Read Siyin Chin Job 27 Bible Online

Job 27 - Siyin Chin bible

Job 27

¹Thukhaikim thu hong pia nuam ngawl, ka nuntakna a lalsak, a nungta Vaanglianbelpa Pathian taw ka kiciam hi.

³Pathian in husanna hong piak laiteng in

⁴ka kam ka muk in a sia peuma pau ngeingawl tu a, ka leei in leilot thu khat zongh son ngeingawl tu hi.

⁵No pasalte maan nu hi ci ngeingawl tu khi hi; ka mawban ngawlna sia ka thi dongin ka thasua buatu hi.

⁶Maan khi hi ka ci sia bangma hunin thasua ngawl tu khi hi; hi thu ah kithasunna om ngawlin ka thin thiang hi.

⁷Kei hong langpanin kei hong ngal vawtte a vekpi in mi seksolte le thutang ngawlte bangin daan kipia tahen.

⁸Pathian selte nuntakna sia Pathian ii a tangkal hun ciang bang lametna om na ziam?

⁹Ngimna hong tun ciang Pathian in amate auna za tu ziam?

¹⁰Amate in Pathian piak lungdamna sia a dei tu uh hi a, ama ii tungah tatsat ngawlin thu a nget tu ahi hi.

¹¹Pathian ii vaangletna bangza in lian ziam, hong hilsak tavun a, tuaciang Vaanglianbelpa Pathian in bang ngeal ziam ci sia no hong sonthiangsak tavun.

¹²Ahihang, kong hil bua zong noma mama in mu tek zo nu hi; tua ahiciang banghangin tuabang nawnsan thu son nu ziam?

¹³[4]Hisia in vaanglianbelpa Pathian ii a ngilo, a ngongtat mite daan a piakzia hi.

¹⁴Amate in tapa tam mama nei thei tha tu hi, ahihang ngal sungah a vekpi kithat tu a; amate ii tanote in neak tu a kicing nei ngeingawl hi.

¹⁵A nungta sunte zongh natna taw thi tu a, tuaciang a meingongte ngawngawn in a thi huvau in khuangai ngawl tu uh hi.

¹⁶Mi seksol sia in sim zawk ngawl ngunntang nei tu a, khat pawpo ii kisap za sangin a tamzaw puansilhte nei tu hi;

¹⁷ahihang mipha khat po in tua puante silh tu a, tuaciang mi thumaan khat po in tua ngunte tang tu uh hi.

¹⁸Mi seksol pa in mombu bangin innte sa a, tua ahibuale lote a cing sila khat ii buk bangin sa hi.

¹⁹Hun khakbel khat sungah amate a hau in lum tu a, a khanlaw uh ciangin, a nei a lamh teng a bo siat mu tu uh hi.

²⁰Thakhat thu in khuanawl suak bangin launa in nawk tu a; zanin vui in amate seamkeak tu hi;

²¹ni suana vui in amate a inn uh panin lenkeak tu hi;

²²amate ii suatak natu a hanciam mama laitakin tua vui in amate dual ngawl hetin nuaimang tu hi.

²³Amate a tai uh ciang, vui nging himhum in, lalsak theina hatna taw amate hawk a lausak hi.