Read Siyin Chin Job 31 Bible Online

Job 31 - Siyin Chin bible

Job 31

¹Ci le sa deina taw numei khat po ka et ngeingawl natu in a ciliap huai kamciam khat ka vawt zo hi.

²Vaanglianbelpa Pathian in ei tungah bang hong vawt ziam? Ama in mihingte nasepna bangbangin thuk kik ziam?

³Ama in, a maan ngawl a seamte tungah tuasiatna le lalna tungsak hi.

⁴Pathian in ka vawt theampo he a; ka kalsuanna theampo mu hi.

⁵Ngitlo ngamtatna nei ngeingawlin, ngualtheam tu hanciam ngeingawl khi hi ci in ka kiciam hi.

⁶Pathian in a maan khaikhin tungah ka ngitna hong tee tahen, tuaciang ama in ka mawban ngawlna mu tu hi.

⁷Lam maan panin ka pial a, ahibuale siatna in ka zolsak a, ka khutte mawna taw a nin le

⁸tuasia ciang ka lo ante laltham tahen a, ahibuale, ka anciinte ngualdang in ne tahen.

⁹Ka innpaam pa ii zi ka dei a, a kongbiang pua sangah buu in ka ngak le

¹⁰tuasia ciang ka zi in pasal dang khat ii an huansak tahen a, pasal dang khat ii lupna ah lum tahen.

¹¹Tuabang a ngamtatsia te thidaan nga tu hi.

¹²Tuasia in ka nei theampo a kuangtumsak, a lalcipsak thei, hell mei bang khat hi tu hi.

¹³Ka naseamte khat in ka tungah a lungkim ngawlna hong pualaak ciang, ngai in ama tungah a pha ka vawt hi.

¹⁴Tuabang a pha vawt bua leng bangbangin Pathian maitang si ngam tu khi ziam? Kei tungah thukhen tu in Pathian hong pai ciang a bang son thei thong tu khi ziam?

¹⁵Kei hong bitphua Pathian in ka naseamte zongh bitphua hi.

¹⁶Mizawngte hu tu ka nial ngei bua hi; meingongte thinkiam in ka omsak ngei bua hi,

¹⁷tua ahibuale neak tu ka nei laiteng tangate a ngil ka kialsak bua hi.

¹⁸Ka khan tawntungin amate pha takin ka en hi.

¹⁹Zawng leih a, puansilh lei zo ngawl a kitasamh khat ka mu ciang,

²⁰keima ii tuu hon sung pan a piang samulte taw a kivawt puansilhte ka pia tu hi. Tuasia ciang ama in a thinsung theampo taw kei hong pok hi.

²¹Thukhenzum ah ka zaw thei tu he in tanga khat ka theam le,

²²tuasia ciang ka baante taltan tahen; tuate ka liangko panin kileamkeak tahen.

²³Pathian ii daan ka kiitak hu in tuabangin ka ngamta ngei buatu hi.

²⁴Hauna ka muang ngei bua a,

²⁵tua ahibuale ka neisa tungah ka kiphasak ngei bua hi.

²⁶A taang mama ni ahibuale, a hoi mama tha ka bia ngei bua hi.

²⁷Ka khut nam in amate zatak ka pia ngei bua a, amate upat pia tu in lam hong kipialsak ngei ngawl hi.

²⁸Tuabang mawna sia thidaan piak tu ahi hi; tuasia in Vaanglianbelpa Pathian nial hi.

²⁹Ka ngalte ii a thuak ciang ka lungdam ngeingawl hi, tua ahibuale tuasiatna a thuak ciang dik ka sa ngei bua hi;

³⁰Amate thi natu thungetna taw ka maw ngei bua hi.

³¹Kei atu na hong sepsak mite theampo in khualmite pha takin vai ka mua tawntung hunlam hong he hi.

³²Khualhaw mite ka inn ah tung tu in ka sam a, lampi tungah ka lumsak ngei bua hi.

³³Midangte in a mawna a khialna te uh seal tu hanciam a, kei ka hile ka phualseal ngei bua hi.

³⁴Mite ii hong ci tu sia ka kiita ngei bua hi; amate hong ci zazaan tu ka lau bua hi thim om in inn sungah ka omcip ngei bua hi,

³⁵Ka pau teng kuama in ngai ngawl tu ziam? Ka kammal theampo thumaan hi ci in ka kiciam hi. Vaanglianbelpa Pathian in ka kam hong zo tahen. Hong langpante ii hong mawsaknate ka mu thei natu in ki at le

³⁶Ka liangko tungah kiphasak liuliau in ka suang tu a, kumpilukhu khat bangin ka lu tungah ka khu tu hi.

³⁷Pathian tungah ka sep sa theampo ka son tu a, ama mai ah awlmaw ngawlin ka om liuliau tu hi.

³⁸Ka thaw leitang sia ka nguk ahi a, a nei tatakte tung pan ka laksak ahile —

³⁹tua munah a kiciing ante ne in, tua ante a ciing lothote ka pukthisakin ahile —

⁴⁰tuasia ciang zungtaang le mangtaangte a po luangin lopa le lingkungte po tahen. Job ii thu sonte a tawpna hi.