Read Siyin Chin Job 21 Bible Online

Job 21 - Siyin Chin bible

Job 21

¹Kong son tu teng hong ngai tavun; Heenep natu kong nget sia, tua teng lian ma hi.

³Pau tu hun hong pia tavun a, ka man zawkciang nong nunau nuam uh le noma thu hi.

⁴A thithei mihingte taw a kihau hi ngawl khi hi; ka thin vei laakna sia ahang thupi khat om hi.

⁵Kei hong en tavun. Ingh in, thim om in, hong salhsak tham liang hi ngawl ziam?

⁶Kei tungah hong piangsate ka ngaisut ciang lung amh in liingin ka ci ngawk hi.

⁷Banghangin Pathian in misia te a huai dong a nuamsa in nungtasak ziam?

⁸Amate in tate le tute nei a, tuate khan en tu in nungta hi.

⁹Pathian in a bangkua uh ah tuasiatna tungsak ngawl hi, amate thaa lau in nungta ngeingawl hi.

¹⁰Hi hi, a khuite theampo pungin a no sua ciang haksa ngawl hi.

¹¹A note sia tuunote bangin tai in kimai uh a,

¹²tengtongh le tamngaite aw taw laam uh hi.

¹³Amate thinnuam in nungta a, tuaciang ngimna thuak ngawlin nuam takin thi uh hi.

¹⁴Mi ngilote in Pathian tungah koma nguak hong nusia ta'n ci uh hi; amate in a nuntakna sungah Pathian ii deina he nuam ngawl uh hi.

¹⁵Amate in Pathian atu sep kul sa ngawl hi, a tungah thunget zongh phattuamna omsa ngawl hi.

¹⁶Amate in a nei tha le ngal taw zawna ka nga uh ci hi, ahihang amate khua ngaisutzia ka saang thei bua hi.

¹⁷Mi ngilopa ii meivak sia kimitsak ngei ziam? Amate khat in tuasiatna thuak ngei ziam? Pathian thin uukin a ngilote daan pia ngei ziam?

¹⁸tuaciang vui ii taangphaw a seam bangin ahibuale vuipi suangval ii leivui a let bangin amate seamkeak ngei ziam?

¹⁹A pa ii mawnate hu in a tate khat ii tungah Pathian in daan pia hi ci nu hi. Hi ngawl hi! Mawneite amate mama Pathian in daan pia hen; Amate mawna hu in ama ii tuabang a vawtna thu ama in lak hen.

²⁰Mi mawte in amate aituamin daan thuak tahen; Amate in Vaanglianbel pa Pathian thin uukna thuak tahen.

²¹Eite ih khan man zawkciang ih tate ii a lungdam le a lungdam ngawl ih awlmawk takpi ziam?

²²A saangna munah a omte ngawngawn thu a khen Pathian tungah mihing khat pawpo in hilcian thei ziam?

²³Mihing pawlkhat sia a thi ni dong ciidam in nungta a; a pumpi uh zongh pha takin kivaak a, sa pha in, lungdamin olno takin thi uh hi.

²⁵A dangte in lungdamna nei vet ngawl hi; amate thinsia in nungta a, thinsia in thi uh hi.

²⁶Ahihang a vekpi, a kibangin thi a, a kibangin kiphum hi; amate a vekpi thanhte taw kituam hi.

²⁷Elna thin kukal na nei uh hong he khi hi.

²⁸“Tu in siatna a vawt mi liante ii innte koisung om ka na ziam?” ci in na dongh uh hi.

²⁹Khualhaw mite taw thu kumkhawm ngawl nu ziam? Amate ii hong ko kik thute he ngawl nu ziam?

³⁰Pathian thin uuk a daan a piak ni in mi ngilote sia kikhoaikhe tawntung hi.

³¹Mi ngilote a mawsiat tu kuama om ngawl hi, tua ahibuale ama ii sepsate theampo a thuk kik tu kuama om ngawl hi.

³²Pha takin a kicing a thaankuul omna thaanmual ah amate a kipuak ciang,

³³mihing a tul simin thaan kuanpui a, a luangte tungah lei ngawngawn in dam takin vuknelh hi.

³⁴Tuaciang no na hi uh le! Thu nawnsan teng po taw kei heenep nong sawm uh hi! Nong zo kikna peuma leilot thu vive hi!