Read Siyin Chin Job 33 Bible Online

Job 33 - Siyin Chin bible

Job 33

¹Job awng, tu in ka son tu theampo pha takin hong ngai ta'n.

²Ka thin sungah a om teng son tu in kinging khi hi.

³Ka kammalte theampo ka ci takpi ma hi a, thumaan thutak ka son hi.

⁴Pathian ii thaa in kei hong vawt a, nuntakna hong pia hi.

⁵Nong zo thei le hong zo ta'n. Nong nial natu kinging khol in.

⁶Nang le kei sia Pathian ii muna ah ih kibang a, ih nii in tungman pan hong kivawt hi.

⁷Tua ahikom kei nong kiitak natu bangma thu om ngawl hi; Nang hong neethaw ngawl tu khi hi.

⁸Tu in hi teng sia na pau vangiat ka zaak ahi hi:

⁹“Kei maw ngawl khi hi; a maan ngawl vawt ngawl khi hi. Kei sia mawbanna nei ngawlin mawna khialna pan peng khi hi.

¹⁰Ahihang Pathian in kei hong sim nop hu in paulap tu thu mu a, ngalte khat bangin hong vawt hi.

¹¹Ama in ka peang thikkol bulh a, ka tukna ka dianna theampo hong encik hi,” ci ni hi.

¹²Job awng, ahihang hong son khi hi, nangma khial ni hi. Mihing khat pawpo sangin Pathian lianzaw hi.

¹³Banghangin eite ii lungkim ngawlnate hong zo ngeingawl hi ci in Pathian mawsiat ni ziam?

¹⁴Pathian in thuson kik a, son kikik ahihang ama paunate kuama in nangai ngawl hi.

¹⁵Zan lai mihingte mut lanin Pathian in mang le mukholsakna te taw hong paupui hi.

¹⁶Pathian in ama ii paunate amate in ngaisak hi, tuaciang kidop natu a son kholnate in amate lausak hi.

¹⁷Pathian in amate tungah mawna khialna a vawt nawn ngawl natu le a kiphatsak nawn ngawl natu in pau hi.

¹⁸Ama in amate lalsak ngawl tu hi; ama in thina mama panin amate hun hi.

¹⁹Pathian in mihingte, natna thuaksakna le a pumpi tung natna dimsakna taw in hil hi.

²⁰Ciina khat in a ankam lim ngawl a, an limbel zongh sungnim huai sa hi.

²¹A ci a sa theampo kiam a; a ngu nguak bek a om na mu thei hi.

²²Ama mithi khua zuan tu in kipapan hi.

²³Mite ii a nasep a phawksak kik, vantunglalang khat — Pathian ii vantunglalang a tul sim sung pan khat, amate hu tu in hong pai thei tha tu hi.

²⁴A hesuakna taw vantunglalang in, “Ama suatak in! Ama mithi khua ah a pai tu hi ngawl hi. Ama a suatak natu in hi lai ah a kitatna om hi,” ci tu hi.

²⁵A pumpi moi sua kikin thahat kik tu hi; thu a nget ciang Pathian in zo tu hi;

²⁶ama in lungdamna taw Pathian bia tu hi. Pathian in ama atu in na tuatuamte a maan in lemh kik tu hi.

²⁷Ama in mihonte tungah, “Maw zo khi hi. A maan bang seam ngawl ka hihang, Pathian in hong khoaikhe hi.

²⁸Mithi khua ah ka pai ngawl natu in ama in hong keamcing a, ka nungta lai hi” ci tu hi.

²⁹Pathian in hite theampo seam kikik hi,

³⁰Ama in mihing khat ii nuntakna hun a, tuaciang nuntak sung lungnopna pia hi;

³¹Tu in Job awng, ka son tu sia hong ngai ta'n; thim khipkhep in a, kei hong pausak ta'n.

³²Ahihang son nop khat po na nei le tuasia za nuam khi hi; lungdam takin maan hi ci ngam tu khi hi.

³³Ahihang tuabangin na son buale, thim om in hong ngai ta'n, na ciim natu zia hong hilcian tu khi hi.