Job 13 Bible Online

Job 13 - Siyin Chin bible

Job 13

¹Na son theampo ka zaak ngeisa vive hi. Tuate ka tel siat a; na heak za uh ma ka he hi. Kei, no sangin nangh zaw tuan ngawl khi hi.

³Ahizong ka thu kinialpui sia Pathian hi a, no hi ngawl nu hi; ka thu sia ama taw kinial nuam khi hi.

⁴Na heak ngawl uh teng leilot thu taw seal nu hi; no sia kuama a damsak zo ngawl syavuante taw kibang nu hi.

⁵Bangma son ngawlin om vun, tuasia ciang khat po in a ciim hong sa tha tu hi!

⁶Ka thu kong pualaak ciang ngai vun.

⁷Banghangin leilot nu ziam? Na leilotnate in Pathian phatuamsak tu in ngaisun nu ziam?

⁸Ama sungsia tu hanciam nu ziam? Ama ii thu sia zum ah kinial nuam nu ziam?

⁹Pathian in no hong en cian le a pha khat pawpo a mu tu ziam? Ngual na theam uh bangin Pathian theam thei tu in ki um nu ziam?

¹⁰Doidan nopna na seal uh hang ama in no hong teih tu a,

¹¹tuaciang ama thahatna in no hong lausak tu hi.

¹²Na paunakte vut taw kibangin kimanna om ngawl hi; na ngatang seenate tungman bangin topcip hi.

¹³Thim khipkhep vun a, thuson tu hun khat kei hong pia tavun, a sua nop po suak hi tahen.

¹⁴Keima in ka nuntakna pia tu in ka kinging hi.

¹⁵Ka lametna theampo bosua zo ci leang Pathian in hong that hial zong bang phamaw ziam? Ama tungah ka thu sung tu khi hi.

¹⁶Ka hangsanna zongh in hong hun thei lai hi, banghang ziam cile mi ngilo khat peuma in Pathian mai si ngam ngawl hi.

¹⁷Tu in ka son telna kammalte ngai vun.

¹⁸Ka thu sung tu in kinging zo khi hi, banghang ziam cile keima ka maan hunlam kihe khi hi.

¹⁹Pathian awng, kei maw hong suan tu in hong pai ni ziam? Tuabang hong pai na hile thim om in a thi tu kinging khi hi.

²⁰Thu nam nii hong ngensak ta'n; tuate thukim lete nang kung pan buk tu hanciam ngawl tu khi hi;

²¹Kei daan nong piak tawp in a, launa taw kei hong sucip heak in.

²²Pathian awng, pau masa in, hong zo tu khi hi. Tua ahibuale kei hong pausak ta'n a, hong zo ta'n.

²³Ka mawnate bang teng ziam? Khialna ka vawt bang om ziam? Bang khialna liante taw kei hong kimawsak ziam?

²⁴Banghangin kei hong pial ni ziam? Banghangin hong ngal vawt ni ziam?

²⁵Kei hong lauthawn nuam ni ziam? Kei sia thingtee khat hi lel khi hi; taangphaw ko sa khat a ngal vawvawt na hi hi.

²⁶Kei tungah nasia takin maw nong suanh hi, ka khanmoi lai ka ngamtatna ngawngawn taw nong mawsak hi.

²⁷Ka peangte thikkol nong bulh hi, ka kalsuan sim nong encik a, ka khuanite ngawngawn na en cian hi.

²⁸Tua hu in thing muatsa bangin ka topcip a, nget ii neaksa puanpuasilh bangin ka om hi.