Read Siyin Chin Job 24 Bible Online

Job 24 - Siyin Chin bible

Job 24

¹Banghangin Pathian in thukhen natu hun khat, ama na a seamte atu in thutang khen ni khat ciangtan ngawl ziam?

²Mite in leitang tamzaw a nga natu in, longi khiin uh hi; amate in tuute ngu in amate tuuhonte taw koi khawm uh hi.

³Amate in tangate neisa laanote la in, a leiba a lo dong meingong nu ii khuital keam hi.

⁴Amate in mizawngte ii a nga thei tute khaktan in; tuaciang a zawngkhalte zawthawkna taw taisakin buusak uh hi.

⁵Tua ahikom mizawngte sia, ngam laate bangin, duisung ngam kona sungah an zong uh hi; amate in koima dang po ah a tate an tu mu zo ngawl uh hi.

⁶Amate in amate ii neisa ahi ngawl lo ante a laak kul hi, tuaciang mi ngilote ii sapithuan sungah sapitngate lo uh hi.

⁷Zanin amate bangma silh ngawlin lum a, khuasik dal natu puan nei ngawl uh hi.

⁸Mualtung ah ngua a zute in amate tuamcipsak a, suangpite kung a kipha tinten in bealh uh hi.

⁹Misiate in pasel patang note sal suaksak a, mizawngte ii tate leiba taangin la uh hi.

¹⁰Mizawngte ahile a kiseal natu puan nei ngawlin a vak kul a, mangtaang a at laitakin a ngil uh kial nanak tu hi.

¹¹Amate in olive ngate sathau in ngoai a, sapitngate a tui suuk hi, ahihang amate mama a dang uh ko hi.

¹²Khuapite sungah a liamte le a thi dekte in au in a ko uh hang Pathian in amate thungetnate awlmawk ngawl hi.

¹³Khuavak a nial mite om hi; Amate in tuasia tel ngawl hi, ahibuale a lamlakna mun zuan ngawl hi.

¹⁴Khuavak ciang mi thatpa tho in mizawngte thatlum tu in kuan hi, zanin ama in ngual ii na nguksak hi.

¹⁵Palngul mawna a vawt sia in khuangial tu ngak hi; Ama in kuama ii mu thei ngawl tu in a maitang seal hi.

¹⁶Zanin ngutate in innte phuul a, ahihang sunin amate buu in khuavak pial uh hi.

¹⁷Amate in sun khuavak kiita a, ahihang amate atu in khuazing kiitakhuai ngawl hi.

¹⁸[2]Mi ngilopa sia khuanawl tuipawm in taaikeak a, tuaciang a neisa leitang Pathian in haamsiat hi; ama a sapithuan sungah naseam tu in kuan nawn ngawl hi.

¹⁹Nisa khua kona sungah vuuk a tuithap vadi bangin mimaw khat sia a nungtate ii ngam panin bo vangeu hi.

²⁰Tu in a nu ngawngawn in ama phawk nawn ngawl hi; ama thanh in ne a, thing puk khat bangin kimuatsak hi.

²¹Tuabangin a pian sia meingongte a vawtsiat hang le tasel nupite tungah cikna thiamna a lak ngawl hang hi.

²²Pathian in ama ii thahatna taw a thahatbelpa susia a; Pathian hong dian tak ciang mi ngilo pa thi hi.

²³Pathian in ama ngal muangin nungtasak thei hikale ama encik tan viuveu hi.

²⁴Tawmvei sung teng mi ngilo pa nuamsa hi, ahihang tua zawkciang ama lopa khat bangin vul a, ankung vui kisaattante bang ahi hi.

²⁵Tu a ka ci bang hi bo ci in khat po in a nial thei tu ziam? Ka kammalte maan ngawl hi ci in, khat po in a lak thei tu ziam?