Read Siyin Chin Job 16 Bible Online

Job 16 - Siyin Chin bible

Job 16

¹Kammal tuabangte tu masia in ka za ngei zo hi; heenepna nong piak uh sia ngim kipiakna hi bek hi.

³Pau tan viuveu tu nu ziam? kam a pau khak tu sia na uukna in kam tungnut kitu nu ziam?

⁴Kei dinmun ah no om le uhte a, no dinmun ah kei ding leng, no pau theampo kei zong pau thei tu khi hi. Tel takin ka lu pei a, kam tam mama kong son thei tu hi.

⁵Ngaisut piakna taw no kong thahatsak thei tu a, heeneam tu in no kong pau pupui tu hi.

⁶Ahihang ka thusonte in bangma hong hu ngawl a, ka thim om ciang zong ka natna nuamtuam tuan ngawl hi.

⁷Pathian awng, hong toisak niknek zo ni hi, ka innkuan in hong kithalup tu na oai zo hi.

⁸Nangma in nong pummat zo a; ka ngal na hi hi. Ka vun le ka ngu nguak bekin ka om a, tuasia zongh ka maw hunlam a kilakna in mite in ngaisun hi.

⁹Pathian in thin uukna taw ka ngu ka taang khat zawkciang khat thiaktan a; etsatna taw kei hong ngau hi.

¹⁰Mite in kei hong nunau a; amate in hong kiim uum in ka maitang hong beang hi.

¹¹Pathian in kei sia mi ngilote khut sungah hong aap zo hi.

¹²Thinnuam in ka om a, ahihang Pathian in ka longtawl pan hong zamh a, hong vel in hong sucip hi. Pathian in phutuunna in hong nei a,

¹³tuaciang ka kiimkot pan thaltangte taw hong kap a — tuate in hong sun in hong liamsua hi, tuasia ciang zong ama in hong hesuak tuan bua hi.

¹⁴Ama in kei hong liamsua kikik hi; Ngual a huatsa leilam ngalkap khat bangin ama in kei hong sim hi.

¹⁵Khuangai in khau-ip puan ka silh a, hi sung leivui sungah ngallel in ka tocip hi.

¹⁶Ka mai a san dongin ka kap a, ka mit tumin ka mitkhu bolin dup hi,

¹⁷ahihang ngongtat mawna khat zongh ka vawt bua hi, tuaciang Pathian tungah thin tak taw thu ka ngen hi.

¹⁸Simlei awng, kei tungah hong kivawt khialnate seal heak in! Thukhaikim natu ka sapna aw thimsak heak in!

¹⁹Kei atu hong ding tu le kei hong panpui tu vantung ah khat om hi.

²⁰Ka lawmte in kei hong lang a; ka mit pan ka thituite Pathian mai ah taak hi.

²¹Mihing khat in a lawmpa atu a maangkaasak bangin kei atu in Pathian tungah hong thuumsak tu khat ka kisamh hi.

²²Tu in ka kumte bawbo a, a kiheak kik ngawl tu lampi ka tawn hi.