Read Siyin Chin Job 2 Bible Online

Job 2 - Siyin Chin bible

Job 2

¹TOPA mai ah vantung mite a kilak kik tu ni a thet ciang tuate sungah Satan om hi.

²TOPA in Satan tungah, “Koisung teng theng zo ni ziam?” ci in dongh hi. Satan in, “Mun khat pan mun khat ah pai in simleitung ah ka vak kawkoai hi,” ci in zo hi.

³TOPA in, “Ka naseampa Job na phawk tha ziam? Leitung ah ama bangin a thumaan le a pha kuama om ngawl hi. Ama in kei hong bia a, a sia a vawt ngawl natu kidawm hi. Bangma thu om ngawl bulin ama na suksiat natu in kei nong kun a, ahihang Job sia a ngei bangma in thumaan lai hi,” ci hi.

⁴Satan in, “Mihing khat pawpo in a nuntak natu in a nei theampo pia khia tu hi.

⁵Ahihang tu in sonteena in nangma in a pumpi nasak lete — ama in na maitang panin hong haamsiat tu hi!” ci in zo kik hi.

⁶Tuasia ciang TOPA in Satan tungah, “Pha hi, ama na khut sungah om hi, ahihang ama thatlum ngawl tu ni hi,” ci hi.

⁷Tuasia ciang TOPA omna pan Satan pusuak in, ama in, Job ii pumpi tung theampo ah meima puite piangsak hi.

⁸Job in nin kholna hui ah to in a meimate a khuat natu in tungbeal tamhbek khat la hi.

⁹A zi in ama tungah, “Na thumaan ngei ma in thumaan lalai na hi ziam? Banghangin Pathian haamsiat in thi heu ngawl ni ziam?” ci hi.

¹⁰Job in, “A lui thawthongin pau ni hi! Pathian in napha khat po hong puak ciang lawp takin ih saang hi. Ngimna hong puak ciang banghangin phun thei tu hi ziam?” ci in zo hi. Hite theampo a thuak kawm sung panin, Job in Pathian tungah kam ngaldo bangma pau ngawl hi.

¹¹Job ii lawmte thum sia Teman khuapi panin Eliphaz, Shuah ngam panin Bildad, le Naamah ngam panin Zophar te ahi hi. Job ii hi bang zata a ngim thuakna thu a zaak uh ciang amate in Job kungah pai in heeneam tu in khensat uh hi.

¹²Amate in a khuala pan Job ngalmu a, ahihang tel ngawl uh hi. A tel tak uh ciang amate nasia tak kapin, khuangai in a puansilhte baltham a, leivui lawnto in a lu tungah the uh hi.

¹³Tua zawkciang amate in Job taw kam khat zongh pau ngawlin sun sali le zan sali lei ah topui uh hi, banghang ziam cile ama in bang zata in thuak ci sia amate in mu uh hi.