Read Siyin Chin Job 18 Bible Online

Job 18 - Siyin Chin bible

Job 18

¹Job awng, nang bang mihingte thim om thei ngeingawl tu ahi bua ziam? Na pau tawlnga in hong ngai po lete hong paupui thei tu khu hi.

³Ko sia khui khawng bangin mawmaw ci in akua in nang hong ngaisunsak ziam?

⁴Na thin uukna taw nangma le nangma a kinatsua hi bek ni hi. Na thin uuk hang po in leitung kinusia tu ziam? Pathian in na lungkim natu in mualte a khiin tu ziam?

⁵Mi ngilote ii khuavak taang kimitsak lai tu hi; a meikuang kuang kik ngei nawn ngawl tu hi.

⁶A tuipuan bukte sungah a meiinn sia kimit tu hi.

⁷A kalsuannate kho hi, ahizong tu in amate lutu hi; amate ma ii ngaisut a kipiakna taw amate puk hi.

⁸Ngen khat sungah amate vak a, a peangte awk hi;

⁹thaangsia na khat sungah a khuatulte awk a, lencip hi.

¹⁰Lei ah thaangkhau khat kiseal a, a lampi ah thaang khat kisiah zo hi.

¹¹A kiimkot panin launa in ngak hi; tua in a kalsuan simin amate zuizen hi.

¹²Amate hau ngei hi, ahihang tu in ngilkial in vak hi; tuasiatna in a kung panin ngak hi.

¹³A kiitakhuai natna khat amate ii pumpi tungah kizel a, a khut le a peangte muatsak hi.

¹⁴Amate ngammuang takin a teenna tuipuan bukte panin kinuaicip a, Thina Kumpipa mai ah kikaikeak hi.

¹⁵Tu ahile natna a nga thei ngawl natu in kaan a kithe zawkciang, a kuama po a tuipuan buk sungah teang thei hi!

¹⁶Tuate ii a baakte le a zungte sia vulin ko hi.

¹⁷Amate ii minthanna sia tualsung le ngamdang ah bo vangeu a; kuama in amate phawk nawn ngawl hi.

¹⁸Amate a nungtate ngam pan kinotkeak tu a, khuavakna pan khuazingna ah kinot tu hi.

¹⁹Amate in suan le paal nei ngawl a, kuama taang nawn ngawl hi.

²⁰Nisuana pan nitumna dong amate ii thuakna a za theampo lau in liinglawng hi.

²¹Tuasia in mi seksolte ii thuak tu hi a, Pathian a awlmaw ngawlte thuak tu a tangsa ahi hi.