Read Siyin Chin Job 30 Bible Online

Job 30 - Siyin Chin bible

Job 30

¹Ahihang tu in kei sangin a khan moi zaw pasalte in kei sia ciammuina po in hong nei uh hi! A pate mannung mama ngawl tawntung ahiciang ka uite ii tuu cinna ah ka husak bua hi.

²Amate sia pasal tha tual sa honkhat hi a, kei atu na khat pawpo a seam tu in thazawm lei hi.

³Amate zawng mama in a ngilkial ahikom duisung ngampa ngamtongtana munah zanin thingzung ko te khim uh hi.

⁴Amate in sennealngam ah thingno pote botin ne uh hi, limna a nei ngawl belh munphia kung ii zung ngawngawn ne uh hi!

⁵Nguta khawngte ausat bang phetin a kuama po in amate ausan in notkeak uh hi.

⁶Amate sia liang maitang ah a kito vang lianghawngte sungah teang tu uh hi.

⁷Amate ngamsate bangin dui sungah au in, sawlpaang nuai ah khawl om uh hi.

⁸A mannung ngawl, a son thamman ngawl, min memeal nei ngawlte veu ahi hi! Amate sia ngamsung pan kinotkeak hi.

⁹Tu in amate hong pai in kei hong nuisan uh hi; kei sia amate atu in ciammuina bang bek ka suak hi.

¹⁰Amate in kei kiihuai hong sa uh hi; amate in kei taw a kiteengat ciang pha mama kisa uh a, hong pai in ka maitang ngawngawn cil hong phii uh hi.

¹¹Pathian in a thazawm le a cimaw in kei hong vawt zo ahikom amate in a thinsona taw kei hong langpan uh hi.

¹²Hi a ngilo nuam mihonte in hong talphul a kei hong simin, hong taisak hi; amate in a khakbel hong sim natu kithoai uh hi.

¹³Amate in ka suatak natu khaktan a, hong susia tu in hanciam uh hi; tuaciang amate a tho tu kuama om ngawl hi.

¹⁴Ka kidalnate hong phullet a hong nawk in, ka tung pan hong sucip suk uh hi.

¹⁵Launa in kei hong zo hi; ka vaang sia vui muut khat bangin bo hi; ka nopsaknate meeikaai khat bangin tai hi.

¹⁶Tu in thi dektak khi hi; ka ngim thuakna sia nuamtuam tuan ngawl hi.

¹⁷Zanin ka ngu ka taang theampo na hi; kei hong nene natna sia tawp hun nei ngawl hi.

¹⁸Pathian in ka laktong ngawngliip pan hong zamh a, ka puante meakcip in mealhemsak hi.

¹⁹Ama in buannoai sungah kei hong lawn suk a, leivui taw in ka kibang hi.

²⁰Pathian awng, hong biakpui khi hi, ahihang nong zo ngei bua hi; thu kong nget ciang nong nadon bua hi.

²¹Kei tungah nong ngilo mama a; na tha neiza taw nong vawtsia hi.

²²Vui in nong seamkeaksak hi; vuipi suangval sungah nong lawlok hi.

²³Mihing theampo atu in a kisee kholsa thina sungah nong puak hunlam ka he hi.

²⁴Hesuak nget simngawl a dang bangma a vawt thei nawn ngawl, a lalsa pasal khat sia, banghangin sim nu ziam?

²⁵A ngim nga mite taw kap khawm ngawl a a cimaw a kitasamhte atu keima khuangai ngawl ka na khi ziam?

²⁶Lungdamna le khuavak ka lam en a ahizong ngimna le khuazing hong theng zaw hi.

²⁷Thinngimna le natna in kei hong baltham a ni khat zawk ni khat ka thuak hi.

²⁸Thinngim lungngimin nitaang mu ngawlin ka vavak a; ngualhon sungah dingin huna ka ngen hi.

²⁹Ka aw sia ngam ui ahibuale kalaoh vacim aw bang hi a, heehuai in lungzuanhuai hi;

³⁰Ka vun dup zo a, ka ci suuk ngawp hi.

³¹Khatvei lai in a zaaknop huai music la awte ka zaakna munah tu in khuangai in mauna le kaana aw bek ka za hi.