Read Siyin Chin Job 32 Bible Online

Job 32 - Siyin Chin bible

Job 32

¹Job sia ama mawbaang kisa ngawl ahikom pasal thum teng in zo kikik tu hanciam nawn ngawl hi.

²Ahihang a kungah a ding Elihu a kici pasal khat in a thin uukna vei zo nawn ngawl hi, banghang ziam cile Job in ama le ama kitangsakin, Pathian mawsiat hi. (Elihu sia Buz ii suan Barakel ii tapa hi a, Ram ii bee le phung pan hi.)

³Ama sia Job ii ngualtamh thumte tungah a thin uuk si hi. Amate in Job ii kam a zo natu he thei tuan ngawl hi, tuasia in Pathian sia a khial bang suaksak hi.

⁴Elihu ahile tualai ah a moibel ahikom ngual theampo ii thuson man dong ngak hi.

⁵Tua pasal te thum in Job kam a zo thei ngawl a mu ciang ama thin uukin,

⁶thuson tu hong kipan hi. Kei moi lai a, no haam zo nu hi, tua ahikom ka ngaisutna kong son tu ka lauthawng hi.

⁷Noma na pau tu uh ma hi a, no uhaamzawte in na ciimna nong hop tu uh ma hi ci in kei le kei ka kici hi.

⁸Ahihang mihingte kungah pai in ciimna a pia sia Vaanglianbelpa Pathian ii thaa hi.

⁹Khanghaamna in mihingte ciimsak ngawl a, a maan sia hesak tuan ngawl hi.

¹⁰Tua ahikom tu in nong nangai tu uh ka dei hi; ka ngaisutna teng hong sonsak tavun.

¹¹Na thu son uh lai in thinsau takin kong ngai a, tuaciang ciim kammalte na zon uh laitakin kong ngak nginge hi.

¹²Pha takin kong ngai a, na lel uh ka he hi; Job paunate na nial thei tuan bua uh hi.

¹³Bangbangin ciimna ka mu zo uh ci thei tu nu ziam? Pathian in Job kam a zo kul tu hi, banghang ziam cile noma in Job na lel uh hi.

¹⁴Job in kei hong paupui hi ngawl a, noma hong paupui hi. ahihang no ii zo bangin ka zo ngei buatu hi.

¹⁵Job awng, amate in a kammal zak tu he tuan ngawl hi; nang hong zo thei ngawl hi.

¹⁶Amate pau ngawl a om laitak ngak kenkon tu khi ziam? Amate tua munah dingin a pau tu he nawn ngawl uh hi.

¹⁷Hi ngawl hi, tu in keima in kong zo tu a, ka ngaisutna kong son tu hi.

¹⁸Pau ngawlin ka om thei nawn bua hi. Ka pau tute ka iip thei nawn bua hi.

¹⁹Pau tu hun nga buathong leng, sapittui thak a dim savun thawl bang in puaktham tu khi hi.

²⁰Thuak zo nawn ngawl khi hi; ka pau tu kul hi.

²¹Hi kam kinialna sungah pan tuam mun nei ngawl tu khi hi; kuama sialpok ngawl tu khi hi.

²²Sialpok dan zongh thiam ngawl khi hi, ngual ka sialpok le Pathian in manlang takin kei daan hong pia tu hi.