Read Siyin Chin Job 14 Bible Online

Job 14 - Siyin Chin bible

Job 14

¹Eite theampo sia a thaneam a cimaw sa in ih piang hi. A vekpi in khantom nuntak haksatna le ngimnate a kibang in kidim hi.

²Ih khangto a, paakte bangin manlang takin ih vul hi; limhte bangin ih bo hi.

³Pathian awng, kei nong en beak tu ziam, ahibuale thu hongsit in kei tungah thu nong khen tu ziam?

⁴Mihing bang a thiang ngawl na khat pawpo sung pan a thiangtho na piang thei ngeingawl hi.

⁵Ama khansau za tu — a nuntak hun tha pha za tu sia a masia in kikhensat zo hi. Nangma in tuate na khensat zo a, tuasia kilai kik thei ngawl tu hi.

⁶Mundang en in a, ama nguak nusia in; Ama in a thuak zo tu ahile — a nuntakna haksa sungah nuamsasak in.

⁷Thingkung kiphuk sa khat atu in lametna om hi; tuasia nungta kikin meang hi.

⁸A zungte haamin, a bul lei sungah thi kale

⁹tui a nga thingkung no bangin meang tu hi.

¹⁰Ahihang mihingte thi a, tua in amate tawpna hi; amate thi hi, tuasia zawkciang amate koisungah om ziam?

¹¹Ngun a luan tawp te, tuili a kangte bangma in,

¹²mihingte thi in, a tho kik ngei buatu hi. Vanpi a kip laiteng amate khanglo ngeingawl tu hi; amate a mutna pan tung nawn ngawl tu hi.

¹³Mithi khua ah kei hong seal heu lete uuk nang; na thin uuk thai dong hong seal ka ven, tuasia zawkciang kei nong phaw kik natu hun khat ciangtan in.

¹⁴Mihingte thi le amate nungta kik thei ziam? Ahihang hi ngim ngana hunte a bo dong hun phazawte ngak tu khi hi.

¹⁵Tuasia ciang nong sam tu a, kong zo tu hi, tuaciang nong bitphua sa kei tungah na lungkim tu hi.

¹⁶Tua zawkciang ka kalsuan simin nong encik tu a, ahizong ka mawna ka khialna te nong sul zui buatu hi.

¹⁷Nangma in tuate na maisak tu a, na heam tu hi; ka vawt a maan ngawlte theampo na niilkeak tu hi.

¹⁸Mualte a cip tu hun le a kip suangliangte a kikhin tu hun hong theng tu hi.

¹⁹Tui in suangpite seu tu a, tuaciang nguapi in leinealte tai tu hi; tuabang keakin kote ii nuntak tu lametna teng na lalsak hi.

²⁰Mihing khat na zothaw a ama a tawntung na hawlkhia hi. A thi ciang a meal mang hi.

²¹A tapate in minphatna nga kale ama in heaksak ngeingawl hi, amate a min siat ciang ama tungah kison ngawl hi.

²²Ama in ama ii a pumpi natna le a thin heena teng bek phawk hi.